ଆଜି ମହାଶିବରାତ୍ରି । ଏଥିପାଇଁ ପ୍ରକମ୍ପିତ ସମସ୍ତ ଶୈବପୀଠ । ସନାତନ ଧର୍ମରେ ୧୨ ମାସରେ ୧୩ ପର୍ବ ଜାକ ଜକମରେ ପାଳନ କରାଯାଉଥିବା ବେଳେ ମହାଶିବରାତ୍ରି ଏକମାତ୍ର ପର୍ବ ଯାହା ଆତ୍ମନିରୀକ୍ଷଣ, ଭକ୍ତି, ଧ୍ୟାନ, ଉପବାସ ଏବଂ ଆଧ୍ୟାତ୍ମିକ ଜାଗୃତି ଉପରେ କେନ୍ଦ୍ରିତ ଥାଏ । ମହାଶିବରାତ୍ରି ଅବସରରେ ରାଜ୍ୟର ସବୁ ପ୍ରମୁଖ ଶିବାଳୟରେ ଶ୍ରଦ୍ଧାଳୁଙ୍କ ଭିଡ଼ । ଭୁବନେଶ୍ବର ଲିଙ୍ଗରାଜଙ୍କ ପୀଠରେ ରାତି ୧୦ଟାରେ ଉଠିବ ମହାଦୀପ । ସୁରକ୍ଷା ପାଇଁ ୪୧ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି । ସେହିପରି ଭଦ୍ରକ ଆରଡ଼ି ଧାମରୁ ନେଇ ଢେଙ୍କାନାଳ କପିଳାସ ପର୍ଯ୍ୟନ୍ତ, ସବୁଠି ଶୃଙ୍ଖଳିତ ଦର୍ଶନ ପାଇଁ ବ୍ୟାପକ ବନ୍ଦୋବସ୍ତ କରାଯାଇଛି ।

ଲିଙ୍ଗରାଜଙ୍କ ପୀଠରେ ମହାଶିବରାତ୍ରୀରେ ମହାଦୀପ ରାତି ୧୦ଟାରେ ଉଠିବା ପରେ ଚାରି ପ୍ରହର ପୂଜା, ହରିହର ଭେଟ, ବଡ଼ସିଂହାର ଓ ପହୁଡ ସୋମବାର ଭୋର ସାଢେ ୫ଟାରେ ସମ୍ପନ୍ନ ହେବ । ଏ ନେଇ ସ୍ବତନ୍ତ୍ର ବିଜ୍ଞପ୍ତି ମନ୍ଦିର ପ୍ରଶାସନ ଜାରି କରିଛନ୍ତି । ସେଭଳି ଭିଡ଼କୁ ଦୃଷ୍ଟିରେ ରଖି ପୋଲିସ୍‌ ପକ୍ଷରୁ ସ୍ବତନ୍ତ୍ର ରୁଟ୍‌ ଚାର୍ଟ ପ୍ରସ୍ତୁତ କରାଯାଇଛି ।

ସେହପରି ଶ୍ରୀକ୍ଷେତ୍ରରେ ଲୋକନାଥ ଦେବଙ୍କ ଜାଗର ଯାତ୍ରା ସ୍ୱତନ୍ତ୍ର । ମହାପ୍ରଭୁ ଶ୍ରୀ ଜଗନ୍ନାଥଙ୍କ ଭଣ୍ଡାର ରକ୍ଷକ ଭାବେ ପରିଚିତ ବାବା ଲୋକନାଥଙ୍କ ରହିଛି ସ୍ୱତନ୍ତ୍ର ମାହାତ୍ମ୍ୟ । ପୂର୍ବବର୍ଷ ଭଳି ଚଳିତବର୍ଷ ମଧ୍ୟ ପରିମାଣିକ ଟିକେଟ ଦର୍ଶନର ସୁବିଧା ରହିବ । ଜାଗର ଦିନ ରାତ୍ର ୧୨.୩୦ରୁ ପହୁଡ଼ ଓ ଦ୍ବାରଖୋଲା, ରାତ୍ର ୧ ଘଟିକାରୁ ୪ଟା ମଧ୍ୟରେ ମଙ୍ଗଳଆରତୀ, ଅବକାଶ, ସୂର୍ଯ୍ୟ ପୂଜା, ଭୋର ୪ ଟାରୁ ରାତ୍ର ୧୦ ପର୍ଯ୍ୟନ୍ତ ସର୍ବସାଧାରଣ ଦର୍ଶନ, ରାତ୍ର୧୦ ରୁ ରାତ୍ର ୨ ପର୍ଯ୍ୟନ୍ତ ବିଭିନ୍ନ ନୀତି, ରାତ୍ର ୩ ଘଟିକାରୁ ହରିହର ପୂଜା, ଭୋଗ ସମ୍ପନ୍ନ, ବଡ ସିଂହାର ବେଶ ଓ ମହଦୀପ ଉଠିବାର କାର୍ଯ୍ୟକ୍ରମ ରହିଛି । ଭକ୍ତଙ୍କ ଅହେତୁକ ଭିଡକୁ ଦୃଷ୍ଟିରେ ରଖି ସୁରକ୍ଷା ପାଇଁ ୫ ପ୍ଲାଟୁନ ଫୋର୍ସ ଓ ଜଣେ ଅତରିକ୍ତ ଏସପିଙ୍କୁ ଦାୟିତ୍ୱ ଦିଆଯାଇଛି । ଏଥିସହ ବ୍ୟାରିକେଡ ଓ ଲାଇଟର ସଂଖ୍ୟା ମଧ୍ୟ ବଢାଯାଇଛି ।
ପଢନ୍ତୁ ଏହି ଖବର: ମହାଶିବରାତ୍ରିରେ ଚମକିବ ଉଠିବ ଏହି ୩ ରାଶି, ବଦଳିଯବ ଭାଗ୍ୟ