ଆଇନଜୀବୀ ପୀତବାସ ପଣ୍ଡା ହତ୍ୟା ଘଟଣା । ସାମ୍ନାକୁ ଆସିଲା ମୁଖ୍ୟ ସାର୍ପସୁଟର୍ କୁରୁପତି ଭୂୟାଁ ଏବଂ ଉମା ବିଷୋୟୀର ଫଟୋ । କୁରୁପତି ହିଁ ପୀତବାସଙ୍କୁ ଜିରୋ ପଏଣ୍ଟରୁ ଗୁଳି ମାରିଥିଲା । ଉମା ବିଷୋୟୀ ଏହି ସୁଟରକୁ ଯୋଗାଡ଼ କରିଥିଲା । ଦୁହେଁ ଫେରାର ଥିବାବେଳେ ପୋଲିସ ଉଭୟଙ୍କୁ ଧରିବା ପାଇଁ ରାଜ୍ୟ ବାହାରେ ପୁରା ନେଟୱାର୍କ ଲଗାଇଛି । ପୂର୍ବରୁ ପୀତବାସ ପଣ୍ଡା ଗୁଳିକାଣ୍ଡରେ ୧୩ ଅଭିଯୁକ୍ତ ଗିରଫ ହୋଇଥିବାବେଳେ କୁରୁପତି ଏବଂ ଉମା ଫେରାର ଅଛନ୍ତି । ଉମା ସୁପାରୀ ପାଇବା ସହ ଯୋଗାଡ଼ କରିଥିଲା ସାର୍ପ ସୁଟର୍ । ଗୁଳି ମାରିଥିବା କୁରୁପତି ଫେରାର ଥିବାବେଳେ ବାଇକ୍ ଚାଳକ ଚିଣ୍ଟୁ ଗିରଫ ହୋଇସାରିଛି ।

ଯୋଜନା ଅନୁସାରେ, ସେପ୍ଟେମ୍ବର ୧୦ରେ ବିହାରରୁ ଦୁଇ ସାର୍ପ ସୁଟର ବ୍ରହ୍ମପୁର ଆସି ରେକି କରନ୍ତି । ସେପ୍ଟେମ୍ବର ୧୪ ତାରିଖରେ ହତ୍ୟା ପାଇଁ ଷଡ଼ଯନ୍ତ୍ର ବି ହୁଏ । ହେଲେ ବିହାରରୁ ଆସିଥିବା ଅପରାଧୀ ବ୍ୟକ୍ତିଗତ ସମସ୍ୟା ଯୋଗୁଁ ଫେରି ପଳାନ୍ତି । ଏହା ପରେ ଉମା ବିଷୋୟୀ ସ୍ଥାନୀୟ ଅପରାଧୀଙ୍କୁ ଏଥିରେ ନିୟୋଜିତ କରିଥିଲେ ।

ଏଥିସହ ପଢ଼ନ୍ତୁ: ଏଯାଏଁ ଧରାପଡ଼ି ନାହାନ୍ତି ଦୁଇ କିଲର୍ ! ସେମାନଙ୍କୁ କିଏ ଦେଇଛି ଆଶ୍ରୟ ?

ବେଙ୍ଗାଲୁରୁରେ କାମ କରୁଥିବା ଚିଣ୍ଟୁ ପ୍ରଧାନ ସହ କୁରୁପତି ଭୂୟାଁଙ୍କୁ ସୁପାରି ଦେଇଥିଲେ ଉମା ବିଷୋୟୀ । ସେମାନଙ୍କୁ ୮ ଲକ୍ଷ ଟଙ୍କାର ସୁପାରି ଦିଆଯାଇଥିଲା । ଗୁଳି କରିବାକୁ ୫ ଲକ୍ଷ ଓ ବାଇକ୍ ଚାଳକଙ୍କୁ ୩ ଲକ୍ଷ ଟଙ୍କା ଦେଇଥିଲେ । ଉଭୟଙ୍କୁ ପୀତବାସଙ୍କ ଚ୍ୟାମ୍ବର ନିକଟରେ ଏକ ଘରେ ରଖିଥିଲେ । ଅକ୍ଟୋବର ୬ ତାରିଖରେ ପୀତାମ୍ବରଙ୍କ ଘର ଛକ ପାଖରେ ଗାଡ଼ି ରଖି ଚିଣ୍ଟୁ ଓ କୁରୁପତି ଛକି ରହିଥିଲେ । ପୀତବାସ ଆସିବାରୁ ତାଙ୍କ ନମସ୍କାର କରି ସେ ବୋଲି ସ୍ପଷ୍ଟ ହେବା ପରେ ଗୁଳି କରିଥିଲେ କୁରୁପତି ।

