Flood Alert / ଉଛୁଳିବ ମହାନଦୀ, ଜଳାର୍ଣ୍ଣବ ହେବ ତଳିଆ ଅଞ୍ଚଳ…ଖୋର୍ଦ୍ଧା, ପୁରୀ, ଜଗତସିଂହପୁର, କେନ୍ଦ୍ରାପଡ଼ା ଓ କଟକକୁ ହାଇଆଲର୍ଟ

ଚାରିଆଡେ ବନ୍ୟା ବିଭୀଷିକା। ତଳିଆ ଅଞ୍ଚଳରେ ଲୋକେ ଏବେ ଭୟଭୀତ ଅବସ୍ଥାରେ ଅଛନ୍ତି। କେତେବେଳେ ପାଣି ମାଡ଼ି ଆସିବ ତାହାକୁ ନେଇ ଖିଆପିଆ ବନ୍ଦ ହୋଇଗଲାଣି। ମୁଣ୍ଡଳୀରେ ମହାନଦୀ ପାଣି ସାଢେ ୯ ଲକ୍ଷ କ୍ୟୁସେକ୍‌ ଟପିବା ନେଇ ଆଳନ କରିଛି ଜଳସଂପଦ ବିଭାଗ । ଆକଳନ ଅନୁଯାୟୀ ମହାନଦୀରେ ଆସୁଥିବା ଏହି ବନ୍ୟା ଚଳିତ ସିଜିନର ବଡ଼ ବନ୍ୟା । ୨୪ ଘଣ୍ଟାରୁ ଅଧିକ ସମୟ ଧରି ମହାନଦୀର ବନ୍ୟା ପାଣିରେ ଉବୁଟୁବୁ ହେବେ ଏହି ପାଞ୍ଚ ଜିଲ୍ଲାର ତଳିଆ ଅଞ୍ଚଳ ବାସିନ୍ଦା । ହୀରାକୁଦରେ ଏବେ ୨ଟି ଗେଟ୍‌ ଖୋଲା ଅଛି । ଆବଶ୍ୟକ ପଡ଼ିଲେ ୧୦ରୁ ୧୨ ଗେଟ୍‌ ଖୋଲାଯାଇପାରେ ବୋଲି ଜଳସଂପଦ ବିଭାଗର ସୂଚନା ପରେ ଚିନ୍ତା ଆହୁରି ବଢ଼ିଛି। 

ଏହାସହ ପଢ଼ନ୍ତୁ: ଭୀମକୁଣ୍ଡରେ ବୈତରଣୀର କରାଳ ରୂପ, ୱାଚ୍ ଟାୱାର ନିକଟକୁ ପହଞ୍ଚିଲା ବନ୍ୟାଜଳ...ସ୍ଥାନୀୟ ଲୋକେ ଆତଙ୍କିତ

ମହାନଦୀରେ ବନ୍ୟା ଆସିଲେ ଫୁଲି ଉଠିବେ ଏହାର ୧୦ ଶାଖାନଦୀ । ଏହି ନଦୀ ଗୁଡ଼ିକ ହେଲେ କାଠଯୋଡ଼ି, କୁଆଖାଇ, ଦେବୀ, ଦୟା, ଭାର୍ଗବୀ, କୁଶଭଦ୍ରା, ବିରୂପା, ଚିତ୍ରୋତ୍ପଳା, ଲୁଣା ଓ ପାଇକା । ତେବେ କାଠଯୋଡ଼ିରେ ବନ୍ୟା ପାଣି ଆସିଲେ କଟକ, ପୁରୀ ଓ ଜଗତସିଂପୁରର ତଳିଆ ଅଞ୍ଚଳ ପ୍ରଭାବିତ ହେବ। ସେହିପରି କୁଆଖାଇ ଫୁଲିଲେ ଏହାର ବନ୍ୟାପାଣି କଟକ ଓ ଖୋର୍ଦ୍ଧା ଜିଲ୍ଲାରେ ପଶିବ। କେବଳ କୁଆଖାଇ ନୁହେଁ କଟକ ଜଗତସିଂପୁର ଓ ପୁରୀ ଜିଲ୍ଲାରେ କୋପ ଦେଖାଇବ ଦେବୀ ନଦୀ। ଖୋର୍ଦ୍ଧା ଓ ପୁରୀ ଜିଲ୍ଲାରେ ତାଣ୍ଡବ ରଚିବେ ଦୟା, ଭାର୍ଗବୀ ଓ କୁଶଭଦ୍ରା। ସେହିପରି ବିରୂପା, ଚିତ୍ରୋତ୍ପଳା, ଲୁଣା ଓ ପାଇକା ନଦୀ କଟକ, କେନ୍ଦ୍ରାପଡ଼ା ଓ ଜଗତସିଂପୁରରେ ଜନଜୀବନ ବିପନ୍ନ କରିବେ । ମହାନଦୀରେ ବନ୍ୟା ପାଣି ମାଡ଼ି ଆସୁଥିବା ବେଳେ ଏହାର ମୁକାବିଲା ପାଇଁ ପ୍ରଶାସନ ପକ୍ଷରୁ ହୋଇଛି ପ୍ରସ୍ତୁତି । ପ୍ରଭାବିତ ହେବାକୁ ଥିବା ଅଞ୍ଚଳରେ NDRF ଓ ଓଡ୍ରାଫ ଟିମ ମୁତୟନ କରାଯାଇଛି ।

ମୁଣ୍ଡଳୀରେ ବନ୍ୟାପାଣି 8 ଲକ୍ଷ କ୍ୟୁସେକ ପାର କରିଥିବା ବେଳେ ତଳିଆ ଅଞ୍ଚଳ ଜଳମଗ୍ନ ହେବା ଆରମ୍ଭ ହୋଇଛି। ବଡ଼ମ୍ବା, ବାଙ୍କୀ, ତିଗିରିଆ, ତିର୍ତ୍ତୋଲ, ନିଆଳି, କଣାସ ଆଦି ଅଞ୍ଚଳରେ ବନ୍ୟାପାଣି ପଶିବାରୁ ଜୀବନଯାତ୍ରା ପ୍ରଭାବିତ ହୋଇଛି ।
ଆଗାମୀ ୨୪ଘଣ୍ଟା ମହାନଦୀ ଅବବାହିକାରେ ଥିବା ଅଞ୍ଚଳ ପାଇଁ ସତର୍କ ଘଣ୍ଟି। ବନ୍ୟାପାଣି ପଶିବା ପୂର୍ବରୁ ସୁରକ୍ଷିତ ସ୍ଥାନକୁ ପଳାଇବାକୁ ପ୍ରଶାସନ ପକ୍ଷରୁ କରାଯାଉଛି ସଚେତନ।