କେନ୍ଦୁଝର:  କେବେ ବ୍ୟାଙ୍କ ଯାଇ ନାହାନ୍ତି କି ଋଣ ଆବେଦନ କରିନାହାନ୍ତି କିନ୍ତୁ ଋଣ ସୁଝିବାକୁ ଆସିଛି କୋର୍ଟ ନୋଟିସ । ଆନନ୍ଦପୁର ଉପଖଣ୍ଡ ଅତା ଗାଁର 81 ବୁଣାକାରଙ୍କ ନିଦ ହଜିଛି । ବୟନ କେନ୍ଦ୍ରର ପୂର୍ବତନ ସମ୍ପାଦକ ଅକ୍ଷୟ ପାଗଳ ଲକ୍ଷଲକ୍ଷ ଟଙ୍କା ହଡ଼ପ କରିଥିବା ଅଭିଯୋଗ ହୋଇଛି ।  ଚିନ୍ତାରେ ଋଣ ଜାତିଆତିର ଶିକାର 81 ବୁଣାକାର ପରିବାର । ଋଣ ପରିଶୋଧ କରିବାକୁ କୋର୍ଟ ନୋଟିସ ପାଇବା ପରେ ଆନନ୍ଦପୁର ଉପଖଣ୍ଡ ଅତା ଗାଁର ବୁଣାକାରଙ୍କ ନିଦ ହଜିଛି ।  2016ରୁ 2018 ମଧ୍ୟରେ ଗରିବ ବୁଣାକାରଙ୍କ ସରଳତାର ସୁଯୋଗ ନେଇ ବୟନ କେନ୍ଦ୍ରର ପୂର୍ବତନ ସମ୍ପାଦକ ଅକ୍ଷୟ ପାଗଳ ଲକ୍ଷଲକ୍ଷ ଟଙ୍କା ହଡ଼ପ କରିଥିବା ଅଭିଯୋଗ କରିଛନ୍ତି ବୁଣାକାର । ପକ୍କା ଘର ଯୋଜନା,  ସ୍ବାସ୍ଥ୍ୟ ବୀମା, ତନ୍ତ ଯୋଗାଇବା ବାହାନା କରି ନିରିହ ମହିଳାଙ୍କଠାରୁ ଲୋନ୍ ଫର୍ମରେ ଦସ୍ତଖତ କରାଇ, ବ୍ୟାଙ୍କ କର୍ତ୍ତୃପକ୍ଷକୁ ହାତ କରି ଏଭଳି ଜାଲିଆତି କରିଥିବା ଅଭିଯୋଗ ହୋଇଛି ।

ଅଭିଯୁକ୍ତ ଅତା ମହିଳା ବୁଣାକାର ସମବାୟ ସମିତିର ବହିଷ୍କୃତ ପୂର୍ବତନ ସମ୍ପାଦକଙ୍କ କଳା କାରନାମାରେ ନୂଆ ଫର୍ଦ୍ଦ ଯୋଡ଼ି ହୋଇଛି । 2016-17 ରେ 52 ଜଣ ଓ 2017-18 ଆର୍ଥିକ ବର୍ଷରେ 44 ଜଣ ବୁଣାକାରଙ୍କ ନାଁରେ ମୁଦ୍ରା ଯୋଜନାର ଘଷିପୁରା ବ୍ୟାଙ୍କ ଅଫ୍ ଇଣ୍ଡିଆ ଶାଖାରୁ 50 ହଜାର ଟଙ୍କା ଲେଖାଏଁ ଋଣ ଉଠାଯାଇଥିଲା । ସେମାନଙ୍କ ମଧ୍ୟରୁ 15ଜଣ ଋଣ ସୁଝିଥିବାବେଳେ ବାକି 81 ଜଣଙ୍କ ମୁଣ୍ଡରେ ଏବେବି ଋଣ ଗଡୁଛି । ପୂର୍ବରୁ ବ୍ୟାଙ୍କ କର୍ମଚାରୀଙ୍କୁ ହାତ କରି ଅକ୍ଷୟ ପାଗଳ ବ୍ୟାଙ୍କ ନୋଟିସ୍ କୁ ଅକ୍ଷୟ ଚାପି ଦେଉଥିବା ବୁଣାକାର କହିଛନ୍ତି । ଏବେ କୋର୍ଟ ନୋଟିସ୍ ଆସିବା ପରେ ଦୁର୍ନୀତିର ପର୍ଦ୍ଦାଫାସ ହୋଇଛି । ଏପଟେ ଅଭିଯୋଗ ଖଣ୍ଡନ କରିବା ସହ ଋଣ ବିଷୟରେ ସେ କିଛି ଜାଣନ୍ତି ନାହି ବୋଲି ସଫେଇ ଦେଇଛନ୍ତି ପୂର୍ବତନ ସମ୍ପାଦକ ଅକ୍ଷୟ କୁମାର ପାଗଳ । ଅଭିଯୁକ୍ତ ଅକ୍ଷୟ ପାଗଳ ସମବାୟ ସମିତିରେ ଅନିୟମିତତା ଅଭିଯୋଗରେ 2021 ଜାନୁଆରୀରେ ନିଲମ୍ବିତ ହୋଇଥିଲେ । ଦୋଷ ପ୍ରମାଣିତ ହେବା ପରେ ଅଗଷ୍ଟ ମାସରେ ତାଙ୍କୁ ପଦରୁ ବହିଷ୍କୃତ କରିଥିଲେ ଉଚ୍ଚ କର୍ତ୍ତୃପକ୍ଷ । ଘଟଣାର ସରଜମିନ୍ ତଦନ୍ତ ଦାବି କରିବା ସହ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଗ୍ରାମବାସୀ । ରାଜ୍ୟରେ ଦୁର୍ନୀତି ବିରୋଧରେ ନାରା ଦେଇଥିବା 24 ବର୍ଷ ସ୍ଥିର ସରକାର ଗରିବ ବୁଣାକାରଙ୍କୁ ନ୍ୟାୟ ଦେବେ ତ ?

ଅଧିକ ପଢନ୍ତୁ ଓଡ଼ିଶା ଖବର