ଅର୍ଗସ ବ୍ୟୁରୋ: ପୁଣି ବିବାଦରେ କାମାକ୍ଷ୍ୟାନଗରର ପୂର୍ବତନ ବିଧାୟକ ତଥା ନବୀନ ସରକାରରେ ପାୱାରଫୁଲ୍ ମନ୍ତ୍ରୀ ଥିବା ପ୍ରଫୁଲ ମଲ୍ଲିକ । କାମାକ୍ଷ୍ୟାନଗରରେ ନିର୍ମାଣ ହୋଇଥିବା ମହାତ୍ମା ଗାନ୍ଧୀ ଔଷଧୀୟ ଅରଣ୍ୟକୁ ନେଇ ପ୍ରଫୁଲ ମଲ୍ଲିକଙ୍କ ଭୂମିକାକୁ ନେଇ ପ୍ରଶ୍ନ ଉଠିବା ପରେ ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ନବାଗତ  ବିଜେପି ବିଧାୟକ ଶତୃଘ୍ନ ଜେନା । ଶତୃଘ୍ନ କହିଛନ୍ତି ଯାଜପୁର ଜିଲ୍ଲା ଧର୍ମଶାଳାର ବଲେବଲେ ଢାବା ଓ କୁସୁମା କେଳେଙ୍କାରୀ ପରେ ବିବାଦକୁ ଆସିଥିଲା ଢ଼େଙ୍କାନାଳର ମହାତ୍ମା ଗାନ୍ଧୀ ଔଷଧୀୟ ଅରଣ୍ୟ । ମହାତ୍ମା ଗାନ୍ଧୀ ଔଷଧୀୟ ଅରଣ୍ୟ ନାଁରେ କୋଟି କୋଟି ଟଙ୍କା ଆତ୍ମସାତ ହୋଇଥିବା ଅଭିଯୋଗ ହୋଇଛି।

ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେଡି ନେତା ପ୍ରଫୁଲ୍ଲ ମଲିକଙ୍କ ନାମରେ ସାଙ୍ଘାତିକ ଅଭିଯୋଗ ଆଣିଛନ୍ତି ସ୍ଥାନୀୟ ଅଞ୍ଚଳବାସୀ । ପାଖାପାଖି ୧୨ଟି କମ୍ପାନୀର କୋଟି କୋଟି ଟଙ୍କା ଏଥିରେ ଲାଗିଥିବା ଅଭିଯୋଗ । ଡିଏଏମଏଫ, ସିଏସଆର ପାଣ୍ଠିରୁ ପାଣି ଭଳିଆ ଟଙ୍କା ଖର୍ଚ ହୋଇଥିବା ଅଭିଯୋଗ । ଢ଼େଙ୍କାନାଳ କାମାକ୍ଷାନଗର ବ୍ଲକ ଶୋଗର ଠାରେ ଔଷଧୀୟ ଅରଣ୍ୟ ପାଖାପାଖି ୭୦୦ ଏକର ପରିମିତ ଅଂଚଳରେ ନିର୍ମିତ ହୋଇଛି । ଔଷଧୀୟ ଗଛ ଲାଗିଛି । ପାର୍କ ତିଆରି ହୋଇଛି । ଗେଷ୍ଟ ହାଉସ ଠାରୁ ଆରମ୍ଭ କରି ଶୁଇମିଂ ପୁଲ ଆଦି ସବୁ ହୋଇଛି । ହେଲେ ଏଠାରେ କେତେ ଟଙ୍କା ଖର୍ଚ ହୋଇଛି ତାର କୌଣସି ହିସାବ କାହା ପାଖରେ ନାହିଁ । ଆଉ ଯାହାକୁ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।

ଏହି ଘଟଣା ପରେ ମୁହଁ ଖୋଲିଛନ୍ତି ପୂର୍ବତନ ମନ୍ତ୍ରୀ ପ୍ରଫୁଲ ମଲ୍ଲିକ । ଆଉ ଏହାର ନିର୍ମାଣରେ କୌଣସି ଅନିୟମିତତା ହୋଇନଥିବା କଥା କହିଛନ୍ତି ।
ମହାତ୍ମା ଗାନ୍ଧୀ ଔଷଧୀୟ ଅରଣ୍ୟରେ ମନଇଚ୍ଛା କରାଯାଇଛି କାମ । ମାଙ୍କଡ଼ା ପଥର କାଟି ସେଇଠି ନିର୍ମାଣ ହୋଇଛି ବିଲଡିଂ ଓ ପାଚେରୀ । ପଥର ଖଣି ଗୁଡିକୁ ସୁଇମିଙ୍ଗ ପୂଲରେ ପରିବର୍ତ୍ତନ କରାଯାଉଛି । ଗାଈ ଗୁହାଳ ବାବଦକୁ ଆସିଥିବା ୩ଲକ୍ଷ ୫୦ ହଜାର ଟଙ୍କାରେ କାଫେ ନିର୍ମାଣ କରାଯାଇଥିବା ଅଭିଯୋଗ । ଔଷଧୀୟ ଅରଣ୍ୟ ନିର୍ମିତ ହୋଇଥିବା ଜାଗା କେଉଁ କିସମର ତାକୁ ନେଇ ପ୍ରଶ୍ନ ଉଠିଛି।

ଅଧିକ ପଢ଼ନ୍ତୁ ଓଡ଼ିଶା ଖବର