Malkangiri to KBC / 'କୌନ୍ ବନେଗା କରୋଡପତି' ମଞ୍ଚରେ ଚମକିଲେ ମାଲକାନଗିରିର ଝିଅ ଜୟନ୍ତୀ

ମାଲକାନଗିରି: ମାଲକାନଗିରିର 'ଜଙ୍ଗଲ ରାଣୀ' ଜୟନ୍ତୀ ବୁରୁଦାଙ୍କୁ ବଡ଼ ସଫଳତା ମିଳିଛି । ଦୁର୍ଗମ ମାଲକାନଗିରିର ଜଙ୍ଗଲ, ପାହାଡ଼ ଓ ଆଦିବାସୀ ଜୀବନରୁ ଜାତୀୟ ଟେଲିଭିଜନ୍ ମଞ୍ଚ ପର୍ଯ୍ୟନ୍ତ ଯାତ୍ରା କରିଛନ୍ତି । ଅସାଧାରଣ ସାହସ, ପ୍ରତିଭା ଓ ଜ୍ଞାନ ବଳରେ ମାଲକାନଗିରିର 'ଜଙ୍ଗଲ ରାଣୀ' ଭାବେ ପରିଚିତ ଜୟନ୍ତୀ ବୁରୁଦା ଏବେ ସାରା ଦେଶର ଦୃଷ୍ଟି ଆକର୍ଷଣ କରିଛନ୍ତି ।

ଲୋକପ୍ରିୟ ଟେଲିଭିଜନ୍ କୁଇଜ୍ ଶୋ 'କୌନ୍ ବନେଗା କରୋଡପତି' (KBC) ମଞ୍ଚରେ ପହଞ୍ଚି ମାଲକାନଗିରିର ନାଁକୁ ଜାତୀୟ ସ୍ତରରେ ପରିଚିତ କରାଇଛନ୍ତି ଜୟନ୍ତୀ । ଦେଶର ବିଭିନ୍ନ ପ୍ରାନ୍ତରୁ ଚୟନ ହୋଇଥିବା ୧୦ ଜଣ ପ୍ରତିଯୋଗୀଙ୍କ ମଧ୍ୟରେ ଜୟନ୍ତୀ ସ୍ଥାନ ପାଇବା ଏକ ବଡ଼ ସଫଳତା ।

KBC ମଞ୍ଚରେ ଅମିତାଭ ବଚ୍ଚନଙ୍କ ସହ ସାକ୍ଷାତ କରିବାର ସୁଯୋଗ ପାଇଛନ୍ତି ଜୟନ୍ତୀ । ଯଦିଓ ସେ ଶେଷ ପର୍ଯ୍ୟାୟର ବାଧା ଅତିକ୍ରମ କରି ହଟ୍ ସିଟ୍‌ରେ ପହଞ୍ଚି ପାରି ନାହାନ୍ତି । ତଥାପି ମାଲକାନଗିରିରୁ KBC ପର୍ଯ୍ୟନ୍ତ ତାଙ୍କର ଏହି ଯାତ୍ରା ଜିଲ୍ଲାବାସୀଙ୍କ ପାଇଁ ଗର୍ବର ବିଷୟ ପାଲଟିଛି ।

ଏଥିସହ ପଢ଼ନ୍ତୁ: ୧୧ ବର୍ଷ ପରେ ଢେପାଗୁଡ଼ା ଗାଁରେ ପୁଣି ଦବିଲା ମାଟି; ଗାଁ ତଳେ ଅଛି ସୁଡ଼ଙ୍ଗ ! 

ଜୟନ୍ତୀଙ୍କ ଏହି ସଫଳତା କେବଳ ଜଣେ ପ୍ରତିଯୋଗୀଙ୍କ ସଫଳତା ନୁହେଁ । ବରଂ ଦୁର୍ଗମ ଓ ଆଦିବାସୀ ଅଞ୍ଚଳର ଯୁବପିଢ଼ିଙ୍କ ସ୍ୱପ୍ନ ଓ ସାମର୍ଥ୍ୟର ଏକ ବଡ଼ ଉଦାହରଣ । ଯେଉଁ ମାଲକାନଗିରିକୁ ଅନେକ ସମୟରେ ପଛୁଆ ଓ ଦୁର୍ଗମ ଜିଲ୍ଲା ଭାବେ ଦେଖାଯାଏ, ସେହି ମାଟିର ଜଣେ ଝିଅ ଦେଶର ସବୁଠାରୁ ଲୋକପ୍ରିୟ କୁଇଜ୍ ଶୋ’ର ମଞ୍ଚରେ ପହଞ୍ଚିବା ଏକ ନୂଆ ପରିଚୟ ସୃଷ୍ଟି କରିଛି ।

ଜୟନ୍ତୀ ନିଜେ ମଧ୍ୟ ଏହି ଅନୁଭୂତିକୁ ଜୀବନର ଏକ ଅଭୁଲା ସ୍ମୃତି ବୋଲି କହିଛନ୍ତି । ଆଗାମୀ ଦିନରେ ପୁଣି ସୁଯୋଗ ମିଳିଲେ KBCର ହଟ୍ ସିଟ୍‌ରେ ବସିବା ତାଙ୍କର ଲକ୍ଷ୍ୟ ବୋଲି ସେ ଆଶା ପ୍ରକାଶ କରିଛନ୍ତି ।

ମାଲକାନଗିରିର ଜଙ୍ଗଲରୁ KBCର ଆଲୋକିତ ମଞ୍ଚ ପର୍ଯ୍ୟନ୍ତ ଜୟନ୍ତୀ ବୁରୁଡାଙ୍କ ଯାତ୍ରା ଆଜି ଅନେକ ଯୁବକ-ଯୁବତୀଙ୍କ ପାଇଁ ପ୍ରେରଣା ପାଲଟିଛି । ଜୟନ୍ତୀ ବୁରୁଦା କହିଛନ୍ତି, "ଅମିତାଭ ବଚ୍ଚନଙ୍କୁ ଭେଟିଲି । ଏହା ମୋ ପାଇଁ ଗର୍ବ ଗୌରବର ବିଷୟ । ଆଶା ଥିଲା ହଟ୍ ସିଟ୍‌ରେ ବସି ଜିଲ୍ଲାର ନାଁ ରଖିବି । ଆଗକୁ ହଟ୍ ସିଟ୍‌ରେ ବସିବାର ଆଶା ରହିଛି ।"