ବିଜ୍ଞାନ ଓ ଗବେଷଣାର ନୂଆ ଦିଗ ଦେଖାଉଛି ଓଡ଼ିଶା । ଭୁବନେଶ୍ୱରସ୍ଥିତ ନାଇଜରର ୧୫ତମ ସମାବର୍ତ୍ତନ ଉତ୍ସବରେ ଦେଶର ଭବିଷ୍ୟତ ଯୁବ ବୈଜ୍ଞାନିକଙ୍କୁ ନୂଆ ଦାୟିତ୍ୱର ଆହ୍ୱାନ ଦେଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ସେ କହିଛନ୍ତି, ଦେଶର ଆଗାମୀ ବିକାଶ ଯାତ୍ରା ଯୁବ ବୈଜ୍ଞାନିକଙ୍କ ନୂଆ ଚିନ୍ତାଧାରା ଓ ଗବେଷଣା ଉପରେ ନିର୍ଭର କରୁଛି ।

ଭୁବନେଶ୍ୱରସ୍ଥିତ ନାଇଜରର ୧୫ତମ ସମାବର୍ତ୍ତନ ଉତ୍ସବ ଗୁରୁବାର ଅନୁଷ୍ଠିତ ହୋଇଛି । ଏହି ଅବସରରେ ଉପରାଷ୍ଟ୍ରପତି ସି.ପି. ରାଧାକ୍ରିଷ୍ଣନଙ୍କ ଉପସ୍ଥିତିରେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୁବ ବୈଜ୍ଞାନିକମାନଙ୍କୁ ସମାଜର କଲ୍ୟାଣ ପାଇଁ ଗବେଷଣାକୁ ଆଗକୁ ନେବାକୁ ଆହ୍ୱାନ ଦେଇଛନ୍ତି ।

ସମ୍ମାନିତ ଅତିଥି ଭାବେ ଯୋଗଦେଇ କୃତୀ ବିଦ୍ୟାର୍ଥୀମାନଙ୍କୁ ଅଭିନନ୍ଦନ ଜଣାଇବା ସହ ଦେଶର ବିକାଶରେ ସେମାନଙ୍କ ଭୂମିକା ଉପରେ ଆଲୋକପାତ କରିଛନ୍ତି କେନ୍ଦ୍ରମନ୍ତ୍ରୀ । ସେ କହିଛନ୍ତି, ନାଇଜର ହେଉଛି ଦେଶର ଏପରି ଏକ ବିରଳ ପ୍ରତିଷ୍ଠାନ ଯେଉଁଠାକୁ ମାତ୍ର କିଛି ବର୍ଷର ବ୍ୟବଧାନରେ ଦେଶର ତିନି ପ୍ରମୁଖ ଶୀର୍ଷ ବ୍ୟକ୍ତିତ୍ୱ ଆସିଛନ୍ତି । ୨୦୧୬ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନାଇଜର କ୍ୟାମ୍ପସର ଉଦଘାଟନ କରିଥିବା ବେଳେ, ପରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ଆଜି ଉପ-ରାଷ୍ଟ୍ରପତି ଏଠାକୁ ଆସିଛନ୍ତି ।

At the 15th Graduation Ceremony of NISER, Bhubaneswar. https://t.co/vAD9St16di

— Dharmendra Pradhan (@dpradhanbjp) July 9, 2026

ଏହି ଅବସରରେ ନାଇଜର ପକ୍ଷରୁ ଉପରାଷ୍ଟ୍ରପତିଙ୍କୁ ସମ୍ବଲପୁରୀ ଇକତ୍ ବସ୍ତ୍ରରେ ସମ୍ମାନିତ କରାଯାଇଥିବାରୁ ଧର୍ମେନ୍ଦ୍ର ପ୍ରଧାନ ଅନୁଷ୍ଠାନକୁ ଧନ୍ୟବାଦ ଜଣାଇଥିଲେ । ଏହା ଓଡ଼ିଶାର କଳା ଓ ସଂସ୍କୃତିକୁ ଜାତୀୟ ଓ ଅନ୍ତର୍ଜାତୀୟ ସ୍ତରରେ ପରିଚିତ କରାଇବାର ଏକ ପ୍ରୟାସ ବୋଲି ସେ କହିଥିଲେ ।

ତଥ୍ୟ ଅନୁଯାୟୀ, ଦେଶରେ ବର୍ତ୍ତମାନ ବିଜ୍ଞାନ, ପ୍ରଯୁକ୍ତିବିଦ୍ୟା, ଇଞ୍ଜିନିୟରିଂ ଏବଂ ଗଣିତ (ଷ୍ଟେମ) ଶିକ୍ଷା କ୍ଷେତ୍ରରେ ପୁଅମାନଙ୍କ ଅପେକ୍ଷା ଝିଅମାନଙ୍କ ସଂଖ୍ୟା ବୃଦ୍ଧି ପାଉଛି । ଜାତୀୟ ସ୍ତରରେ ଏହା ୪୩ ପ୍ରତିଶତ ଥିବାବେଳେ ନାଇଜର କ୍ୟାମ୍ପସରେ ମଧ୍ୟ ୪୦ ପ୍ରତିଶତ ଛାତ୍ରୀ ଅଧ୍ୟୟନ କରୁଛନ୍ତି, ଯାହାକି ଏକ ବହୁତ ସକାରାତ୍ମକ ସଙ୍କେତ । ନାଇଜର କ୍ୟାମ୍ପସରେ ଖୁବ୍ ଶୀଘ୍ର ଏକ କ୍ୟାନସର ରେଫରାଲ ହସ୍ପିଟାଲ ଓ ଗବେଷଣା କେନ୍ଦ୍ର ସ୍ଥାପିତ ହେବାକୁ ଯାଉଛି, ଯାହା ଚିକିତ୍ସା ବିଜ୍ଞାନ କ୍ଷେତ୍ରରେ ଏକ ଉଦାହରଣ ସୃଷ୍ଟି କରିବ ।

କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, ଭୁବନେଶ୍ୱର ଏବେ ବିଜ୍ଞାନ ଓ ଗବେଷଣାର ଏକ ପ୍ରେରଣା କେନ୍ଦ୍ର ଭାବେ ଉଭା ହେଉଛି । ଏମ୍ସ, ଇନଷ୍ଟିଚ୍ୟୁଟ୍ ଅଫ୍ ଫିଜିକ୍ସ, ଆଇଏଲଏସ, ଆଇଆଇଟି, ଆଇଏମଏମଟି ଏବଂ ନାଇଜର ପରି ସମ୍ମାନଜନକ ପ୍ରତିଷ୍ଠାନଗୁଡ଼ିକର ଉପସ୍ଥିତି ଏହି ସହରକୁ ଗବେଷଣା କ୍ଷେତ୍ରରେ ଏକ ନୂଆ ପରିଚୟ ଦେଇଛି ।

ସେ ଆହୁରି କହିଛନ୍ତି ଯେ, ନାଇଜର ଆଗାମୀ ଦିନରେ ଓଡ଼ିଶାରୁ କେରଳ ପର୍ଯ୍ୟନ୍ତ ‘ରେୟାର ଆର୍ଥ କରିଡର’ ପାଇଁ ଏକ ଗୁରୁତ୍ୱପୂର୍ଣ୍ଣ ରୋଡମ୍ୟାପ୍ ପ୍ରସ୍ତୁତ କରିପାରିବ । ଏହା ଦେଶର ଶିଳ୍ପ ଓ ପ୍ରଯୁକ୍ତି କ୍ଷେତ୍ରକୁ ନୂଆ ଶକ୍ତି ଦେବ । କେନ୍ଦ୍ରମନ୍ତ୍ରୀ ଛାତ୍ରଛାତ୍ରୀମାନଙ୍କୁ ପ୍ରେରଣା ଦେଇ ପୂର୍ବତନ ରାଷ୍ଟ୍ରପତି ଡ. ଏ.ପି.ଜେ. ଅବଦୁଲ କଲାମଙ୍କ ଉକ୍ତି "କାର୍ଯ୍ୟକାରୀ ଜ୍ଞାନ ହିଁ ପ୍ରତିକୂଳ ପରିସ୍ଥିତିକୁ ସମୃଦ୍ଧିରେ ପରିଣତ କରେ" ବୋଲି ଦୋହରାଇଥିଲେ ।

ଏହି ସମାବର୍ତ୍ତନ ଉତ୍ସବରେ ରାଜ୍ୟପାଳ ଡ. ହରିବାବୁ କମ୍ଭମପାଟି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବିଜ୍ଞାନ ଓ ପ୍ରଯୁକ୍ତିବିଦ୍ୟା ରାଷ୍ଟ୍ରମନ୍ତ୍ରୀ ଡ. ଜିତେନ୍ଦ୍ର ସିଂହଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଯୋଗଦେଇଥିଲେ ।