Bhesamati Naik / ଆସିଲା ନିମନ୍ତ୍ରଣ; ରାଷ୍ଟ୍ରପତିଙ୍କ ସହ ରାତ୍ରିଭୋଜନ କରିବେ ଏହି ଓଡ଼ିଆ ଝିଅ

ନୂଆଦିଲ୍ଲୀ: ରାଷ୍ଟ୍ରପତି ଭଵନରୁ ଆସିଲା ନିମନ୍ତ୍ରଣ । ଝାରସୁଗୁଡା ଜିଲ୍ଲାର ଲଇକେରା ବ୍ଲକ ତିଲେଇମାଲର ଝିଅ ଭେସମତି ନାଏକ ଅଗଷ୍ଟ ୧୫ ସ୍ବାଧୀନତା ଦିବସରେ ରାଷ୍ଟ୍ରପତି ଭବନ ଯିବେ । ଦିଲ୍ଲୀ ଲାଲକିଲ୍ଲାରେ ମହାମହିମ ରାଷ୍ଟ୍ରପତିଙ୍କ ପତାକା ଉତ୍ତୋଳନ କାର୍ଯ୍ୟକ୍ରମରେ ଯୋଗଦେବା ସହ ରାତ୍ରି ଭୋଜନରେ ସାମିଲ ହେବେ । ନିମନ୍ତ୍ରଣ ପତ୍ର ପାଇବା ପରେ ଭେସମତି ନାଏକଙ୍କ ଖୁସି କହିଲେ ନସରେ । ଏଥିଲାଗି ସେ ବେଶ ଖୁସିଥିବା ପ୍ରକାଶ କରିଛନ୍ତି ।

ଭୁବନେଶ୍ଵରରେ ଦୀନଦୟାଲ ଉପାଧ୍ୟାୟ ଗ୍ରାମୀଣ କୌଶଳ ଯୋଜନା (DDU-GKY)ରେ ୨୦୧୫ ମସିହାରେ ଶିକ୍ଷାଗ୍ରହଣ କରିବା ସହ ପ୍ରଶିକ୍ଷଣ ନେଉଥିଲେ । ଗୋଟିଏ ବର୍ଷ ପଢିବା ପରେ ଏବେ ସମ୍ବଲପୁର ଆଇ ଆଇ ଏମ ଆଟେଡେଣ୍ତ ଭାବେ କାର୍ଯ୍ୟରତ ଅଛନ୍ତି । ଜୁଲାଇ ୩୧ ତାରିଖରେ ନିମନ୍ତ୍ରଣ ମିଳିବା ପରେ ଭେସମତି ନାଏକ ବେଶ ଖୁସି ଅଛନ୍ତି । ଏଥିପାଇଁ ସେ ମହାମହିମ ରାଷ୍ଟ୍ରପତି ଦୌପଦୀ ମୁର୍ମୁ ଓ ସମ୍ବଲପୁର IIM ନିର୍ଦ୍ଦେଶକ ମହାଦେବ ଜୟସ୍ଵାଲଙ୍କୁ ଧନ୍ୟବାଦ ଜଣାଇଛନ୍ତି ।

ଏଠାରେ କହିରଖୁଛୁ କି, ଦୀନଦୟାଲ ଉପାଧ୍ୟାୟ ଗ୍ରାମୀଣ କୌଶଳ ଯୋଜନା ହେଉଛି ଭାରତ ସରକାରଙ୍କ ଗ୍ରାମୀଣ ବିକାଶ ମନ୍ତ୍ରଣାଳୟର ଏକ ପ୍ରମୁଖ ଦକ୍ଷତା ବିକାଶ ଓ ନିଯୁକ୍ତି କାର୍ଯ୍ୟକ୍ରମ । ଏହା ଗ୍ରାମାଞ୍ଚଳର ଗରିବ ଯୁବକସମୂହଙ୍କୁ ବୃତ୍ତିଗତ ପ୍ରଶିକ୍ଷଣ ଦେଇ ଆର୍ଥିକ ଭାବେ ସ୍ୱାବଲମ୍ବୀ କରିଥାଏ । ଗ୍ରାମୀଣ ଅଞ୍ଚଳର ୧୫ରୁ ୩୫ ବର୍ଷ ବୟସ୍କ ଯୁବକଯୁବତୀଙ୍କୁ ମାଗଣା ପ୍ରଶିକ୍ଷଣ ଦିଆଯାଏ । ପ୍ରଶିକ୍ଷଣ ପରେ ଦକ୍ଷତା ଅନୁଯାୟୀ ନିଶ୍ଚିତ ଚାକିରି ଯୋଗାଇ ଦିଆଯାଏ ।

• DDU-GKYରେ ମିଳିଛି ରୋଜଗାର

ତେବେ ଏହି ଯୋଜନାରେ ଭେସମତି ନାଏକ ଭୁବନେଶ୍ଵରରେ ରହି ପାଠ ପଢିବା ପରେ ରାଜ୍ୟ ବାହାରେ ହୋଟେଲ ମ୍ୟାନେଜମେଣ୍ଟ ଟ୍ରେନିଂ ନେଇଥିଲେ । ଏହାପରେ ୨୦୨୦ କୋଭିଡ ସମୟରୁ ସେ IIMରେ ଚାକିରି କରୁଛନ୍ତି । ତାଙ୍କ ସମସ୍ତ ସହପାଠୀଙ୍କ ମଧ୍ୟରୁ ସେ ଜଣେ ମାତ୍ର ଏଯାବତ ଚାକିରି କରୁଥିବା କହିଛନ୍ତି । ଏଥିଲାଗି ତାଙ୍କୁ ରାଷ୍ଟ୍ରପତି ଭବନରୁ ନିମନ୍ତ୍ରିତ କରାଯାଇଛି । ତେବେ ନୂଆଦିଲ୍ଲୀ ଗସ୍ତ କରି ରାଷ୍ଟ୍ରପତିଙ୍କୁ ଭେଟିବା ଓ ତାଙ୍କ ସହ ରାତ୍ରି ଭୋଜନ କରିବାକୁ ସେ ବେଶ ଉତ୍ସାହିତ ଥିବା କହିଛନ୍ତି । ସ୍ଵାଧୀନତା ଦିବସ ଅବସରରେ ରାଷ୍ଟ୍ରପତି ନୂଆଦିଲ୍ଲୀସ୍ଥିତ ରାଷ୍ଟ୍ରପତି ଭବନରେ ଏକ ସ୍ୱତନ୍ତ୍ର ସମ୍ବର୍ଦ୍ଧନା ଓ ରାତ୍ରିଭୋଜନ କାର୍ଯ୍ୟକ୍ରମର ଆୟୋଜନ କରିଥାନ୍ତି । ଏଥିରେ ଦେଶର ପ୍ରମୁଖ ନେତା ଓ ବିଶିଷ୍ଟ ବ୍ୟକ୍ତିମାନେ ଯୋଗ ଦିଅନ୍ତି ।