ନୟାଗଡ: ବିକାଶ ପ୍ରକ୍ରିୟା ନାଁରେ ବିନାଶ ହେଉଛି ପ୍ରକୃତି । 45 ଡିଗ୍ରୀ ଅସହ୍ୟ ତାତିରେ ଏବେ ଜଳୁଛି ଜନ ଜୀବନ । ହେଲେ ଅମୃତରୂପୀ ଅମ୍ଳଜାନ ଯୋଗାଉଥିବା ନିର୍ଜୀବ ଗଛ ମାନଙ୍କୁ ନିଷ୍ଠୁର ଭଳି କାଟି ପକାଉଛି ଏଇ ସ୍ୱାର୍ଥପର ମଣିଷ । ରାସ୍ତା ପ୍ରଶସ୍ତିକରଣ ନାଁରେ ନୟାଗଡ଼ ଠାରୁ ରଣପୁରକୁ ସଂଯୋଗ କରୁଥିବା ରାସ୍ତାରୁ ଏବେ ଦୈନିକ କଟାଯାଉଛି ଶହ ଶହ ଗଛ । ଯାହାକୁ ନେଇ ସ୍ଥାନୀୟ ବାସିନ୍ଦା ଏହାକୁ ତୀବ୍ର ବିରୋଧ କରିବା ସହ ଏହି ଗଛ ସବୁକୁ ନିର୍ମମ ଭାବେ ନ କାଟି ସ୍ଥାନାନ୍ତରିତ କରିବାକୁ ସରକାରଙ୍କୁ ନିବେଦନ କରିଛନ୍ତି l

ପୁରୀ-ନୟାଗଡ଼ ବାଇପାସ୍ ରାସ୍ତା ସଂଯୋଗ ପାଇଁ ନୟାଗଡ଼ରୁ ରଣପୁର ସଂଯୋଗ କରୁଥିବା ଏହି ରାସ୍ତାରେ ଏବେ ପ୍ରାୟ ୩ ଶହରୁ ଉର୍ଦ୍ଧ୍ୱ ବିଶାଳକାୟ ଗଛ ବଳିପଡିଲାଣି । ତେବେ ରାସ୍ତା ପ୍ରଶସ୍ଥିକରଣ କାର୍ଯ୍ୟପାଇଁ ଆଗକୁ ଆହୁରି ଅନେକ ଗଛ ବଳିପଡିବା ପାଇଁ ପ୍ରଶାସନିକ ସ୍ତରରେ ନିଷ୍ପତି ହୋଇଛି । ହେଲେ ବିକାଶ କାର୍ଯ୍ୟ ତ୍ୱରାନ୍ୱିତ କରିବାକୁ ରାସ୍ତା ପ୍ରଶସ୍ଥିକରଣ ଜରୁରୀ ହୋଇଥିବାବେଳେ ବିନା ନୂଆ ଚାରାରୋପଣରେ ଏତେ ସଂଖ୍ୟାରେ ଗଛ କାଟିବାକୁ ସ୍ଥାନୀୟ ବାସିନ୍ଦା ବିରୋଧ କରିଛନ୍ତି । ସେପଟେ ନୂଆ ପ୍ରଣାଳୀରେ ଗଛକୁ ନକାଟି ସ୍ଥାନାନ୍ତରିତ କରାଯିବା ସହ ନୂଆ ଗଛ ଲଗାଇବା ପରେ ପୁରୁଣା ଗଛ କଟାଯାଉ ବୋଲି ସ୍ଥାନୀୟ ବାସିନ୍ଦା ଦାବି କରିଛନ୍ତି ।

ଜଙ୍ଗଲ ଓ ପରିବେଶ ସୁରକ୍ଷା ନେଇ ସରକାର କୋଟି କୋଟି ଟଙ୍କାର ରାଜସ୍ବ ସାରୁଥିବାବେଳେ ବର୍ଷ ବର୍ଷର ପୁରୁଣା ଗଛକୁ ଏଭଳି ଅବାଧରେ ନକାଟି କାହିଁକି ଆଧୁନିକ ପ୍ରଣାଳୀରେ ସ୍ଥାନାନ୍ତରିତ କରାନଯିବ ସେନେଇ ପରିବେଶ ପ୍ରେମୀ ପ୍ରଶ୍ନ ଉଠାଇଛନ୍ତି । ସେପଟେ ଜଙ୍ଗଲ ବିଭାଗ ମଧ୍ୟ ଏହି ରାସ୍ତା ପାର୍ଶ୍ୱରେ ଅଧିକରୁ ଅଧିକ ନୂଆ ଗଛ ଲଗାଇବାକୁ ସାଧାରଣରେ ଦାବି ହୋଇଛି ।

ଆହୁରି ପଢନ୍ତୁ ଓଡିଶା ଖବର...

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV