No Insurance No Petrol / ଓଡ଼ିଶାରେ ଲାଗୁ ହେବ କି 'No Insurance, No Petrol' ନିୟମ ? ଜାଣନ୍ତୁ କ'ଣ କହିଲେ ପରିବହନ ମନ୍ତ୍ରୀ...

ଓଡ଼ିଶାରେ ଲାଗୁ ହେବ କି 'No Insurance, No Petrol' ନିୟମ ? ବିନା ଇନସ୍ୟୁରାନ୍ସରେ ଗାଡ଼ି ଚଲାଉଥିବା ଚାଳକଙ୍କ ପାଇଁ ଏବେ ଆସିବାକୁ ଯାଉଛି ବଡ଼ ଅସୁବିଧା । ସଡ଼କ ଦୁର୍ଘଟଣାରେ କ୍ଷତିପୂରଣ ଓ ଲୋକଙ୍କ ସୁରକ୍ଷିତ ଜୀବନକୁ ଗୁରୁତ୍ୱ ଦେଇ ସୁପ୍ରିମକୋର୍ଟ ଏକ ପାଇଲଟ୍ ପ୍ରୋଜେକ୍ଟ ନିର୍ଦ୍ଦେଶ ଦେବା ପରେ ଏବେ ରାଜ୍ୟରେ ଏହାକୁ ନେଇ ଚର୍ଚ୍ଚା ଜୋର ଧରିଛି । ଓଡ଼ିଶାରେ ଏହି ନିୟମ କାର୍ଯ୍ୟକାରୀ ହେବା ନେଇ ରାଜ୍ୟ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା କହିଛନ୍ତି, ସୁପ୍ରିମକୋର୍ଟଙ୍କ ନିର୍ଦ୍ଦେଶ ଏକ ସମ୍ବେଦନଶୀଳ ପ୍ରସଙ୍ଗ ଏବଂ ଏହାକୁ ଗାମ୍ଭୀର୍ଯ୍ୟର ସହ ବିଚାର କରାଯାଉଛି । ଲୋକଙ୍କ ସୁରକ୍ଷା ପାଇଁ ଯାହା ଆବଶ୍ୟକ ପଦକ୍ଷେପ, ତାହା ଗ୍ରହଣ କରାଯିବ ।

No Insurance No Petrol କୁ ନେଇ ସୁପ୍ରିମକୋର୍ଟ ବିଚାରପତି ସଞ୍ଜୟ କରୋଲ ଏବଂ ପ୍ରଶାନ୍ତ କୁମାର ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ କେନ୍ଦ୍ର ସରକାରଙ୍କୁ ଅର୍ଥାତ IRDAI ଏବଂ ସଡ଼କ ପରିବହନ ମନ୍ତ୍ରଣାଳୟଙ୍କୁ ଏକ ପାଇଲଟ୍ ପ୍ରୋଜେକ୍ଟ ପ୍ରସ୍ତୁତ କରିବାକୁ କହିଛନ୍ତି । ଯେଉଁ ଗାଡ଼ିଗୁଡ଼ିକର ବୈଧ ଥାର୍ଡ-ପାର୍ଟି ଇନ୍‌ସ୍ୟୁରାନ୍ସ ନଥିବ, ସେଗୁଡ଼ିକୁ ପେଟ୍ରୋଲ୍ ପମ୍ପରେ ଇନ୍ଧନ ଦିଆଯିବ ନାହିଁ । ଏହା ଏ ପର୍ଯ୍ୟନ୍ତ ସମଗ୍ର ଦେଶରେ ସ୍ଥାୟୀ ନିୟମ ଭାବେ ଲାଗୁ ହୋଇନାହିଁ । କେବଳ ଏକ ପାଇଲଟ୍ ପ୍ରୋଜେକ୍ଟ ଭାବେ ଆରମ୍ଭ କରିବାକୁ କୁହାଯାଇଛି । ପେଟ୍ରୋଲିୟମ ମନ୍ତ୍ରଣାଳୟ ମଧ୍ୟ ଏହି ପ୍ରସ୍ତାବରେ କୌଣସି ଆପତ୍ତି ନାହିଁ ।

କୋର୍ଟ ଏଭଳି ପଦକ୍ଷେପ କାହିଁକି ନେଲେ ?

