ଅର୍ଗସ ବ୍ୟୁରୋ : ସଂକଟରେ ଓଡ଼ିଆ ଭାଷା । ଓଡିଆ ଭାଷା ବିରୋଧରେ ଆରମ୍ଭ ହେଲାଣି ବଡ଼ ଷଡ଼ଯନ୍ତ୍ର । ଓଡ଼ିଆ ଭାଷାକୁ ବିଲୁପ୍ତ କରିବା ପାଇଁ ଝାଡ଼ଖଣ୍ଡରେ ଚାଲିଛି ଚକ୍ରାନ୍ତ । ଏଭଳି ଚକ୍ରାନ୍ତ ଦେଖିବାକୁ ମିଳିଛି, ଝାଡ଼ଖଣ୍ଡରେ ଥିବା ଚାଇବସା ସ୍ଥିତ କୋଲହାନ ବିଶ୍ବବିଦ୍ୟାଳୟରେ । ନା ଓଡ଼ିଆ ବିଭାଗରେ ଓଡ଼ିଆ ପିଲାଙ୍କୁ ଠିକ ସେ ପାଠ ପଢାଯାଇଛି, ନା ପିଲାଙ୍କ ପାଇଁ ଭଲ ଲାଇବ୍ରେରୀର ସୁବିଧା ଅଛି । ନା ଠିକ୍ ସେ ଓଡ଼ିଆ ବହି ମିଳିଛୁ । ଯାହାକୁ ନେଇ ଅଭିଯୋଗ କରିଛନ୍ତି ଛାତ୍ରୀ ।

ପ୍ରଥମ ସେମିଷ୍ଟାରରେ ୩୫ ଜଣ ପିଲାଙ୍କ ମଧ୍ୟରୁ ୨୧ ଜଣ ପିଲାଙ୍କୁ ଜାଣିଶୁଣି ଫେଲ୍ କରାଯାଇଛି । ପ୍ରତ୍ୟେକ ସେମିଷ୍ଟାରରେ ଛାତ୍ରଛାତ୍ରୀ ଫେଲ୍ ପାଇଁ ଓଡ଼ିଆ ବିଭାଗର ପ୍ରଫେସରମାନେ ଧମକ ମଧ୍ୟ ଦେଉଥିବାର ଅଭିଯୋଗ ହୋଇଛି । ବିଚ୍ଛିନ୍ନାଞ୍ଚଳ ଭଳି ସ୍ଥାନରେ ଓଡ଼ିଆ ଭାଷାକୁ ବଞ୍ଚାଇବା ପରିବର୍ତ୍ତେ ବିଲୋପ କରିଦେବା ପାଇଁ ଓଡ଼ିଆ ବିଭାଗର ପ୍ରଫେସରମାନେ ଶତ ପ୍ରତିଶତ ଚେଷ୍ଟା କରୁଛନ୍ତି ବୋଲି ଅଭିଯୋଗ କରିଛନ୍ତି ପୂର୍ବତନ ଛାତ୍ରଛାତ୍ରୀ  । 

ଏନେଇ ଓଡ଼ିଶାର ରାଜ୍ୟପାଳ, ମୁଖ୍ୟମନ୍ତ୍ରୀଙ୍କ ସହ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ହସ୍ତକ୍ଷେପ କରିବା ପାଇଁ ଅନୁରୋଧ କରିଛନ୍ତି ଛାତ୍ରଛାତ୍ରୀ । ସେପଟେ ଘଟଣାକୁ ସମ୍ପୂର୍ଣ୍ଣ ଭିତ୍ତିହୀନ କହିଛନ୍ତି କୋହ୍ଲାନ ବିଶ୍ବବିଦ୍ୟାଳୟର ଓଡ଼ିଆ ବିଭାଗର ମୁଖ୍ୟ ଡକ୍ଟର ମନୋଜ ମହାପାତ୍ର । ତେବେ ପ୍ରଶ୍ନ ଉଠୁଛି ରାଜ୍ୟ ସରକାର କରୁଛନ୍ତି କ’ଣ ? କାହିଁକି ଆଖି ବନ୍ଦ କରିଛନ୍ତି ରାଜ୍ୟ ସରକାର ? ଓଡ଼ିଆ ପିଲାଙ୍କ ଭବିଷ୍ୟତ ସହ କାହିଁକି ଖେଳୁଛନ୍ତି ? ଆଞ୍ଚଳିକ ଦଳ ଭାବେ ଓଡ଼ିଆ ଭାଷା ଓ ସଂସ୍କୃତି ପ୍ରତି ନାହିଁ ଦରଦ ?

ପୂର୍ବରୁ ମଧ୍ୟ ଓଡ଼ିଶା ସରକାରଙ୍କ ଆର୍ଥିକ ଅନୁଦାନରେ ନିଯୁକ୍ତ ଓଡିଆ ଶିକ୍ଷକଙ୍କୁ ଷଡ଼େଇକଳା ଓ ଖରସୁଆଁରେ ଦରମା ମିଳୁ ନ ଥିବା ନେଇ ଖବର ପ୍ରସାରଣ କରିଥିଲା ଅର୍ଗସ । ଦୀର୍ଘ ୨୨ ମାସ ଧରି ବିଚ୍ଛିନାଞ୍ଚଳରେ ଭୋକିଲା ଶିକ୍ଷକଙ୍କ ପଟେରେ ଓଦାକନା ନେଇ ଖବର ବାଜିବା ପରେ ବର୍ଷକର ଦରମା ମିଳିଥିଲା । ହେଲେ ସେବେଠୁ ପୁଣି ଦରମା ବନ୍ଦ । ଗୋଟିଏ ପଟେ ରାଜ୍ୟ ସରକାରଙ୍କ ଲୋକ ଦେଖାଣିଆ ଭାଷା ପ୍ରୀତି ଅନ୍ୟପଟେ ସୀମା ଆରପଟେ ସଙ୍କଟରେ ଓଡ଼ିଆ ଭାଷା ଓ ସଂସ୍କୃତି । ଏପଟେ ଓଡ଼ିଆ ବିଶ୍ବବିଦ୍ୟାଳୟ ପ୍ରତିଷ୍ଠା ପ୍ରସ୍ତୁତି ଓ ବିଶ୍ବସ୍ତରୀୟ ଆନ୍ତର୍ଜାତୀୟ ଓଡ଼ିଆ ସମ୍ମିଳନୀ ହେବାକୁ ଆୟୋଜନ ହେଉଛି । ଅନ୍ୟପଟେ ପଡୋଶୀ ରାଜ୍ୟ ଝାଡ଼ଖଣ୍ଡରେ ଓଡ଼ିଆ ପିଲାଙ୍କ ଭବିଷ୍ୟତ ସହ ଖେଳ ଖେଳାଯାଉଛି ।