ଅର୍ଗସ ବ୍ୟୁରୋ: କେନ୍ଦୁଝର ଜିଲ୍ଲାର ଆଦିବାସୀବହୁଳ ବାଂଶପାଳ ବ୍ଲକର ତରମାକାନ୍ତ ପଞ୍ଚାୟତ । ପୂର୍ବରୁ ଏଠାରେ ଥିବା ଚା ବଗିଚାରେ ପ୍ରସ୍ତାବିତ ଷ୍ଟିଲ୍ ପ୍ଲାଣ୍ଟ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଏଠାରେ ଷ୍ଟିଲ୍ ପ୍ଲାଣ୍ଟ ପାଇଁ ପର୍ଯ୍ୟାପ୍ତ ସରକାରୀ ଜାଗା ରହିଛି । ଏହାର ଚାରିପାଖରେ ବୈତରଣୀ, ରାଣୀମା, ଜଲପା ଓ ବଇଙ୍ଗା ନଦୀ ବହିଯାଉଛି । ନିକଟରେ ରହିଛି ଗନ୍ଧମାର୍ଦ୍ଦନ ଓ ଖଣ୍ଡାଧାର ଖଣି । ଷ୍ଟିଲ୍ ପ୍ଲାଣ୍ଟ ପାଇଁ ଏହି ଅଂଚଳରେ ସମସ୍ତ ସୁବିଧା ଥିବାରୁ ଏଠାରେ ଷ୍ଟିଲ୍ ପ୍ଲାଣ୍ଟ ପ୍ରତିଷ୍ଠା କରିବାକୁ ଦାବି କରିଛନ୍ତି ସ୍ଥାନୀୟ ଲୋକେ ।

ତରମାକାନ୍ତରେ ଥିଲା ପ୍ରସିଦ୍ଧ ଚା ବଗିଚା । ଏହି ଚା ଦେଶ ବାହାରକୁ ରପ୍ତାନୀ ହେଉଥିଲା। ୧୯୮୨ ମସିହାରୁ ଚାଲିଥିବା ଏହି ଚା ବଗିଚା ୨୦୦୨ ମସିହାରେ ହଠାତ୍ ବନ୍ଦ ହୋଇଯାଇଥିଲା । ଏଠାରେ କାମ କରୁଥିବା ୩ହଜାରରୁ ଅଧିକ ଲୋକ ବେକାର ହୋଇଗଲେ । ବାଂଶପାଳ ବ୍ଲକରେ ଅନ୍ୟ କୌଣସି କାରଖାନା ନାହିଁ । ତେଣୁ ଏଠାକାର ଲୋକେ ମୁଖ୍ୟତଃ ଚାଷ ଉପରେ ନିର୍ଭର କରି ଚଳନ୍ତି। ତରମାକାନ୍ତର ଚା ବଗିଚାରେ ଥିବା ୨୫ଶହ ଏକର ଜମିକୁ ଲାଗି ଏଠାରେ ରହିଛି ୭ହଜାର ଏକର ପରିମିତ ସରକାରୀ ଜମି । ତେଣୁ ଏହି ସ୍ଥାନରେ ଷ୍ଟିଲ ପ୍ଲାଣ୍ଟ ପ୍ରତିଷ୍ଠା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି ।

ଦୁଇ ଦିନିଆ କେନ୍ଦୁଝର ଗସ୍ତ ସମୟରେ ମୁଖ୍ୟମନ୍ତ୍ରୀ ମୋହନ ମାଝୀ କେନ୍ଦୁଝରରେ ଷ୍ଟିଲ ପ୍ଲାଣ୍ଟ ହେବା ନେଇ ଘୋଷଣା କରିଥିଲା । ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ନାହିଁ ନଥିବା ଉତ୍ସାହ ଦେଖିବାକୁ ମିଳିଛି ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | -Argusnews Home: Odisha Latest News, Breaking News, Trending News, Live TV and more