Fake Fertilizer / ଚାଷୀଙ୍କୁ ନକଲି ସାର ଯୋଗାଣ ଘଟଣାରେ ପ୍ରଶାସନର କାର୍ଯ୍ୟାନୁଷ୍ଠାନ; FPO ବିରୋଧରେ ଥାନାରେ ଅଭିଯୋଗ

ନୀଳଗିରି (ବାଲେଶ୍ଵର): ଡିଏପି ସାର (Fertilizer)ର ରଙ୍ଗ ଧଳା ପରିବର୍ତ୍ତେ କଳା ଓ ପଟାସ ସାରରେ ଲୁଣ ସହ ଦିଆଯାଇଥିଲା ରଙ୍ଗ । ନକଲି ସାରକୁ ଚାଷୀ ଚିହ୍ନି ଅଭିଯୋଗ କରିବା ପରେ ତାହା ସତ ପ୍ରମାଣିତ ହୋଇଛି । କୃଷକ ଉତ୍ପାଦକ ସଂଗଠନ (FPO) ପକ୍ଷରୁ ପ୍ରଦାନ ସାର ନକଲି ବୋଲି ଜଣାପଡ଼ିଛି ।

ଏହି ମାମଲାରେ ନକଲି ସାର ଯୋଗାଇଥିବା ନୀଳଗି FPO ସିଇଓ ସସ୍ମିପ୍ରଭାଙ୍କ ବିରୋଧରେ ନୀଳଗିରି ଥାନାରେ ଲିଖିତ ଅଭିଯୋଗ କରିଛି କୃଷି ବିଭାଗ । ସହକାରୀ କୃଷି ଅଧିକାରୀ ରତିକାନ୍ତ ମହାନ୍ତି ଓ ବ୍ଲକ କୃଷି ଅଧିକାରୀ ମିତାଲି ନାୟକ ଉଭୟ ନୀଳଗିରି ଥାନାରେ ଏତଲା ଦେଇଛନ୍ତି ।

ଲ୍ୟାବ ଟେଷ୍ଟ ରିପୋର୍ଟରେ ନକଲି ସାର ବୋଲି ପ୍ରମାଣିତ ହେବା ପରେ ନୀଳଗିରି କୃଷି ବିଭାଗ ପକ୍ଷରୁ ପଦକ୍ଷେପ ନିଆଯାଇଛି । ସୂଚନା ଅନୁସାରେ, ନୀଳଗିରି ବ୍ଲକ ମଛୁଆ ପଞ୍ଚାୟତରେ ଚାଷୀଙ୍କୁ ନକଲି ସାର ଯୋଗାଣ କରାଯାଇଥିଲା ।

ଅଗଷ୍ଟ ୧୦ ତାରିଖରେ ନୀଳଗିରି ଅଞ୍ଚଳରେ ନକଲି ସାରକୁ ଚାଷୀଙ୍କ ମଧ୍ୟରେ ଉତ୍ତେଜନା ଦେଖା ଦେଇଥିଲା । ଅଟୋରେ ସାର ଲଦି ନୀଳଗିରି ବ୍ଲକରେ ଚାଲୁଥିବା ଜନଶୁଣାଣିରେ ପହଞ୍ଚିଥିଲେ । ଗାଁର ୧୫ରୁ ଊର୍ଦ୍ଧ୍ଵ ଚାଷୀଙ୍କୁ ବଜାର ଦର ଠାରୁ କମ୍ ଦରରେ ନବରତ୍ନା ଡିଏପି ଓ ପଟାସ ସାର ନୀଳଗିରି FPO ପକ୍ଷରୁ ଯୋଗାଇ ଦିଆଯାଇଥିଲା ।

ଏଥିସହ ପଢ଼ନ୍ତୁ: କେନ୍ଦ୍ରାପଡା, ମୟୂରଭଞ୍ଜ, କେନ୍ଦୁଝରରେ ବନ୍ୟା ବିତ୍ପାତ…ବୈତରଣୀ, ଖରସ୍ରୋତା, ବ୍ରାହ୍ମଣୀରେ ଆସିଲା ଦ୍ବିତୀୟ ବନ୍ୟା 

କୃଷି ମିତ୍ର ଓ ଏମବିକେ ଦ୍ୱାରା ନୀଳଗିରି FPOର ସିଇଓ ସସ୍ମିପ୍ରଭା ରାଉତ ଚାଷୀଙ୍କୁ ସାର ଯୋଗାଣ କରିଥିଲେ । କିନ୍ତୁ ଦିଆଯାଇଥିବା ଡିଏପି ସାରର ରଙ୍ଗ ଧଳା ପରିବର୍ତ୍ତେ କଳା ଓ ପଟାସ ସାର ଲୁଣ ଓ ରଙ୍ଗ ଦିଆଯାଇଥିବା ଅଭିଯୋଗ କରିଥିଲେ ଚାଷୀ ।

ଯାହା ପରେ ଜିଲ୍ଲା ବିଜେପି କୃଷକ ମୋର୍ଚ୍ଚା ସଭାପତି ତାପସ ମହାନ୍ତି ଓ ଅନ୍ୟ ଅଧିକାରୀ ପହଞ୍ଚି ସାରକୁ ଦେଖିବା ସହ ଜିଲ୍ଲାପାଳଙ୍କ ଯୁଗ୍ମ ଜନ ଶୁଣାଣିରେ ଅଭିଯୋଗ କରିଥିଲେ । ଯାହା ପରେ ପ୍ରଶାସନ ସାର ନମୁନା ସଂଗ୍ରହ କରି ଲ୍ୟାବ ଟେଷ୍ଟ ପାଇଁ ପଠାଇଥିଲା ।

ଏବେ ଲ୍ୟାବ ଟେଷ୍ଟ ରିପୋର୍ଟରେ ଡିଏପି ଓ ପଟାସ ସାର ନକଲି ବୋଲି ଜଣାପଡ଼ିଛି । ଯାହା ପରେ ନୀଳଗିରି କୃଷି ବିଭାଗ ଓ ସ୍ଥାନୀୟ ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ପାଇଁ ପଦକ୍ଷେପ ନିଆଯାଇଛି । ତେବେ ଲାଇସେନ୍ସ ନଥାଇ ଭଦ୍ରକରୁ ସାର ଆଣି FPO ନୀଳଗିରିରେ ଚାଷୀଙ୍କୁ କେମିତି ବଣ୍ଟନ କଲା ତାହା ପ୍ରଶ୍ନ ସୃଷ୍ଟି କରିଛି ।

ନୀଳଗିରି ବ୍ଲକର କେଉଁ ପଞ୍ଚାୟତରେ, କେତେ ଚାଷୀଙ୍କୁ, କେତେ ପରିମାଣର ନକଲି ଡିଏପି ଓ ପଟାସ ସାର ଯୋଗାଣ କରାଯାଇଛି ସେନେଇ ମଧ୍ୟ ପ୍ରଶାସନ ପାଖରେ କୌଣସି ତଥ୍ୟ ନାହିଁ । ତେଣୁ ଏହି ନକଲି ସାର ପ୍ରସଙ୍ଗ ଏବେ ଜଟିଳ ହେବାକୁ ବସିଲାଣି ।