Bhimkund Watch Tower / ଭୀମକୁଣ୍ଡରେ ବୈତରଣୀର କରାଳ ରୂପ, ୱାଚ୍ ଟାୱାର ନିକଟକୁ ପହଞ୍ଚିଲା ବନ୍ୟାଜଳ

କେନ୍ଦୁଝର: ଲଗାଣ ବର୍ଷା ପ୍ରଭାବରେ କେନ୍ଦୁଝର ଜିଲ୍ଲାର ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ଭୀମକୁଣ୍ଡଠାରେ ବୈତରଣୀ ନଦୀ ତାହାର କରାଳ ରୂପ ଦେଖାଇଛି । ନଦୀର ଜଳସ୍ତର ଦ୍ରୁତଗତିରେ ବୃଦ୍ଧି ପାଇଥିବା ବେଳେ ପ୍ରଚଣ୍ଡ ବେଗ ଓ ଘୋଘୋ ଗର୍ଜନ ସହ ପାଣି ପ୍ରବାହିତ ହେଉଛି । ବନ୍ୟାଜଳ ଭୀମକୁଣ୍ଡ ସ୍ଥିତ ୱାଚ୍ ଟାୱାର ନିକଟ ପର୍ଯ୍ୟନ୍ତ ପହଞ୍ଚିଥିବାରୁ ଅଞ୍ଚଳରେ ଚିନ୍ତାର ପରିବେଶ ସୃଷ୍ଟି ହୋଇଛି । ନଦୀର ଏହି ଭୟଙ୍କର ରୂପ ଦେଖିବାକୁ ବହୁ ଲୋକ ଭିଡ଼ ଜମାଇଛନ୍ତି ।

ସେପଟେ ପ୍ରଶାସନ ପକ୍ଷରୁ ସତର୍କତା ଅବଲମ୍ବନ କରିବା ସହ ନଦୀ କୂଳ ଓ ବିପଦସଙ୍କୁଳ ସ୍ଥାନକୁ ନଯିବାକୁ ପରାମର୍ଶ ଦିଆଯାଇଛି । ବର୍ଷା କମିବା କାରଣରୁ ଏବେ ଜଳସ୍ତର ଧିରେ ଧିରେ କମିବାରେ ଲାଗିଛି । ତଥାପି ନଦୀର ସ୍ରୋତ ଏବେ ମଧ୍ୟ ପ୍ରଖର ରହିଥିବାରୁ ପର୍ଯ୍ୟଟକ ଓ ସ୍ଥାନୀୟ ଲୋକଙ୍କୁ ନଦୀ କୂଳକୁ ନଯିବା ଏବଂ ସତର୍କତା ଅବଲମ୍ବନ କରିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି । ଭୀମକୁଣ୍ଡର ଚାରିପାଖ ଜଳମଗ୍ନ ହୋଇଛି । ଯୁଆଡେ ଦେଖିଲେ ନଦୀର ପ୍ରଖର ସ୍ରୋତ ଭୟଭୀତ କରାଉଛି ।

• ଭାଙ୍ଗିଲା କପର୍ ଡ୍ୟାମ୍

ଭାଙ୍ଗିଲା ଯୋଡ଼ା ବ୍ଲକ୍ ବାସୁଦେବପୁର ଠାରେ ନିର୍ମାଣାଧୀନ କାନୁପୁର ବୃହତ୍ ଜଳସେଚନ ପ୍ରକଳ୍ପର କପର୍ ଡ୍ୟାମ୍ । ଆଜି ସକାଳ ପ୍ରାୟ ୭ଟା ୩୦ ମିନିଟ୍ ସମୟରେ ମାଟି ବନ୍ଧ ବା କପର୍ ଡ୍ୟାମ୍ ଭାଙ୍ଗିବା ପରେ ଖୋଲାଗଲା ମୁଖ୍ୟ ଡ୍ୟାମର ୬ଟି ରେଡିୟାଲ ଏବଂ ୨ ଟି ଡିପ୍ଲିସନ୍ ସ୍କୁଇସ୍ ଗେଟ୍ । ଡ୍ୟାମ୍ ଅଞ୍ଚଳରେ ସତର୍କ ସାଇରନ୍ ବାଜିବା ସହ ଲୋକଙ୍କୁ ପାଖକୁ ନଯିବା ପାଇଁ ପରାମର୍ଶ ଦିଆଯାଇଛି । ଘଟଣା ସ୍ଥଳରେ ପୋଲିସ୍ ପ୍ରଶାସନ ଜଗି ରହିଛନ୍ତି ।

• କମୁଛି ବୈତରଣୀ ନଦୀର ଜଳସ୍ତର

ଆନନ୍ଦପୁର ରାଜଘାଟଠାରେ ବୈତରଣୀ ନଦୀର ଜଳସ୍ତର ୩୬.୫୪୦ ମିଟର ଥିବାବେଳେ ଏହା ସତର୍କ ସଙ୍କେତ ତଳେ ପ୍ରବାହିତ ହେଉଛି । ଆଉ ଏପଟେ ବଢ଼ିବାରେ ଲାଗିଛି ତଳି ଅଞ୍ଚଳର ଦୁଃଖ । ଆନନ୍ଦପୁର ବ୍ଲକ ହରିଡ଼ାପାଳ ପଞ୍ଚାୟତର ପାଇକଚାଟ୍ରା ଓ ହରିଡ଼ାପାଳ ଗାଁର ଶତାଧିକ ପରିବାର ଏବେ ଜଳବନ୍ଦୀ ଅବସ୍ଥାରେ ଅଛନ୍ତି । ସେପଟେ ହାଟଡିହି ବ୍ଲକର ହେକ୍ଟର ହେକ୍ଟର ଚାଷଜମିରେ ବନ୍ୟାଜଳ ପଶି ଧାନଚାଷକୁ ନଷ୍ଟ କରିଛି । 

ପଢନ୍ତୁ ଏହି ଖବର: ମହାନଦୀରେ ଆସିଛି ମଧ୍ୟମ ଧରଣର ବନ୍ୟା, ତଳିଆ ଅଞ୍ଚଳରେ ପଶିଲା ପାଣି

ଅନ୍ୟପଟେ ଆସନ୍ତା ୨୪ ଘଣ୍ଟାରେ କେନ୍ଦୁଝରରେ ହାଲୁକାରୁ ମଧ୍ୟମ ଧରଣର ବର୍ଷା ସହ ୩୦ରୁ ୪୦ କିମି ଝଟକା ପବନର ସମ୍ଭାବନାକୁ ନେଇ ୟେଲୋ ୱାର୍ଣ୍ଣିଂ ଜାରି କରାଯାଇଛି । ଜୁଲାଇ ୧ ଯାଏ ବର୍ଷାର ପରିମାଣ କମ ରହିବା ସହ ପୁଣି ୨ ତାରିଖରୁ ପ୍ରବଳ ବର୍ଷା ସମ୍ଭାବନା ଥିବା ବେଳେ ୫ ତାରିଖ ଯାଏଁ ରାଜ୍ୟରେ ବର୍ଷା ଲାଗି ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ ବିଭାଗ ।