କେମିତି ଫେରାର୍ ହେଲେ ?
ଫାୟାରିଂ ପରେ ଚିଣ୍ଟୁ ବାଇକ୍ ଚଳାଇବା ସହ କୁରୁପତି ବସି ଖସି ପଳାଇଥିଲେ । ଦୁହେଁ ସେଠାରୁ ଖସିଯିବା ସହ ଶୀତଳାପଲ୍ଲୀରେ ପୋଷାକ ବଦଳାଇବା ସହ ସେଠାରେ ବନ୍ଧୁକ ପୋତି ପୁରୁଷୋତ୍ତମପୁର ଦେଇ ପଳାଇଥିଲେ । ରାମେଶ୍ଵର ନିକଟରେ ବାଇକ୍ ରଖି ଦେଇ ବସ୍ ଯୋଗେ ଭୁବନେଶ୍ଵର ଆଉ ସେଠାରୁ ପୁରୀ ଖସି ଯାଇଥିଲେ । ହତ୍ୟା ପୂର୍ବରୁ ସମସ୍ତେ ମୋବାଇଲ୍ ବ୍ୟବହାର ଛାଡ଼ି ଦେଇଥିଲେ । ପୁରୀରୁ ଚିଣ୍ଟୁ ବେଙ୍ଗାଲୁରୁ ପଳାଇଥିବା ବେଳେ କୁରୁପତି ଜୟପୁର ଯାଇଥିଲେ । ହତ୍ୟା ବାବଦରେ ଜାଣିବା ପରେ ମଧ୍ୟ ବିକ୍ରମ ପଣ୍ଡାଙ୍କ ଜଣେ ସହଯୋଗୀ ସୁନୀଲ ହୋତା କୁରୁପତିଙ୍କୁ ଆଶ୍ରୟ ଦେଇଥିଲେ ।

ହତ୍ୟା ପାଇଁ ୫୦ ଲକ୍ଷର ଡିଲ୍
ହତ୍ୟା ପାଇଁ ୫୦ ଲକ୍ଷ ଟଙ୍କାର ଡିଲ୍ ହୋଇଥିବା ବେଳେ ଅଗ୍ରୀମ ଭାବେ ୧୦ ଲକ୍ଷ ଟଙ୍କା ଦେଇଥିବା ଜଣାପଡ଼ିଛି । ହତ୍ୟା ପଛରେ ରାଜନୈତିକ ଶତ୍ରୁତା ଥିବା ପୋଲିସ କହିଛି । ମାମଲାରେ ବ୍ରହ୍ମପୁର ପୋଲିସ ମୋଟ ୧୨ ଜଣଙ୍କୁ ଗିରଫ କରିଛି । ଏବେ ୩ ଜଣ ଫେରାର୍ ରହିଥିବା କହିଛନ୍ତି ବ୍ରହ୍ମପୁର ଏସ୍‌ପି ।

ଏଥିସହ ପଢ଼ନ୍ତୁ: କେମିତି ଥିଲା ଉଭୟଙ୍କ ବନ୍ଧୁତା, ଆଉ କାହିଁକି ସାଜିଲେ ସବୁଠୁ ବଡ଼ ଶତ୍ରୁ ? ଜାଣିବା ପାଇଁ ପଢ଼ନ୍ତୁ...

ବ୍ୟକ୍ତିଗତରୁ ବ୍ୟବସାୟିକ ବିବାଦ
ପୂର୍ବରୁ ବିକ୍ରମ ପଣ୍ଡାଙ୍କ ସହ ପୀତବାସଙ୍କ ବ୍ୟକ୍ତିଗତ ବିବାଦ ଲାଗି ରହିଥିବା ବେଳେ ବ୍ୟବସାୟିକ ବିବାଦ ବି ବଢ଼ିଥିଲା । ସୁଦର୍ଶନ ଜେନା, ମଦନ ଦଳେଇ ଓ ବିକ୍ରମ ପଣ୍ଡା ବିଭିନ୍ନ ବ୍ୟବସାୟ କରନ୍ତି । ଆଉ ସେମାନଙ୍କ ବ୍ୟବସାୟରେ କ୍ଷତି ପାଇଁ ସୁଦର୍ଶନ ଓ ମଦନ ଭାବୁଥିଲେ, ପୀତବାସଙ୍କ ପାଇଁ କ୍ଷତି ହେଉଛି । ଅନ୍ୟପଟେ ପୀତବାସ ମଧ୍ୟ ସୁଦର୍ଶନ ଓ ମଦନ କରୁଥିବା ସନ୍ଦେହକୁ ବିଭିନ୍ନ ଲୋକଙ୍କ ମାଧ୍ୟମରେ ଦୃଢ଼ୀଭୂତ କରୁଥିଲେ ।

ପୀତବାସଙ୍କ ହତ୍ୟା ମାମଲାରେ ପୋଲିସ ବିକ୍ରମ ପଣ୍ଡାଙ୍କୁ ଗିରଫ କରିଛି । ହତ୍ୟା ପାଇଁ ଅପରାଧିକ ଷଡ଼ଯନ୍ତ୍ରରେ ବିକ୍ରମ ପଣ୍ଡାଙ୍କ ବିରୋଧରେ ବୈଷୟିକ ପ୍ରମାଣ (Technical Evidence) ପୋଲିସକୁ ମିଳିଛି । ଏଥିସହ ପୋଲିସ ଗୋଟିଏ ଦେଶୀ ବନ୍ଧୁକ ସହ ଆଉ ଏକ ବନ୍ଧୁକ ଜବତ କରିଛି । ୧୨ ଜଣ ଗିରଫ ହୋଇଥିବା ବେଳେ ୩ ଜଣ ଫେରାର୍ ଅଛନ୍ତି । ଅନ୍ୟତମ ଅଭିଯୁକ୍ତ ଉମା ବିଷୋୟୀ ଧରାପଡ଼ି ନାହିଁ । ଫେରାର୍ ଅଭିଯୁକ୍ତମାନେ ଗିରଫ ହେବା ପରେ ଘଟଣାର ଅନ୍ୟ ଦିଗ ଉପରୁ ପରଦା ହଟିବ ବୋଲି ବ୍ରହ୍ମପୁର ଏସ୍‌ପି କହିଛନ୍ତି ।