North Odisha Flood / ଉତ୍ତର ଓଡ଼ିଶାକୁ ପୁଣି ବନ୍ୟା ଆଶଙ୍କା, ବିପଦ ସଙ୍କେତ ଛୁଇଁଲା ଜଳକା ଓ ବୈତରଣୀ

ଏବେ ଉତ୍ତର ଓଡ଼ିଶାରେ ପୁଣି ବନ୍ୟାର ବଡ଼ ବିପଦ । ଲଘୁଚାପଜନିତ ଲଗାଣ ବର୍ଷା ଓ ଶିମିଳିପାଳ ସମେତ ଉପରମୁଣ୍ଡରେ ହୋଇଥିବା ପ୍ରବଳ ବର୍ଷା ଯୋଗୁଁ ଫୁଲୁଛି ଉତ୍ତର ଓଡ଼ିଶାର ପ୍ରମୁଖ ନଦୀ । ଡରାଉଛି ବୈତରଣୀ, ବୁଢ଼ାବଳଙ୍ଗ, ସୁବର୍ଣ୍ଣରେଖା ଓ ଜଳକା । ବୁଢ଼ାବଳଙ୍ଗର ଜଳସ୍ତର ବଢ଼ୁଥିବାରୁ ବାରିପଦା ପୌରାଞ୍ଚଳର ଅନେକ ୱାର୍ଡ ଓ ତଳିଆ ସାହିରେ ବନ୍ୟା ଜଳ ପ୍ରବେଶ କରିସାରିଛି । ତଳିଆ ଅଞ୍ଚଳରୁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । ଅନ୍ୟପଟେ ଯାଜପୁର ଦଶରଥପୁର ବ୍ଲକରେ ବୈତରଣୀ ଓ କାଣୀ ନଦୀର ପୂର୍ବ ଘାଇ ବାଟେ ପୁଣି ଗାଁ ଭିତରକୁ ବନ୍ୟା ପାଣି ମାଡ଼ିଆସିଛି । ବ୍ୟାପକ ଫସଲ ନଷ୍ଟ ହୋଇଥିବା ବେଳେ ଅନେକ ଗାଁ ଏବେ ଜଳବନ୍ଦୀ ।

ପ୍ରଥମ ବନ୍ୟା ଜଳ ନ ଛାଡୁଣୁ ଏବେ ଉତ୍ତର ଓଡ଼ିଶାରେ ପୁଣି ହୋଇପାରେ ବନ୍ୟା । ଡରାଉଛି ବୈତରଣୀ, ବୁଢାବଳଙ୍ଗ, ଜଳକା । ଶିମିଳିପାଳ ଅଭୟାରଣ୍ୟ ଏବଂ ଏହାର ଆଖପାଖ ଅଂଚଳରେ ପ୍ରବଳ ବର୍ଷା ଯୋଗୁଁ ମୟୂରଭଞ୍ଜରେ ବୁଢାବଳଙ୍ଗର ଜଳସ୍ତର ବଢିବାରେ ଲାଗିଛି । ବିଭିନ୍ନ ଛୋଟ ବଡ଼ ଶାଖା ନଦୀ ଓ ନାଳରେ ପାଣି ବୃଦ୍ଧି ପାଉଛି । ନଦୀର ଜଳପତନ ବୃଦ୍ଧି ପାଇବା ଫଳରେ ବାରିପଦା ପୌରାଞ୍ଚଳ ଅଧୀନ ୭ ଓ ୯ ନମ୍ବର ଓ୍ବାର୍ଡ, ମଧୁବନ ସମେତ ବିଭିନ୍ନ ତଳିଆ ସାହି ଓ ବସ୍ତି ଅଞ୍ଚଳରେ ବନ୍ୟା ଜଳ ପ୍ରବେଶ କରିଛି । ବାରିପଦା ସହର ସମେତ, ବଡ଼ସାହି ଓ ବେତନଟୀରେ ଓଡ୍ରାଫ୍ ମୁତୟନ କରାଯାଇଛି । ପ୍ରଶାସନ ପକ୍ଷରୁ ତୁରନ୍ତ ତଳିଆ ଅଞ୍ଚଳରୁ ପ୍ରଭାବିତ ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । ​ଜିଲ୍ଲା ଅତିରିକ୍ତ ଜିଲ୍ଲାପାଳ, ତହସିଲଦାର, ବିଡିଓ ଏବଂ ବରିଷ୍ଠ ଅଧିକାରୀମାନେ ସ୍ଥିତି ଅନୁଧ୍ୟାନ କରିଛନ୍ତି ।