ଅଧିକାଂଶ ଗାଡ଼ି ବିନା ବୀମାରେ ଚାଲୁଛି । ସରକାରୀ ତଥ୍ୟ ଅନୁଯାୟୀ, ଦେଶର ମୋଟ ପଞ୍ଜିକୃତ ଗାଡ଼ି ମଧ୍ୟରୁ ପ୍ରାୟ ୫୬ ପ୍ରତିଶତ ଗାଡ଼ି ଅର୍ଥାତ ପ୍ରାୟ ୧୬.୫୪ କୋଟି ଗାଡ଼ି ବିନା ଇନ୍‌ସ୍ୟୁରାନ୍ସରେ ରାସ୍ତାରେ ଚାଲୁଛି । ଗାଡ଼ିର ବୀମା ନଥିବା କାରଣରୁ ସଡ଼କ ଦୁର୍ଘଟଣାରେ ଶିକାର ହେଉଥିବା ପରିବାର ଗୁଡ଼ିକ ସଠିକ୍ ସମୟରେ କ୍ଷତିପୂରଣ ପାଇପାରୁ ନାହାନ୍ତି ଏବଂ ବର୍ଷ ବର୍ଷ ଧରି ଆଇନଗତ ଲଢ଼େଇ କରିବାକୁ ପଡ଼ୁଛି ।

ଏହି ବ୍ୟବସ୍ଥା କିପରି କାମ କରିବ

ପେଟ୍ରୋଲ ପମ୍ପଗୁଡ଼ିକରେ ଅଟୋମେଟିକ୍ କ୍ୟାମେରା ଲଗାଯାଇ ଗାଡ଼ିର ନମ୍ବର ପ୍ଲେଟ୍ ସ୍କାନ୍ କରାଯିବ । ଏହି କ୍ୟାମେରାଗୁଡ଼ିକ 'ଭାହନ' (VAHAN) ପୋର୍ଟାଲ୍ ଏବଂ ଇନ୍‌ସୁରାନ୍ସ ଡାଟାବେସ୍ ସହ ସଂଯୁକ୍ତ ରହିବ। ଗାଡ଼ିର ବୀମା ନଥିଲେ ସିଷ୍ଟମ୍ ଜରିଆରେ ପେଟ୍ରୋଲ୍ ଦେବା ବନ୍ଦ କରାଯିବ ।

ଓଡ଼ିଶାରେ ଲାଗୁ ହେବ କି No Insurance No Petrol ? ପରିବହନ ମନ୍ତ୍ରୀ କହିଛନ୍ତି ସୁପ୍ରିମକୋର୍ଟ ଦେଇଥିବା ନିର୍ଦ୍ଦେଶ ସମ୍ବେଦନଶୀଳ ପ୍ରସଙ୍ଗ । ଏହାକୁ ବିଚାର କରାଯାଉଛି । ରାଜ୍ୟରେ ୯୭ ଲକ୍ଷ ଗାଡ଼ି ପଞ୍ଜିକରଣ ହୋଇଛି । ଇନସୁରାନ୍ସ ନଥିବା ଗାଡିର ସଂଖ୍ୟା ଅଧିକ ଅଛି । ଥାର୍ଡ ପାର୍ଟି ଇନସୁରାନ୍ସକୁ ସୁପ୍ରିମକୋର୍ଟଙ୍କ ଗୁରୁତ୍ୱ ଦେଇଛନ୍ତି । ଏବେ ସୁପ୍ରିମକୋର୍ଟ ଯେଉଁ ନିର୍ଦ୍ଦେଶ ଦେଇଛନ୍ତି ତାକୁ ମଧ୍ୟ କଡ଼ାକଡ଼ି କାର୍ଯ୍ୟକାରୀ କରାଯିବ । ଲୋକଙ୍କ ସୁରକ୍ଷିତ ଜୀବନ ପାଇଁ ଯାହା ଆବଶ୍ୟକ ପଦକ୍ଷେପ ନିଆଯିବ ।

ପୂର୍ବରୁ ନୋ ପଲ୍ୟୁସନ୍‌ -ନୋ ଫୁଏଲର ନିୟମ ହୋଇଥିଲା । ସେତେବେଳେ ଲୋକମାନେ ପଲ୍ୟୁସନ ସାର୍ଟିଫିକେଟ ବାହାର କରିଥିଲେ । ଏବେ ସୁପ୍ରିମକୋର୍ଟଙ୍କ No Insurance, No Petrol ନିର୍ଦ୍ଦେଶ ପରେ ରାଜ୍ୟରେ ଲୋକମାନେ ମଧ୍ୟ ଗାଡିର ଇନସୁରାନ୍ସ କରିବେ ବୋଲି ଆଶା ପ୍ରକଟ କରିଛନ୍ତି ପରିବହନ ମନ୍ତ୍ରୀ ।