Dharmendra Pradhan / ଧର୍ମେନ୍ଦ୍ର ପ୍ରଧାନଙ୍କୁ ସ୍ଵାଗତ ପାଇଁ ଲୋକାରଣ୍ୟ ପାଲଟିଲା ଭୁବନେଶ୍ଵର ବିମାନବନ୍ଦର ପରିସର

ଭୁବନେଶ୍ଵର: ଦିଲ୍ଲୀରୁ ଓଡ଼ିଶା ସବୁଠି ଧର୍ମେନ୍ଦ୍ର ପ୍ରଧାନଙ୍କ କ୍ରେଜ୍ । ଭୁବନେଶ୍ବର ବିମାନବନ୍ଦରରେ ପହଞ୍ଚିବା ପରେ ଉଚ୍ଛ୍ବସିତ ସମ୍ବର୍ଦ୍ଧନା । ସ୍ବାଗତ କଲେ ରାଜ୍ୟ ସରକାରଙ୍କ ମନ୍ତ୍ରୀ, ବିଜେପି ପଦାଧିକାରୀ, ନେତା, କର୍ମୀ ଓ ଶୁଭେଚ୍ଛୁ । ପୁଷ୍ପଗୁଚ୍ଛ ଓ ଉତ୍ତରୀୟ ପକାଇ ପାଛୋଟି ଆଣିଲେ । ମହିଳା, ଯୁବବର୍ଗ ଓ ଛାତ୍ରଛାତ୍ରୀ ବି ହେଲେ ସାମିଲ । ରାଷ୍ଟ୍ର ହିତ ପାଇଁ ସେ ସବୁବେଳେ ପଦକ୍ଷେପ ନେଇଛନ୍ତି । ଓଡ଼ିଆ ପୁଅ ହିସାବରେ ସମସ୍ତେ ଧର୍ମେନ୍ଦ୍ର ପ୍ରଧାନଙ୍କ ପାଇଁ ଗର୍ବିତ ବୋଲି ପ୍ରତିକ୍ରିୟାରେ କହିଛନ୍ତି ।

ହାତରେ ପ୍ଲାକାର୍ଡ ଓ ପୁଷ୍ପ ଗୁଚ୍ଛ ଧରି ଅପେକ୍ଷାରତ । ସମସ୍ତଙ୍କ ଆଖି ଏୟାରପୋର୍ଟ ଗେଟ୍ ଆଡ଼କୁ ଅନାଇ ରହିଥିଲା । ନବ ଓଡ଼ିଶା ନିର୍ମାଣର ବିନ୍ଧାଣୀ, ଜାତୀୟ ଶିକ୍ଷା ନୀତିର ସଂସ୍ଥାପକ, ଉଜ୍ଜଳା ଭଳି ଗେମ୍ ଚେଞ୍ଜର ଯୋଜନା ସହ ଏକାଧିକ ବୈପ୍ଳବିକ ସଂସ୍କାରର ପ୍ରବର୍ତ୍ତକ ଧର୍ମେନ୍ଦ୍ର ପ୍ରଧାନଙ୍କୁ ଅନାଇ ରହିଥିଲେ ସମସ୍ତେ । ସୂଚନା ମିଳିଲା ଓଡ଼ିଶା ଅଭିମୁଖେ ବାହାରି ସାରିଛନ୍ତି ଧର୍ମେନ୍ଦ୍ର ପ୍ରଧାନ । ଆଉ ଏହି ଖବର ପହଞ୍ଚିବା କ୍ଷଣି, ଭୁବନେଶ୍ବର ବିମାନବନ୍ଦରରେ ଶୁଭେଚ୍ଛୁଙ୍କ ଭିଡ଼ ଆହୁରି ବଢ଼ିଗଲା ।

ଏଥିସହ ପଢ଼ନ୍ତୁ: ଇସ୍ତଫା ପରେ ଧର୍ମେନ୍ଦ୍ର ପ୍ରଧାନଙ୍କ ପ୍ରଥମ ପ୍ରତିକ୍ରିୟା, "ମୁଁ ଷ୍ଟ୍ରିଟ୍ ଫାଇଟର୍..." 

