Odia Migrant Labour Death / କାନ୍ଦ ବୋବାଳିରେ ଫାଟି ପଡ଼ିଲା ଗାଁ; ଓଡ଼ିଆ ଦାଦନ ଶ୍ରମିକଙ୍କ ମୃତଦେହ ଘରକୁ ଫେରିଲା

ସୁନ୍ଦରଗଡ଼: ପେଟପାଟଣା ପାଇଁ ଇଚ୍ଛା ନଥିଲେ ସୁଦ୍ଧା ଦାଦନ ଶ୍ରମିକଟିଏ ଘର ଛାଡ଼ିବାକୁ ବାଧ୍ୟ ହୁଏ । ରୋଜଗାର ଅନ୍ଵେଷଣରେ ଘର ଛାଡ଼ି ଅଲଗା ରାଜ୍ୟକୁ କି ଦେଶକୁ ଚାଲିଯାଏ । ଘରଠୁ ଦୂରରେ ରହି ଟଙ୍କା ରୋଜଗାର କରେ । ବେଳେବେଳେ କିନ୍ତୁ ବିଧିର ବିଧାନ ଆଗରେ ସେ ହାର ମାନେ । ଆଶା ଥାଏ ପର୍ବପର୍ବାଣି ଆସିଲେ ଘରକୁ ଯିବ । ହେଲେ ଦିନେ ତାର ମୃତଦେହ ଘରକୁ ଆସେ । ଏମିତି ଏକ ଏକ ଦୁଃଖଦ ଘଟଣା ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ ଘାଟକଇଁତରା ଗାଁରେ ।

• ଯାଇଥିଲେ ରୋଜଗାର ପାଇଁ ଫେରିଲେ ଶବ ହୋଇ

ଘରକୁ ଫେରିଲା ଦାଦନ ଶବ। ଗାଁର ଦାମୋଦର ମହାନନ୍ଦ ତାମିଲନାଡୁ ଇରୋଡ ସ୍ଥିତ ଏକ ବିସ୍କୁଟ କମ୍ପାନୀରେ ଶ୍ରମିକ ଭାବେ କାମ କରୁଥିଲେ । ହେଲେ ଗତ କିଛି ଦିନ ହେଲା ତାଙ୍କ ଦେହ ଅସୁସ୍ଥ ହୋଇପଡିଥିଲା । ତାଙ୍କୁ ସାଲେମ ଜିଲ୍ଲା ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ଗତ ୮ ତାରିଖ ଦିନ ମୃତ୍ୟୁ ହୋଇଯାଇଥିଲା । ଏନେଇ ପରିବାର ଲୋକଙ୍କୁ ଖବର ଦିଆଯାଇଥିବା ବେଳେ ଅର୍ଥାଭାବରୁ ତାମିଲନାଡୁ ଯାଇ ଦାମୋଦରଙ୍କ ମୃତଦେହ ଆଣିବା ଅସମ୍ଭବ ହୋଇ ପଡ଼ିଥିଲା ।

ପଢନ୍ତୁ ଏହି ଖବର: ହଜାର ହଜାର ମରକ୍କୋ ନାଗରିକଙ୍କୁ ଘଉଡ଼ାଇ ଦେଲା ସେନା: ଚାଲିଗଲା ୧୮ ଜଣଙ୍କ ଜୀବନ

• କାନ୍ଦ ବୋବାଳିରେ ଫାଟିଲା ଗାଁଦାଣ୍ଡ

ତେବେ ଗାଁର କିଛି ବ୍ୟକ୍ତି ଶ୍ରମ ବିଭାଗକୁ ଏନେଇ ଖବର ଦେଇଥିଲେ । କମ୍ପାନୀ ସହ ଶ୍ରମ ବିଭାଗ ଯୋଗାଯୋଗ କରି ମୃତଦେହ ଗାଁକୁ ଆଣିଛନ୍ତି । ଶ୍ରମ ବିଭାଗ କର୍ମଚାରୀ ପକ୍ଷରୁ ମୃତ ଶ୍ରମିକଙ୍କ ମୃତଦେହକୁ ତାଙ୍କ ପରିବାରକୁ ହସ୍ତାନ୍ତର କରିବା ସହ ସରକାରଙ୍କ ନିୟମ ଅନୁଯାୟୀ ସାହାଯ୍ୟ ସହଯୋଗ ଯୋଗାଇ ଦିଆଯିବ ବୋଲି ଶ୍ରମ ଅଧିକାରୀ କହିଛନ୍ତି । ଯେତେବେଳେ ଦାମୋଦରଙ୍କ ମୃତଦେହ ଗାଁରେ ପହଞ୍ଚିଥିଲା, ସେତେବେଳେ ପୂରା ଶୋକାକୁଳ ପରିବେଶ ସୃଷ୍ଟି ହୋଇଥିଲା । ଗାଁଦାଣ୍ଡରେ ଏକାଧିକ ଲୋକ ଏକାଠି ହୋଇ ଦାମୋଦରଙ୍କ ଶେଷ ଦର୍ଶନ ପାଇଁ ଆସିଥିଲେ । କାନ୍ଦ ବୋବାଳିରେ ପୂରା ଗାଁ ଫାଟି ପଡ଼ିଥିଲା ।