ସୁନ୍ଦରଗଡ: ବରଗଡ ଅମ୍ବାଭୋନା ଥାନା ଭଙ୍ଗାରୁଜା ପ୍ରସଙ୍ଗରେ ବର୍ଷିଲେ ରାଜ୍ୟ ବିଜେପି ସଭାପତି ମନମୋହନ ସାମଲ । ବିଜେଡି ବିଧାୟକ ସୁଶାନ୍ତ ସିଂଙ୍କ ଗିରଫ ଦାବି କଲେ ମନମୋହନ ସାମଲ । ସେ କହିଛନ୍ତି, ସୁନ୍ଦରଗଡ଼ ଗସ୍ତ ସମୟରେ ଲୋକଙ୍କ ଆକ୍ରୋଶ ଦେଖିଲା ବିଜେପି ଟିମ୍ । ଅପରାଧ କରିବା ସହ ଅପରାଧୀଙ୍କୁ ଘଣ୍ଟ ଘୋଡାଯାଉଥିବା ଅଭିଯୋଗ କରିଛନ୍ତି ମନମୋହନ ସାମଲ ।

ପିକନିକ୍ ନାଁରେ ସେଠାରେ ନିଶା କାରବାର ଚାଲିଥିବା ଖବର ଥିଲା । ଖବର ପାଇ ପୋଲିସ ସେଠାରେ ପହଞ୍ଚିଖିଲା, ଯାଞ୍ଚ କରିଥିଲା । ସୁଶାନ୍ତ ସିଂହ ସେଠାରେ ପହଞ୍ଚିଥିଲେ, ସମର୍ଥକମାନଙ୍କୁ ଡାକିଥିଲେ । ସମସ୍ତଙ୍କୁ ଡାକିବା ପରେ ଥାନାରେ ଭଙ୍ଗାରୁଜା କରାଯାଇଥିଲା । ସୁଶାନ୍ତ ସିଂ ସ୍ପଟ୍ ରେ ଥିଲେ, ତେଣୁ ତାଙ୍କୁ ଗିରଫ କରାଯାଉ ବୋଲି କହିଛନ୍ତି ମନମୋହନ ସାମଲ ।

ଏହାସହ ମନମୋହନ ସାମଲ କହିଛନ୍ତି, ପୋଲିସ ଚଢ଼ାଉ କରିବାରୁ ଥାନା ଭଙ୍ଗାରୁଜା କରିଛନ୍ତି ଅସାମାଜିକ ତତ୍ତ୍ବ । ସେମାନେ କହିଛନ୍ତି ଯେ ଆମେ ସୁଶାନ୍ତ ସିଂଙ୍କ ପିଲା । ଭଙ୍ଗାରୁଜା ଘଟଣା ପରେ ସୁଶାନ୍ତ ସିଂ ସେମାନଙ୍କ ସହ କଥା ହୋଇଛନ୍ତି । ନିଜେ ସୁଶାନ୍ତ ସିଂ ସେମାନଙ୍କୁ ଡାକିଛନ୍ତି, ସ୍ପଟରେ ବି ଥିଲେ । ଗଣ୍ଡଗୋଳକୁ ମନିଟରିଂ କରିଛନ୍ତି, ଥାନା ଭାଙ୍ଗିବାକୁ ଉସୁକେଇଛନ୍ତି ।
ତେଣୁ ତୁରନ୍ତ ପୂର୍ବତନ ମନ୍ତ୍ରୀଙ୍କୁ ଏହି ଘଟଣାରେ ଗିରଫ କରାଯାଉ ବୋଲି କହିଛନ୍ତି ରାଜ୍ୟ ବିଜେପି ସଭାପତି ।

ଗତକାଲି (ରବିବାର) ବରଗଡ ଜିଲ୍ଲା ଅମ୍ବାଭୋନା ଥାନା ଭିତରେ ପଶି କିଛି ଦୂର୍ବୃତ୍ତ ଭଙ୍ଗାରୁଜା କରିଥିଲେ । 20ରୁ ଅଧିକ ଯୁବକ ଥାନା ଭିତରେ ପଶି ହଙ୍ଗାମା କରିଥିଲେ । ଏହି ଘଟଣାରେ 100ରୁ ଅଧିକ ଲୋକଙ୍କ ସମ୍ପୃକ୍ତି ରହିଛି । ସିସିଟିଭି ଆଧାରରେ ମାମଲା ରୁଜୁ କରିଛି ପୋଲିସ । ତଦନ୍ତ ଚାଲିଛି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବରଗଡ ଏସପି ପ୍ରହଲ୍ଲାଦ ସାହାଇ ମିନା ସୂଚନା ଦେଇଛନ୍ତି ।

ଆହୁରି ପଢନ୍ତୁ ଓଡିଶା ଖବର...

Argus News | argus news | Odisha Latest News, Breaking News, Trending News, Live TV