ବିମାନବନ୍ଦର ବାହାରେ ଭିଡ଼ ଲାଗିଥିଲା, ଆଉ ବିମାନବନ୍ଦର ଭିତରେ ରାଜ୍ୟ ବିଜେପି ପଦାଧିକାରୀ ଅପେକ୍ଷା କରି ରହିଥିଲେ । ଧର୍ମେନ୍ଦ୍ର ପହଞ୍ଚିବା କ୍ଷଣି ଉତ୍ତରୀୟ ପକାଇ, ପୁଷ୍ପଗୁଚ୍ଛ ଦେଇ ସ୍ବାଗତ ସମ୍ବର୍ଦ୍ଧନା ଜଣାଇଥିଲେ । ପାଦ ଛୁଇଁ ପ୍ରଣିପାତ କରିବା ସହ ଜଣାଇଥିଲେ ଯଥୋଚିତ ସମ୍ମାନ । ଦୃଶ୍ୟ ହିଁ ବୟାନ କରୁଥିଲା ଯେ, ଦେଶର ଅଗଣିତ ଛାତ୍ରଛାତ୍ରୀଙ୍କ ଭବିଷ୍ୟତର ସୁରକ୍ଷାକୁ ପ୍ରଥାମିକତା ଦେଇ ମନ୍ତ୍ରୀ ପଦକୁ ତୁଚ୍ଛ କରିଦେଇଥିବା ସମ୍ବଲପୁର ସାଂସଦଙ୍କ ପାଇଁ ଦଳ ଭିତରେ ଅନୁରକ୍ତି ଆହୁରି ବଢ଼ିଯାଇଛି ।

ବିମାନବନ୍ଦର ବାହାରକୁ ଧର୍ମେନ୍ଦ୍ର ପ୍ରଧାନ ବାହାରୁଥିବା ସମୟରେ ମୁହଁରେ ଥିଲା ଚିରାଚରିତ ସ୍ମିତହାସ୍ୟ । ରାଜ୍ୟ ବିଜେପିର ପଦାଧିକାରୀ, ନେତା, କର୍ମୀ ଓ ଶହ ଶହ ଶୁଭେଚ୍ଛୁଙ୍କ ଉଚ୍ଛ୍ବସିତ ସମ୍ବର୍ଦ୍ଧନା ତାଙ୍କୁ ଅଭିଭୂତ କରିପକାଇଥିଲା । ସମସ୍ତଙ୍କୁ ହାତଯୋଡ଼ି ଅଭିବାଦନ ଜଣାଇଲାବେଳେ, ତାଙ୍କ ପ୍ରତି ଶୁଭେଚ୍ଛୁ ଓ ସମର୍ଥକଙ୍କ ସ୍ନେହ ଓ ସମ୍ମାନ ଆହୁରି ବଢ଼ିଯାଇଥିଲା । କଲେଜ ଛାତ୍ରଛାତ୍ରୀମାନେ ମଧ୍ୟ ଧର୍ମନ୍ଦ୍ର ପ୍ରଧାନଙ୍କୁ ଉଚ୍ଛ୍ବସିତ ସମ୍ବର୍ଦ୍ଧନା ଜଣାଇ ମହା ଆଡ଼ମ୍ବରରେ ଭୁବନେଶ୍ବର ବିମାନବନ୍ଦରରୁ ପାଛୋଟି ଆଣିଥିଲେ ।

ଏଥିସହ ପଢ଼ନ୍ତୁ: ସଂସଦ ବାହାରେ ଧର୍ମେନ୍ଦ୍ର ପ୍ରଧାନଙ୍କୁ ଜୋରଦାର ସ୍ୱାଗତ କଲେ, ପଗଡ଼ି ପିନ୍ଧାଇ ଭିତରକୁ ନେଲେ 

ସେପଟେ ସୋମବାର ସଂସଦରେ ପହଞ୍ଚିବା ପରେ ଧର୍ମେନ୍ଦ୍ର ପ୍ରଧାନଙ୍କୁ ବିପୁଳ ସ୍ୱାଗତ କରିଥିଲେ NDAର ସହଯୋଗୀ ସାଂସଦମାନେ । ମକର ଦ୍ୱାରରେ ସ୍ୱାଗତ ବେଳେ ଧର୍ମେନ୍ଦ୍ର ପ୍ରଧାନ ଜିନ୍ଦାବାଦ ନାରାରେ କମ୍ପିଥିଲା ସଂସଦ ପରିସର । ପାର୍ଲାମେଣ୍ଟ ପରିସରରୁ ଆସିଥିବା ଭିଡିଓରେ NDA ସାଂସଦ ମାନେ ଧର୍ମେନ୍ଦ୍ରଙ୍କୁ ଘେରି ଯାଇ ଦେଇଥିଲେ ଉଚ୍ଛ୍ବସିତ ସମ୍ବର୍ଦ୍ଧନା । ଦିଲ୍ଲୀରୁ ଓଡ଼ିଶା ସଵୁଠି ଏଭଳି ସମ୍ବର୍ଦ୍ଧନା ଓ ସମ୍ମାନ ଖୁବ କମ୍ ରାଜନେତାଙ୍କ ଭାଗ୍ୟରେ ଜୁଟେ । ଆଉ ନିଜ ଦକ୍ଷତା ବଳରେ ଅର୍ଜିବାକୁ ପଡ଼େ, ଯାହା ଧର୍ମେନ୍ଦ୍ର ପ୍ରଧାନଙ୍କ କ୍ଷେତ୍ରରେ ଘଟିଛି ।