ଖାଲି ବୁଢାବଳଙ୍ଗ କାହିଁକି ବୈତରଣୀ ନଦୀରରେ ପୁଣି ବନ୍ୟା ଆସିଛି । ବେହାଲ ହୋଇଯାଇଛି ଦଶରଥପୁର ବ୍ଲକ । ପୂର୍ବ ବନ୍ୟାରେ ବୈତରଣୀର ଶାଖା କାଣୀ ନଦୀର ଡୋଭାବିଲ ପାଟଣାରେ ସୃଷ୍ଟି ହୋଇଥିବା ଘାଇ ବାଟେ ପୁଣି ଗାଁକୁ ବନ୍ୟପାଣି ମାଡୁଛି । ତଳିଆ ଅଞ୍ଚଳରେ ସ୍ଥିତି ଗମ୍ଭୀର । ଦଶରଥପୁର ବ୍ଲକର ଅନେକ ଗାଁରେ ଲୋକେ ଜଳବନ୍ଦୀ ହୋଇ ରହିଛନ୍ତି । ବ୍ୟାପକ ଚାଷଜମି ଜଳମଗ୍ନ ହୋଇଛି । ଧାନ ଓ ପନିପରିବା ଫସଲ ସମ୍ପୂର୍ଣ୍ଣ ଉଜୁଡ଼ି ଯାଇଛି । ଅନେକ ସ୍ଥାନରେ ଗାଁ ଦାଣ୍ଡରେ ଲହଡି ମାରୁଛି ବନ୍ୟାଜଳ ।

ସେପଟେ ବିପଦ ସଙ୍କେତ ଛୁଇଁଲା ଜଳକା । ଲଘୁଚାପଜନିତ ଲଗାଣ ବର୍ଷା ଯୋଗୁଁ ବାଲେଶ୍ୱର ଜିଲ୍ଲାର ଜଳକା ନଦୀର ଜଳସ୍ତର କ୍ରମଶଃ ବୃଦ୍ଧି ପାଇ ବିପଦ ସଙ୍କେତ ଛୁଇଁଛି । ବସ୍ତା ବ୍ଲକ୍ ମଥାନୀଠାରେ ଜଳକା ନଦୀ ବିପଦ ସଙ୍କେତ ପାଖାପାଖି ପ୍ରବାହିତ ହେଉଛି । ସେହିପରି ରାଜଘାଟଠାରେ ସତର୍କ ସଙ୍କେତ ଉପରେ ପ୍ରବାହିତ ହେଉଛି ସୁବର୍ଣ୍ଣରେଖା । ଏନଏଚ-୫ ଠାରେ ସତର୍କ ସଙ୍କେତ ଉପରେ ପ୍ରବାହିତ ହେଉଛି ବୁଢ଼ାବଳଙ୍ଗ ।

ଜଳେଶ୍ଵରରେ ବିପଦ ସଙ୍କେତ ଟପିଲା ସୁବର୍ଣ୍ଣରେଖା । ରାଜଘାଟଠାରେ ସୁବର୍ଣ୍ଣରେଖାର ବିପଦ ସଂକେତ ଉପରେ ପ୍ରବାହିତ ହେଉଛି । ଭୋଗରାଇ, ବାଲିଆପାଳ, ଜଳେଶ୍ଵର ବ୍ଲକର ତଳିଆ ଅଞ୍ଚଳରେ ପଶୁଛି ସୁବର୍ଣ୍ଣରେଖା ନଦୀର ତୃତୀୟ ବନ୍ୟା ପାଣି । ରାତି ୧୧ ବେଳକୁ ସର୍ବାଧିକ ୧୧.୧୭ମି ଛୁଇଁବା ପୂର୍ବାନୁମାନ ।
ଜଳସମ୍ପଦ ବିଭାଗର ସୁଚନା ଅନୁଯାୟୀ ଉପର ମୁଣ୍ଡରେ ପ୍ରବଳ ବର୍ଷା ଯୋଗୁଁ ଜଳସ୍ତର ବଢିବାରେ ଲାଗିଛି । ବର୍ଷା ଯେତିକି ଯେତିକି ବଢୁଛି, ବନ୍ୟା ଆଶଙ୍କାରେ ତଳିଆ ଅଂଚଳ ଲୋକଙ୍କ ଭିତରେ ଛନକା ପଶିଛି ।