Argus News - ସରକାରଙ୍କ ଘୋଷଣା ପରେ ଛାନିଆ ବିଜେଡି ଓ କଂଗ୍ରେସ !

ନୂଆପଡ଼ା ଉପନିର୍ବାଚନ ଉପରେ ଏବେ ସବୁ ଦଳର ଫୋକସ୍ । ଆଦିବାସୀ ଭୋଟ ଆଶାରେ ଘାସିରାମ ମାଝୀଙ୍କୁ କଂଗ୍ରେସ ଟିକେଟ ଦେଇଥିବା ବେଳେ କାଲିଠୁ ପଦଯାତ୍ରା କରି କ୍ୟାମ୍ପେନ କରିବ ବିଜେଡି । ଅନ୍ୟପକ୍ଷରେ ଖୁବଶୀଘ୍ର ପ୍ରାର୍ଥୀ ଘୋଷଣା କରିବ ବିଜେପି। ଦୁଇ ଦିନ ତଳେ ନୂଆପଡ଼ାରେ ବିଜେପି ସରକାରର ବଡ଼ ଘୋଷଣା ପରେ ବିରୋଧୀ ବିଜେଡି ଓ କଂଗ୍ରେସକୁ ଏବେଠୁ ଘାରିଲାଣି ହାରିବା ଭୟ ।

ଏହାସହ ପଢ଼ନ୍ତୁ:- ସତରେ IPS ଅଧିକାରୀଙ୍କ ଉପରେ କ'ଣ ଏତେ ଚାପ ଥାଏ ? ଶେଷରେ ଜୀବନ ହାରିବାକୁ ପଡ଼େ !

ତାରିଖ ଘୋଷଣା ପରେ ପ୍ରଥମ ଦଳ ଭାବେ ନୂଆପଡା ଉପନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିଛି କଂଗ୍ରେସ । ପୂର୍ବ ଥର ଦଳ ଟିକେଟ ନଦେବାରୁ ସ୍ଵାଧୀନ ଛିଡ଼ା ହୋଇଥିବା ଘାସିରାମ ମାଝୀଙ୍କୁ କଂଗ୍ରେସ ଦେଇଛି ଟିକେଟ । ୨୪ ନିର୍ବାଚନରେ ନିଜ ଦମ୍ ଦେଖାଇ ୫୦ ହଜାରରୁ ଉର୍ଦ୍ଧ୍ଵ ଭୋଟ ସହ ଦ୍ଵିତୀୟ ସ୍ଥାନରେ ରହିଥିଲେ ଘାସିରାମ । ଆଉ ତତ୍କାଳୀନ ପିସିସି ସଭାପତି ଶରତ ପଟ୍ଟନାୟକଙ୍କୁ ନୂଆପଡ଼ା ଟିକେଟ ଦେବା ଯେ ଦଳର ଭୁଲ ନିଷ୍ପତି ଥିଲା ତାହା ପ୍ରମାଣିତ କରି ଦେଇଥିଲେ । ତେବେ ଏଥର ତାଙ୍କ ଉପରେ ଭରସା କରିଥିବାରୁ ଦଳକୁ ଧନ୍ୟବାଦ ଦେବା ସହ ବିଜୟ ଲାଗି ବେଶ ଆଶାବାଦୀ ଅଛନ୍ତି ଘାସିରାମ ।

ସେପଟେ ଶାସନ ଗାଦି ଗଲା ପରେ ପ୍ରଥମ ଥର ଉପନିର୍ବାଚନ ସାମ୍ନା କରୁଥିବା ବିଜେଡିକୁ ଗଡ ବଞ୍ଚାଇବା ଚିନ୍ତା ଘାରିଛି । ତେଣୁ ପ୍ରାର୍ଥୀ ଘୋଷଣା କରିନଥିଲେ ବି କାଲିଠୁ ପଦଯାତ୍ରା ମାଧ୍ୟମରେ କ୍ୟାମ୍ପେନ ଆରମ୍ଭ କରିବ ବୋଲି ସଜବାଜ ହେଲାଣି ଦଳ । ଆଉ ଏହାରି ଭିତରେ ପୂର୍ବତନ ବିଧାୟକ ସ୍ଵର୍ଗତ ରାଜେନ୍ଦ୍ର ଢୋଲକିଆଙ୍କ ପୁଅ ଜୟ ଢୋଲକିଆଙ୍କୁ ପ୍ରାର୍ଥୀ କରିବ ବୋଲି ସଙ୍କେତ ଦେଇଛି ବିଜେଡି । ଦଳର ବରିଷ୍ଠ ନେତା ତଥା ଉପସଭାପତି ଦେବୀ ମିଶ୍ର କହିଛନ୍ତି, ଢୋଲକିଆ ପରିବାରରୁ ଜଣଙ୍କୁ ଟିକେଟ ମିଳୁ ବୋଲି ସ୍ଥାନୀୟ ବିଜେଡି ନେତାଙ୍କ ଆବେଗ ଅଛି । ଅନ୍ୟପଟେ ବିଜେପି ମଧ୍ୟ ଖୁବଶୀଘ୍ର ପ୍ରାର୍ଥୀ ଘୋଷଣା କରିବ ବୋଲି କହିଛନ୍ତି ଦଳର ରାଜ୍ୟ ପ୍ରଭାରୀ ।

ଏହାସହ ପଢ଼ନ୍ତୁ:- ରାଗିନୀ ଦାଶଙ୍କୁ ନେଇ ଏବେ ସବୁଠି ଚର୍ଚ୍ଚା, ହେଲେ କାହିଁକି ? କ'ଣ କରିଛନ୍ତି ସେ...

ନୂଆପଡାରେ କିଏ ମାରିବ ବାଜି ? ଗୋଟିଏପଟେ ଅନୁକମ୍ପା କାର୍ଡ ଅନ୍ୟପଟେ ଆଦିବାସୀ ଭୋଟ ବ୍ୟାଙ୍କ ପାଇଁ ରଣନୀତି । ସରକାରୀ ଦଳ ପାଖରେ ବିକାଶର ପ୍ରତିଶ୍ରୁତି । ଭରସା, ପ୍ରତିଶ୍ରୁତି ଓ ପୁଳା ପୁଳା ପ୍ରଶ୍ନ ଭିତିରେ ବିଜେଡି -ବିଜେପି ପ୍ରାର୍ଥୀଙ୍କ ଉପରେ ସମସ୍ତଙ୍କ ନଜର ।