Mohan Majhi / ତ୍ୟାଗ ଓ ବଳିଦାନର ପରିଚୟ ଦେଇଛନ୍ତି ଧର୍ମେନ୍ଦ୍ର ପ୍ରଧାନ: ମୁଖ୍ୟମନ୍ତ୍ରୀ

ଭୁବନେଶ୍ଵର: ନିକଟରେ କେନ୍ଦ୍ର ଶିକ୍ଷା ମନ୍ତ୍ରୀ ପଦରୁ ଇସ୍ତଫା ଦେଇଥିବା ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନଙ୍କ ପ୍ରଶଂସା କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ସ୍ୱାମୀ ଲକ୍ଷ୍ମଣାନନ୍ଦ ସରସ୍ଵତୀଙ୍କ ଜୀବନୀ ଆଧାରିତ ପୁସ୍ତକ ଉନ୍ମୋଚନ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ କହିଛନ୍ତି, "ଧର୍ମେନ୍ଦ୍ର ପ୍ରଧାନ ଦେଶର ଶିକ୍ଷା ବ୍ୟବସ୍ଥାରେ ଐତିହାସିକ ସଂସ୍କାର ଆଣିଛନ୍ତି । ପରୀକ୍ଷା ପଦ୍ଧତିକୁ ସୁଦୃଢ଼ କରିବାକୁ ସେ ଅନେକ ପଦକ୍ଷେପ ନେଇଛନ୍ତି ।"

ପ୍ରଶ୍ନପତ୍ର ଲିକ୍ କରୁଥିବା ବ୍ୟକ୍ତିଙ୍କ ବିରୋଧରେ ମଧ୍ୟ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଇଛି । ପ୍ରଧାନମନ୍ତ୍ରୀଙ୍କ ସମ୍ମାନ ଓ ଛାତ୍ରଙ୍କ ଭାବନାକୁ ସମ୍ମାନ ଦେଇ ଧର୍ମେନ୍ଦ୍ର ପ୍ରଧାନ ନିଜ ପଦରୁ ଇସ୍ତଫା ଦେଇଛନ୍ତି । ଛାତ୍ର ଆନ୍ଦୋଳନ ନାଁରେ ଚାଲିଥିବା ଆନ୍ଦୋଳନକୁ ଅପବ୍ୟବହାର କରୁଥିବା ଦେଶ ବିରୋଧୀ ଶକ୍ତିଙ୍କୁ ରୋକିବାକୁ ଧର୍ମେନ୍ଦ୍ର ଇସ୍ତଫା ଦେଇଥିବା କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।

ଏଥିସହ ପଢ଼ନ୍ତୁ: ଧର୍ମେନ୍ଦ୍ର ପ୍ରଧାନଙ୍କୁ ସ୍ଵାଗତ ପାଇଁ ଲୋକାରଣ୍ୟ ପାଲଟିଲା ଭୁବନେଶ୍ଵର ବିମାନବନ୍ଦର ପରିସର 

ମୁଖ୍ୟମନ୍ତ୍ରୀ କହିଛନ୍ତି, "କିଛି ହିନ୍ଦୁ ବିରୋଧୀ ଓ ଦେଶ ବିରୋଧୀ ଗୋଷ୍ଠୀ ଗତ କିଛି ବର୍ଷ ହେଲା ଲାଗି ପଡ଼ିଛନ୍ତି । କୌଣସି ପରିସ୍ଥିତିରେ ଏହାକୁ ବରଦାସ୍ତ କରାଯିବ ନାହିଁ । ଆମେ ସମସ୍ତଙ୍କୁ ସମ୍ମାନ ଦେବୁ, ଆମକୁ ଅସମ୍ମାନ କଲେ ସହିବୁ ନାହିଁ ।"

ଓଡ଼ିଶାର ତତ୍କାଳୀନ ସରକାର ସ୍ୱାମୀଜୀଙ୍କୁ ସୁରକ୍ଷା ଦେବାରେ ବିଫଳ ଥିଲେ । ଏପରିକି ଦୋଷୀଙ୍କୁ ଦଣ୍ଡ ଦେବାରେ ବି ବିଫଳ ଥିଲେ । ସ୍ୱାମୀଜୀଙ୍କ ହତ୍ୟାକାଣ୍ଡର ତଦନ୍ତ ଫାଇଲକୁ ସୁଚିନ୍ତିତ ଷଡ଼ଯନ୍ତ୍ର କରି ଗାଏବ କରାଯାଇଥିବା କହିଛନ୍ତି ମୁଖ୍ୟମନ୍ତ୍ରୀ ।

ଫାଇଲ୍ ଗାଏବର ପର୍ଦ୍ଦାଫାସ୍ ପାଇଁ ତଦନ୍ତ ଦାୟିତ୍ୱ କ୍ରାଇମବ୍ରାଞ୍ଚକୁ ଦିଆ ଯାଇଛି । ମୁଁ ସମସ୍ତଙ୍କୁ ଆଶ୍ୱାସନା ଦେଉଛନ୍ତି ସତ୍ୟ ଉପରୁ ନିଶ୍ଚିତ ପରଦା ଉଠିବ । ଯେଉଁମାନେ ହତ୍ୟାକାଣ୍ଡ ପଛରେ ଅଛନ୍ତି ତାଙ୍କ ଚେହେରା ସାମ୍ନାକୁ ଆସିବ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ।

ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, "ପ୍ରଧାନମନ୍ତ୍ରୀ ମୋଦିଙ୍କ ଭଳି ମହାନ ନେତାଙ୍କ ପଦକୁ ଅନୁସରଣ କରି ତ୍ୟାଗ ଓ ବଳିଦାନର ପରିଚୟ ଦେଇଛନ୍ତି ଧର୍ମେନ୍ଦ୍ର ପ୍ରଧାନ । ଶିକ୍ଷା ବ୍ୟବସ୍ଥାରେ ସଂସ୍କାର ଆଣିବା ସହ ପରୀକ୍ଷା ପଦ୍ଧତିକୁ ସୁଦୃଢ ପାଇଁ ଧର୍ମେନ୍ଦ୍ର ପ୍ରଧାନ ଅନେକ ପଦକ୍ଷେପ ନେଇଛନ୍ତି ।"

ଏଥିସହ ପଢ଼ନ୍ତୁ: ଇଣ୍ଡିଆନ୍ ଆଇଡଲ୍ ବିଜେତା ଜ୍ୟୋତିର୍ମୟୀଙ୍କୁ ସମ୍ବର୍ଦ୍ଧିତ କଲେ ମୁଖ୍ୟମନ୍ତ୍ରୀ 

ପେପର ଲିକ୍ କରୁଥିବା ଦୋଷୀ ମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯାଇଛି । ତଥାପି ଛାତ୍ରଙ୍କ ଭାବନାକୁ ସାମ୍ନାନ ଦେଇ ସେ ଇସ୍ତଫା ଦେଲେ । ଛାତ୍ର ଆନ୍ଦୋଳନ ନାଁରେ ଚାଲିଥିବା ଆନ୍ଦୋଳନକୁ ଦେଶ ବିରୋଧୀ ଶକ୍ତିଙ୍କ ଅପବ୍ୟବହାର ରୋକିବା ପାଇଁ ଧର୍ମେନ୍ଦ୍ରଙ୍କ ଇସ୍ତଫା ପ୍ରଧାନମନ୍ତ୍ରୀଙ୍କ ହାତ ମୁଠାକୁ ଆହୁରି ଶସକ୍ତ କରିବ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।