ଭୁବନେଶ୍ଵର: ଏବେ ଚାଲିଛି ମା ଦୁର୍ଗାଙ୍କର ନବଦିନାତ୍ମକ ପୂଜା । ଜଗତ ଜନନୀ ମା ଚର୍ଚ୍ଚିକାଙ୍କ ପୀଠରେ ନବରାତ୍ର ପୂଜା ସ୍ଵତନ୍ତ୍ର ରୀତିନୀତି ଅନୁଯାୟୀ ଚାଲିଛି ମାଙ୍କ ପୂଜା ଅର୍ଚ୍ଚନା । ସେଥିପାଇଁ ଚଳଚଞ୍ଚଳ ହୋଇଉଠିଛି ବାଙ୍କୀସ୍ଥିତ ମା ଚର୍ଚ୍ଚିକାଙ୍କ ଶକ୍ତି ପୀଠ । ସମସ୍ତ ଶକ୍ତି ପୀଠ ଠାରୁ ଓଡ଼ିଶାର ଅନ୍ୟତମ ଶକ୍ତି ପୀଠ ବାଙ୍କୀ ସ୍ଥିତ ମା ଚର୍ଚ୍ଚିକାଙ୍କ ପୀଠ । ଏଠାରେ ମୂଳାଷ୍ଟମୀ ଠାରୁ ମହାଷ୍ଟମୀ ପର୍ଯ୍ୟନ୍ତ ଷୋଡ଼ଶ ଉପଚାରରେ ପୂଜା ହୋଇଥାଏ।

ନବ ରାତ୍ର ପୂଜା ପାଇଁ ଭୋର୍ ଚାରିଟାରେ ମା ଚର୍ଚ୍ଚିକାଙ୍କର ପହଡ଼ ଖୋଲାଯାଇଥିଲା । ପରେ ମଙ୍ଗଳା ଆଳତୀ ସରିବା ପରେ, ମହାନଦୀରୁ ଶହେ ଆଠ ଗରାରେ ଜଳରେ ମା ଙ୍କୁ ସ୍ନାନ କରାଯାଇଥିଲା । ପ୍ରଥମେ ସୂର୍ଯ୍ୟ ପୂଜା ଏବଂ କଳସ ପୂଜା ଶେଷ ହେବାପରେ ଶେଷରେ ଦ୍ଵାରପାଳଙ୍କୁ ପୂଜା କରାଯାଇ ବଲ୍ଲଭ ଭୋଗ କରାଯାଇଥିଲା । ଏହି ନଅ ଦିନ ମା ଚର୍ଚ୍ଚିକା ଭକ୍ତ ମାନଙ୍କୁ ଦୈନିକ ବିଭିନ୍ନ ବେଶରେ ଦର୍ଶନ ଦେଇଥାନ୍ତି । ମାଆଙ୍କର ଏହି ଦୁର୍ଲ୍ଲଭ ବେଶ ଦେଖିବା ପାଇଁ ବହୁ ଦୂର ଦୁରାନ୍ତରରୁ ଛୁଟି ଆସନ୍ତି ଶ୍ରଦ୍ଧାଳୁ । ନବରାତ୍ରୀ ପୂଜା ପାଇଁ ଦେବୀପୀଠମାନଙ୍କରେ ଅନେକ ଭିଡ ଦେଖିବାକୁ ମିଳିଥାଏ ।

ଅଧିକ ପଢନ୍ତୁ: ଫିକା ପଡ଼ିବ ପାର୍ବଣ, ଭିଜିବ ସାରା ଓଡ଼ିଶା

ଓଡିଶାର ୮ଟି ଶକ୍ତି ପୀଠମାନଙ୍କ ମଧ୍ୟରୁ ବାଙ୍କୀସ୍ଥିତ ମା ଚର୍ଚ୍ଚିକାଙ୍କ ପୀଠ ଅନ୍ୟତମ । ଏ ପୀଠ ଶକ୍ତିପୀଠ ରୂପେ ସାରା ସଂସାରରେ ଖ୍ୟାତି ଅର୍ଜନ କରିଛି। ଏହି ପୀଠ ଚାମୁଣ୍ଡା ପୀଠ ରୂପେ ମଧ୍ୟ ପରିଚିତ। ପୁରାଣ ମତ ଅନୁସାରେ ଏଠାରେ ମହାବୀର ପର୍ଶୁରାମ କଠୋର ତପସ୍ୟା କରିଥିଲେ । ଦଶହରାରେ ଏହି ପୀଠରେ ଷୋଡ଼ଶ ଉପଚାରରେ ମା’ଙ୍କର ପୂଜା କରାଯାଇଥାଏ। ମା’ଙ୍କ ନିକଟରେ ଆମିଷ ଭୋଗ ଲାଗିଥାଏ ।

ଶାସ୍ତ୍ରାନୁସାରେ ମାଆ ପ୍ରଥମେ ଘଟ ରୂପରେ ଚାଚେରୀ ଭୋଗ ପାଉଥିବାରୁ ତାଙ୍କର ନାମ ଚର୍ଚ୍ଚିକା ହୋଇଅଛି ।

Argus News | argus news | Odisha Latest News, Breaking News, Trending News, Live TV