ଏଣିକି ଆପଣଙ୍କ ଗାଁର ପାନୀୟ ଜଳ ପ୍ରକଳ୍ପର ମାଲିକ ହେବେ ଆପଣ ନିଜେ । ବିଶୁଦ୍ଧ ପାନୀୟ ଜଳର ସୁପରିଚାଳନା ପାଇଁ ରାଜ୍ୟ ସରକାର ଆଣିଛନ୍ତି 'ଗ୍ରାମୀଣ ପାନୀୟ ଜଳ ଯୋଗାଣ ପରିଚାଳନା ଏବଂ ରକ୍ଷଣାବେକ୍ଷଣ ନୀତି-୨୦୨୬' । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ ବୈଠକରେ ଆଜି ମୋଟ୍ ୧୧ଟି ପ୍ରସ୍ତାବକୁ ମୋହର ମିଳିଛି । କାର୍ଯ୍ୟରେ ଅବହେଳା କରୁଥିବା ଠିକାଦାରଙ୍କ ବିରୋଧରେ ସରକାର ଧରିଛନ୍ତି କଠୋର ଆଭିମୁଖ୍ୟ । ଜଳ ପ୍ରକଳ୍ପରେ ବିଳମ୍ବ ଯୋଗୁଁ ୧୧୨୦ କୋଟି ଟଙ୍କାର ଜରିମାନା ସହ FIR ମଧ୍ୟ ରୁଜୁ କରାଯାଇଛି । ଏହା ସହ ରାଜ୍ୟର ଯୋଗାଯୋଗ ବ୍ୟବସ୍ଥାକୁ ସୁଦୃଢ଼ କରିବାକୁ ୩୪୦୦ କୋଟି ଟଙ୍କାର 'ଅଟଳ ବସ୍ ଷ୍ଟାଣ୍ଡ' ଯୋଜନାକୁ ମଧ୍ୟ ମିଳିଛି କ୍ୟାବିନେଟ୍ ଅନୁମୋଦନ ।

୧୧ଟି ପ୍ରସ୍ତାବକୁ ମୋହର ମାରିଛି ରାଜ୍ୟ କ୍ୟାବିନେଟ । ଯେଉଁଥିରେ ଗ୍ରାମୀଣ ପାନୀୟ ଜଳ ଯୋଗାଣ ପରିଚାଳନା ଏବଂ ରକ୍ଷଣାବେକ୍ଷଣ ନୀତି ୨୦୨୬କୁ ମିଳିଛି ଅନୁମୋଦନ । ନୂଆ ନୀତିରେ କୁହାଯାଇଛି ଯେ ରାଜ୍ୟରେ ବର୍ତ୍ତମାନ ସୁଦ୍ଧା ୨୭ଟି ମେଗା ପାନୀୟ ଜଳ ଯୋଗାଣ ପ୍ରକଳ୍ପ, ୮୨ଟି ଜଳ ବିଶୋଧନାଗାର ପ୍ରକଳ୍ପ ଶେଷ ହୋଇଛି ।

ସେହିପରି ୩,୦୪୬ଟି ଏକକ ଗ୍ରାମ ଜଳ ଯୋଗାଣ ପ୍ରକଳ୍ପ, ୨,୭୦୨ଟି ସୌର ଶକ୍ତି ଆଧାରିତ ଜଳ ଯୋଗାଣ ପ୍ରକଳ୍ପ ସମାପ୍ତ କରାଯାଇଛି । ଅତିରିକ୍ତ ଜଳ ଯୋଗାଣ ବ୍ୟବସ୍ଥା ବାବଦରେ ବର୍ତ୍ତମାନ ସରକାରଙ୍କ ଦ୍ବାରା ୨୮,୭୪୧ଟି ନଳକୂପ ମଧ୍ୟ ସ୍ଥାପନ କରାଯାଇଛି ବୋଲି କୁହାଯାଇଛି । ତେଣୁ ଏହି ବ୍ୟବସ୍ଥାଗୁଡ଼ିକୁ ଦୀର୍ଘ ସମୟ ପର୍ଯ୍ୟନ୍ତ କାର୍ଯ୍ୟକ୍ଷମ, ଦକ୍ଷ ଏବଂ ଆର୍ଥିକ ଦୃଷ୍ଟିରୁ ସ୍ଥାୟୀ ଓ ସୁରକ୍ଷିତ ରଖିବା ପାଇଁ ନୂଆ ନୀତିରେ ବ୍ୟବସ୍ଥା କରାଯାଇଛି ।

ସେପଟେ ୩୪୦୦ କୋଟିର ଅଟଳ ବସ୍‌ ଷ୍ଟାଣ୍ଡ ଯୋଜନାକୁ ମୋହର ମାରିଛି ରାଜ୍ୟ କ୍ୟାବିନେଟ । ସରକାରଙ୍କ ଦ୍ବାରା ଆର୍ଥିକ ବର୍ଷ ୨୦୩୧-୩୨ ପର୍ଯ୍ୟନ୍ତ ୩୪୦୦ କୋଟି ଟଙ୍କାର ବ୍ୟୟ ବରାଦ କରାଯାଇଛି । ସେହିପରି ଜଳସମ୍ପଦ ବିଭାଗର ୫ଟି ପ୍ରକଳ୍ପକୁ ମିଳିଛି ମଞ୍ଜୁରୀ ।

ସେହିପରି ରାଜ୍ୟର ୩୧୮ଟି ବସ୍‌ଷ୍ଟାଣ୍ଡର ଉନ୍ନତୀକରଣ କରାଯିବ । କେନ୍ଦୁଝରରେ ୧୬୪୭ କୋଟି ବ୍ୟୟରେ ନୂଆ MVA ସବ୍‌ଷ୍ଟେସନ ନିର୍ମାଣ ହେବ । ଓଡ଼ିଶା ଶ୍ରମ ସେବା ନିୟମାବଳୀରେ ସଂଶୋଧନକୁ ମଧ୍ୟ ମଞ୍ଜୁରୀ ମିଳିଛି ।