CMO Missing Files / CMOରୁ ତଦନ୍ତ କମିଶନ ଫାଇଲ୍ ଗାଏବ ଘଟଣା, ଖୋଳତାଡ଼ ଆରମ୍ଭ କଲା କ୍ରାଇମବ୍ରାଞ୍ଚ ଟିମ୍‌

ସିଏମଓରୁ ଫାଇଲ ହଜିବା ମାମଲା । ତଦନ୍ତ ନିର୍ଦ୍ଦେଶ ପରେ କ୍ୟାପିଟାଲ ଥାନାରେ ପହଞ୍ଚିଲା ତିନି ଜଣିଆ କ୍ରାଇମବ୍ରାଞ୍ଚ ଟିମ୍। ତଦନ୍ତ କମିଶନ ଫାଇଲ୍ ଗାଏବ ଘଟଣାର ଖୋଳତାଡ଼ ଆଜିଠୁ କ୍ରାଇମବ୍ରାଞ୍ଚ ଆରମ୍ଭ କରିଛି । କମିଶନରେଟ ପୋଲିସ ପୂର୍ବରୁ କରିଥିବା ତଦନ୍ତର ସମସ୍ତ ରିପୋର୍ଟ ଆଜି କ୍ରାଇମବ୍ରାଞ୍ଚ ନିଜ ହାତକୁ ନେବ ।

ସେହିପରି, ପୂର୍ବରୁ ନୋଟିସ୍ ସତ୍ତ୍ୱେ ହାଜର ହୋଇନଥିବା ଅଧିକାରୀମାନଙ୍କୁ ପୁଣି ନୋଟିସ୍ ଜାରି କରାଯିବ କି ? ନା ସିଧାସଳଖ ସେମାନଙ୍କୁ ଜେରା କରାଯିବ ତା' ଉପରେ ସମସ୍ତଙ୍କ ନଜର ରହିଛି । ଏହି ମାମଲାରେ ପୂର୍ବତନ ଆଇଟି ସଚିବ ମନୋଜ ମିଶ୍ର ପୂର୍ବରୁ କ୍ୟାପିଟାଲ ଥାନାରେ ହାଜର ହୋଇଥିବା ବେଳେ, ପୂର୍ବତନ 5T ସଚିବ ଭି.କେ ପାଣ୍ଡିଆନ, ପୂର୍ବତନ IAS ଅଧିକାରୀ ରାଜେଶ ବର୍ମା ଏବଂ ଉପେନ୍ଦ୍ର ବେହେରା ଏପର୍ଯ୍ୟନ୍ତ ହାଜର ହୋଇନାହାନ୍ତି ।

ଏହି ପ୍ରମୁଖ ବ୍ୟକ୍ତିମାନଙ୍କୁ କ୍ରାଇମବ୍ରାଞ୍ଚ କେବେ ଓ କିପରି ପଚରାଉଚରା କରିବ, ତାହା ଉପରେ ନଜର ରହିଛି । ସେହିପରି ଫାଇଲ୍ ଗାଏବ ଘଟଣାର ମୁଖ୍ୟ ଷଡ଼ଯନ୍ତ୍ରକାରୀ କିଏ ଏବଂ କେବେ କ୍ରାଇମବ୍ରାଞ୍ଚ ସେମାନଙ୍କ ପାଖରେ ପହଞ୍ଚିବ ତା ଉପରେ ସମସ୍ତଙ୍କ ନଜର ରହିଛି ।