Mahanadi Water Dispute / ‘ଟ୍ରିପଲ୍ ଇଞ୍ଜିନ୍’ ସରକାରରେ ଫିଟିବ ମହାନଦୀ ସମସ୍ୟାର ବାଟ, ଆପୋଷ ବୁଝାମଣାର ସଂକେତ ଦେଲେ ଛତିଶଗଡ଼ ମୁଖ୍ୟମନ୍ତ୍ରୀ

ଓଡ଼ିଶାର ଜୀବନରେଖା ମହାନଦୀ ଜଳ ବିବାଦକୁ ନେଇ ଆଶ୍ୱସ୍ତିକର ଖବର । ଖୁବଶୀଘ୍ର ଆପୋଷ ବୁଝାମଣା ଜରିଆରେ ଏହି ଦୀର୍ଘଦିନିଆ ବିବାଦର ସମାଧାନ ହେବ ବୋଲି ସଙ୍କେତ ଦେଇଛନ୍ତି ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ । ଦୁଇଦିନିଆ ଓଡ଼ିଶା ଗସ୍ତରେ ଆସି ସେ ସ୍ପଷ୍ଟ କରିଛନ୍ତି ଯେ, ମହାନଦୀ ସମସ୍ୟା ଆଉ ବିବାଦ ହୋଇ ରହି ନାହିଁ ଏବଂ ଦିଲ୍ଲୀରେ CWCର ନିଷ୍ପତ୍ତିକୁ ମାନିବାକୁ ଉଭୟ ରାଜ୍ୟ ରାଜି ଅଛନ୍ତି ।

ଅନ୍ୟପଟେ, ପୂର୍ବରୁ ବିଜେଡି ସରକାର ସମୟରେ ଆପୋଷ ଆଲୋଚନାକୁ ଏଡ଼ାଇ ଦିଆଯାଇଥିବା ଅଭିଯୋଗ ଆଣି ଶାସକ ଦଳ ବିରୋଧୀଙ୍କୁ ଟାର୍ଗେଟ୍ କରିଥିବାବେଳେ, ଏହାକୁ ନେଇ ରାଜ୍ୟରେ ଶାସକ ଓ ବିରୋଧୀ ମୁହାଁମୁହିଁ ହୋଇଛନ୍ତି । ଆଗାମୀ ସେପ୍ଟେମ୍ବର ୨୮ ତାରିଖରେ ମହାନଦୀ ଜଳ ବିବାଦ ଟ୍ରିବ୍ୟୁନାଲର ପରବର୍ତ୍ତୀ ଶୁଣାଣି ଥିବାବେଳେ, ଟ୍ରିପଲ୍ ଇଞ୍ଜିନ ସରକାରରେ ଏହାର ସ୍ଥାୟୀ ସମାଧାନ ହେବ ବୋଲି ଆଶା କରାଯାଉଛି ।

ଟ୍ରିପଲ୍ ଇଂଜିନ ସରକାରରେ ମହାନଦୀ ବିବାଦର ସମାଧାନ । ଆଗରୁ ମୋହନ କହୁଥିଲେ.. ଆଜି ବିଷ୍ଣୁ କହିଲେ...ଆପୋଷ ବୁଝାମଣାରେ ବାହାରିବ ମହାନଦୀ ଜଳ ବିବାଦ ସମାଧାନର ବାଟ । ଦୁଇ ଦିନିଆ ଓଡ଼ିଶା ଗସ୍ତରେ ଆସି ଏଭଳି କିଛି ବୟାନ ଦେଇଛନ୍ତି ଛତିଶଗଡ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ । ମହାନଦୀ ଜଳ ସମସ୍ୟା ଆଉ ବିବାଦ ହୋଇ ରହି ନ ଥିବା ବେଳେ ଦିଲ୍ଲୀରେ CWCର ନିଷ୍ପତି ମାନିବାକୁ ଉଭୟ ରାଜ୍ୟ ରାଜି ହୋଇଥିବା କହିଛନ୍ତି ଛତିଶଗଡ ମୁଖ୍ୟମନ୍ତ୍ରୀ ।

ଓଡ଼ିଶାର ଲାଇଫ୍‌ଲାଇନ ମହାନଦୀକୁ ନେଇ ଦୀର୍ଘ ବର୍ଷରୁ ଚାଲିଛି ଆଇନ ଗତ ଲଢେଇ । ୨୦୧୬ରେ ଛତିଶଗଡ଼ର ଉପରମୁଣ୍ଡରେ ପ୍ରକଳ୍ପ ନିର୍ମାଣ ନେଇ ଉଠିଥିଲା ବିବାଦ । ହେଲେ କେନ୍ଦ୍ର ସରକାର ବାରମ୍ବାର ଆପୋଷ ଆଲୋଚନା ପାଇଁ କହିଥିଲେ ବି ନବୀନ ସରକାର ଶୁଣିଲେନି । ଓଲଟା ମହାନଦୀକୁ ନେଇ ରାଜନୀତି କଲେ । ବିଜେଡି ସରକାରଙ୍କ ଜିଦ୍ ଯୋଗୁଁ ୨୦୧୮ରେ ଗଠନ ହେଲା ମହାନଦୀ ୱାଟର୍ ଡିସ୍ପ୍ୟୁଟ୍ସ ଟ୍ରିବ୍ୟୁନାଲ । ଏହାରି ଭିତରେ ଉଭୟ ରାଜ୍ୟର ସରକାର ବଦଳି ଟ୍ରିପୁଲ ଇଂଜିନ ସରକାର ଆସିଛି । ଓଡ଼ିଶା ସରକାର ଆପୋଷ ବୁଝାମଣାରେ ସମାଧାନ ପାଇଁ ଅଣ୍ଟା ଭିଡ଼ିଥିବା ବେଳେ ସେପ୍ଟେମ୍ବର ୨୮ ରେ ମହାନଦୀ ଜଳ ବିବାଦ ମାମଲାର ପରବର୍ତ୍ତୀ ଟ୍ରିବ୍ୟୁନାଲ ଶୁଣାଣି ହେବ । ସେପଟେ ଉଭୟ ରାଜ୍ୟ ମୁଖିଆଙ୍କ ଆଲୋଚନାକୁ ନେଇ ବିରୋଧୀ ସରକାରକୁ ଘେରିଥିବା ବେଳେ ବିଜେପି ରଖିଛି କଡା ଜବାବ ।

୨୦୨୬ ଜୁଲାଇ ୩୦ରେ କେନ୍ଦ୍ରୀୟ ଜଳଶକ୍ତି ମନ୍ତ୍ରୀ ସି.ଆର୍. ପାଟିଲଙ୍କ ଅଧ୍ୟକ୍ଷତାରେ ଓଡ଼ିଶା ଓ ଛତିଶଗଡ଼ ମୁଖ୍ୟମନ୍ତ୍ରୀଙ୍କ ବୈଠକ ହୋଇଥିଲା । କେନ୍ଦ୍ରର ସୂଚନା ଅନୁସାରେ, ଉଭୟ ରାଜ୍ୟ ଆଲୋଚନା, ବୈଷୟିକ ସହଯୋଗ ଓ ସମନ୍ୱୟ ମାଧ୍ୟମରେ ସମାଧାନ ଦିଗରେ ଆଗକୁ ବଢ଼ିବା ନେଇ ଇଚ୍ଛା ପ୍ରକାଶ କରିଥିଲେ । ଆଗକୁ କେବେ ମାମଲା ର ଅନ୍ତ ଘଟୁଛି ତାହା ଉପରେ ନଜର ।