Argus News - ଡିସେମ୍ବର ୩୧ ତାରିଖ ରାତିରେ ମହାପ୍ରଭୁଙ୍କୁ ରାତି ଅନିଦ୍ରା ନ କରିବାକୁ ଚିଠି

ମହାପ୍ରଭୁଙ୍କ ନିଦ୍ରା ଆଗ ନା ମଧ୍ୟ ରାତ୍ରରୁ ମହାପ୍ରଭୁଙ୍କୁ ଉଠାଇ ଭକ୍ତଙ୍କ ଦର୍ଶନ କରାଇବା ଆଗ ? ଏବେ ଏହାକୁ ନେଇ ଦ୍ୱନ୍ଦ ଉପୁଜିଥିବା ବେଳେ ଦୋଛକିରେ କୋଟି କୋଟି ଜଗନ୍ନାଥପ୍ରେମୀ । ପ୍ରତ୍ୟେକ ବର୍ଷ ନୂଆବର୍ଷ ପୂର୍ବ ରାତିରେ ଶୀଘ୍ର ଦ୍ୱାରଫିଟା ହୋଇ ରାତି ତମାମ୍ ଦର୍ଶନ ଚାଲୁଥିବା ବେଳେ ଚଳିତ ଡିସେମ୍ବର ୩୧ ରାତିରେ ଏହି ବ୍ୟବସ୍ଥାରେ ପରିବର୍ତ୍ତନ ଆସିବ କି ସେନେଇ ପ୍ରଶ୍ନ ଉଠିଛି ।

ଡିସେମ୍ବର ୩୧ ସଂଧ୍ୟାରୁ ବ୍ୟାରିକେଡ୍‌ରେ ଭକ୍ତଙ୍କ ଲମ୍ବା ଲାଇନ୍ ଦେଖିବାକୁ ମିଳିଥିବା ବେଳେ ନୂଆବର୍ଷ ଆରମ୍ଭରୁ ମହାପ୍ରଭୁଙ୍କ ଦର୍ଶନ ସହ ଆର୍ଶୀବାଦ ନେବାକୁ ଶ୍ରୀକ୍ଷେତ୍ରରେ ପ୍ରବଳ ଭକ୍ତଙ୍କ ଭିଡ଼ ପରିଲକ୍ଷିତ ହୁଏ । ତେବେ ଡିସେମ୍ବର ୩୧ ତାରିଖ ରାତିରେ ମହାପ୍ରଭୁଙ୍କୁ ରାତି ଅନିଦ୍ରା ନ କରିବା ସହ ଅର୍ଦ୍ଧ ରାତିରେ ଶ୍ରୀମନ୍ଦିର ନ ଖୋଲିବାକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ, ଗଜପତି ମହାରାଜା ଓ ଆଇନମନ୍ତ୍ରୀଙ୍କୁ ଚିଠି ଲେଖିଛନ୍ତି ପରିଚାଳନା କମିଟିର ସଦସ୍ୟ ପଣ୍ଡିତ ମହେଶ ସାହୁ ।

କିଛି ବର୍ଷ ହେବ ଡିସେମ୍ବର ୩୧ ତାରିଖ ମଧ୍ୟରାତ୍ରରୁ ଭକ୍ତଙ୍କ ଦର୍ଶନ ହେଉଥିବା ବେଳେ ମହାପ୍ରଭୁଙ୍କୁ ମଧ୍ୟ ରାତ୍ରି ଅନିଦ୍ରା ରଖାଯାଉଛି । ଯାହାକି ଧାର୍ମିକ ତଥା ପରମ୍ପରା ଦୃଷ୍ଟିକୋଣରୁ ଆଦୌ ସମୀଚିନ ଅନୁଭବ ହେଉନାହିଁ ବୋଲି ଚିଠିରେ ଉଲ୍ଲେଖ କରିଛନ୍ତି ପଣ୍ଡିତ ମହେଶ ସାହୁ । ତେଣୁ ଜାନୁଆରୀ ୧ ତାରିଖ ପାଇଁ ମହାପ୍ରଭୁଙ୍କୁ ରାତି ଅନିଦ୍ରା ନକରି ସ୍ୱଭାବିକ୍ ଭାବେ ମହାପ୍ରଭୁଙ୍କ ଦୈନନ୍ଦିନ ନୀତିକାନ୍ତି ଅନୁଷ୍ଠିତ କରିବାକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ, ଗଜପତି ମହାରାଜା ଓ ଆଇନମନ୍ତ୍ରୀଙ୍କୁ ଚିଠି ଲେଖିଛନ୍ତି ପରିଚାଳନା କମିଟିର ସଦସ୍ୟ ପଣ୍ଡିତ ମହେଶ ସାହୁ । ସେପଟେ ମହେଶ ସାହୁଙ୍କ ଏଭଳି ପ୍ରସଙ୍ଗକୁ ସମର୍ଥନ ଜଣାଇଛନ୍ତି ଉଭୟ ଭକ୍ତ ଏବଂ ସେବାୟତ ।