Lord Jagannath / ଜ୍ୱରରୁ ଉଠି ସମ୍ପୂର୍ଣ୍ଣ ସୁସ୍ଥ ହେଲେଣି ବିଶ୍ଵ ନିଅନ୍ତା, ମଙ୍ଗଳବାର ନବଯୌବନ ଦର୍ଶନ ଦେବେ ଶ୍ରୀଜିଉ

ସୁସ୍ଥ ହେଲେଣି ମହାବାହୁ । ଆଜି ଏକାଦଶୀ ତିଥିରେ ଲାଗି ହେଲା ଖଳି ପ୍ରସାଦ । ଘଣ୍ଟଘଣ୍ଟା କାହାଳି ବାଜିଲା, ମଣିମା ଡାକ ମଧ୍ୟ ଶୁଭିଲା । ଅସୁସ୍ଥ ହୋଇ ଅଣସର ପିଣ୍ଡିରେ ଥିବା ଶ୍ରୀବିଗ୍ରହ ଆଜି ଏକାଦଶୀରେ ଦଶମୂଳମୋଦକ ଲାଗି ହେବାପରେ ସମ୍ପୂର୍ଣ୍ଣ ସୁସ୍ଥ ହେବେ । ଲାଗିଲା ତୁଳସୀ, ବାସିଲା ରଙ୍ଗୀନ୍ ଫୁଲର ମହକ । ଆସନ୍ତାକାଲି ମହାପ୍ରଭୁଙ୍କ ସୁସ୍ଥତା ନେଇ ଗଜପତିଙ୍କ ପାଖକୁ ଯିବ ଖବର । ମଙ୍ଗଳବାର ନବଯୌବନ ଦର୍ଶନ ଦେବେ ବ୍ରହ୍ମାଣ୍ଡ ପତି । ସେପଟେ ଆଜି ୮୨ ଦିନର ରଥ କାମରେ ରଥ ଉପରକୁ ଉଠିଛି କଳସ । ଅଷ୍ଟମ ହରିବୋଲ ଦେଇଛନ୍ତି ଭୋଇ ସେବକ । ୯ଟି ହରିବୋଲରେ ଶେଷ ହେବ ରଥ କାମ ।

ସ୍ନାନ ପୂର୍ଣ୍ଣିମାଠାରୁ ଅଣସର ଘରେ ଅସୁସ୍ଥ ଥିବା ଚତୁର୍ଦ୍ଧାମୂର୍ତ୍ତି ଗତକାଲି ଦଶମୀ ତିଥିରେ ଶଯ୍ୟା ଛାଡି ଦଶମୀରେ ଅଣସର ଘରେ ଚକା ବିଜେ କରିଛନ୍ତି । ଆଜି ଖଳିଲାଗି ଏକାଦଶୀରେ ଦଶମୂଳ ସେବନ କରି ମହାପ୍ରଭୁ ସଂପୂର୍ଣ୍ଣ ସୁସ୍ଥ ହେବେ । ଦଇତା ଓ ପତିମହାପାତ୍ର ସେବାୟତ ତିନି ବାଡରେ ଶ୍ରୀଅଙ୍ଗରେ ଚନ୍ଦନ ଲେପନ କରିଛନ୍ତି । ଚନ୍ଦନ, କର୍ପୂର, କେଶର ଓ ଆବଶ୍ୟକ ପରିମାଣର କସ୍ତୁରୀ ମିଶାଯାଇ ଶ୍ରୀବିଗ୍ରହମାନଙ୍କୁ ଲାଗି କରାଯିବାର ବିଧି ରହିଛି । ବାରଲାଗି ଖଣ୍ଡୁଆପାଟ ପରିଧାନ କରିଛନ୍ତି ଠାକୁର । ଜ୍ଵରରେ ବାରଣ ହୋଇଥିବା ତୁଳସୀ ଲାଗି କରିବା ପରେ ମହାପ୍ରଭୁଙ୍କୁ ଦଶମୂଳ ଲାଗି କରାଯାଇଛି । ଏହା ପରେ ମହାପ୍ରଭୁ ସମ୍ପୂର୍ଣ୍ଣ ସୁସ୍ଥ ହେବେ ।

ଖଳି ଲାଗି ସମୟରେ ଘଣ୍ଟ ଓ କାହାଳୀ ବଜାଇ ଶ୍ରୀଜୀଉମାନେ ସୁସ୍ଥ ହେଉଥିବା ବାର୍ତ୍ତା ଭକ୍ତଙ୍କୁ ଜଣାଇବାର ପରମ୍ପରା ଥାଏ । ଜ୍ୱର ଯୋଗୁଁ ବିନା ତୁଳସୀରେ କେବଳ ଧଳା ଫୁଲରେ ପୂଜା ପାଉଥିବା ମହାପ୍ରଭୁଙ୍କୁ ଆଜିଠାରୁ ତୁଳସୀ ଲାଗି ହେବାର ବିଧି ରହିଛି । ଆସନ୍ତାକାଲି ଅଣସର ଦ୍ୱାଦଶୀରେ ଶ୍ରୀନହରକୁ ରାଜପ୍ରସାଦ ବିଜେ କରିବ ଏବଂ ମହାପ୍ରଭୁଙ୍କ ସୁସ୍ଥତାର ଖବର ଗଜପତି ମହାରାଜାଙ୍କୁ ପ୍ରଦାନ କରାଯିବ । ସେପଟେ ଆସନ୍ତା ମଙ୍ଗଳବାର ମହାପ୍ରଭୁ ନବଯୌବନ ବେଶରେ ଦର୍ଶନ ଦେବେ ।

ସେପଟେ ୮୨ ଦିନରେ ଚଳଚଞ୍ଚଳ ହୋଇଛି ରଥଖଳା । ଆଜି ରଥ ଉପରକୁ ଉଠିଛି କଳସ । ଭୋଇ ସେବକମାନେ ଅଷ୍ଟମ ହରିବୋଲ ଦେଇଛନ୍ତି । ରଥ ସିଂହଦ୍ୱାରରେ ଲାଗି ରଥ ଉପରେ ଚକା ସଂଯୋଗ ହେବା ଦିନ ଶେଷ ହରିବୋଲ ଦେବେ ନିର୍ମାଣ ସେବକ । ସରିବ ରଥ ନିର୍ମାଣ କାର୍ଯ୍ୟ । ଆଜି ରଥ ଉପରକୁ କଳସ ଉଠିଥିବା ବେଳେ ଓଲଟା ଶୁଆ ମଧ୍ୟ କଳସରେ ସଂଯୋଗ ହୋଇଛି । ସେପଟେ ମହାପ୍ରଭୁଙ୍କ ପ୍ରଭାବେଦୀ ମଧ୍ୟ ସମ୍ପୂର୍ଣ୍ଣ ସଜେଇ ହୋଇ ବିଶ୍ୱ ନିଅନ୍ତାଙ୍କୁ ଅପେକ୍ଷା କରିଛି ।

ଦଶମୂଳମୋଦକ ଲାଗିପରେ ମହାପ୍ରଭୁ ସମ୍ପୂର୍ଣ୍ଣ ସୁସ୍ଥ ହେବେ । ନେତ୍ରୋତ୍ସବ, ନବଯୌବନ ଦର୍ଶନ ଦିନ ତିନି ରଥର କନାମଣ୍ଡଣୀ ହୋଇ ରଥତ୍ରୟକୁ ରଥଖଳାରୁ ଶ୍ରୀମନ୍ଦିର ସିଂହଦ୍ୱାରକୁ ନିଆଯିବ ।