୭/୦୫,ଭୁବନେଶ୍ବର: ସଡ଼କ ଦୁର୍ଘଟଣାକୁ ରୋକିବା ପାଇଁ ସୁପ୍ରିମ କୋର୍ଟଙ୍କ କଠୋର ନିର୍ଦ୍ଦେଶ ପରେ ସଡ଼କ ସୁରକ୍ଷାକୁ ନେଇ ଓଡିଶାରେ ଆଲର୍ଟ । ରାଜ୍ୟର ବାଣିଜ୍ୟ ଓ ପରିବହନ ବିଭାଗ ସମସ୍ତ ବିଭାଗ, ଜିଲ୍ଲା ପ୍ରଶାସନ ଓ ପୁଲିସକୁ ଏହି ନିର୍ଦ୍ଦେଶଗୁଡ଼ିକୁ କଡ଼ାଭାବେ ପାଳନ କରିବାକୁ ଆଦେଶ ଦେଇଛି।
ରାଜ୍ୟରେ ହେବ ୨୩ଟି ଟ୍ରକ ଟର୍ମିନାଲ।  ଏଥିରେ  ହୋଟେଲ ସହ ପାର୍କିଂ ସୁବିଧା ରହିବ। ଜାତୀୟ ରାଜପଥ କଡରେ ନିର୍ମାଣ ହେଉଛି, ଶେଷ ପର୍ଯ୍ୟାୟରେ କାମ ଚାଲିଛି। ନ୍ୟାସନାଲ ହାଇଓ୍ବେ ଲଜିଷ୍ଟିକକୁ ମିଳିଥିଲା ପରିଚାଳନା ଦାୟିତ୍ବ । କାମରେ ବିଳମ୍ବ କରୁଥିବାରୁ ଠିକା ସଂସ୍ଥାକୁ ତାଗିଦ କରିଛନ୍ତି ମନ୍ତ୍ରୀ । ନୂଆ ସଂସ୍ଥାକୁ କାମ ଦେବା ପାଇଁ ବିଭାଗକୁ ନିର୍ଦ୍ଦେଶ ଦେଇଛନ୍ତି ପରିବହନ ମନ୍ତ୍ରୀ ବିଭୁତି ଭୁଷଣ ଜେନା। ପଳାଶୁଣୀରେ ଭିଡ କମାଇବା ପାଇଁ ୬ ଲେନ ରାସ୍ତା ନିର୍ମାଣ ପାଇଁ ପ୍ରକ୍ରିୟା ଆରମ୍ଭ ହୋଇଯାଇଛି। ଅମାନିଆ ଚାଳକ ଦେଲେଣି ୧୬ କୋଟ ଟଙ୍କା। ଗତ ଏକମାସରେ ପରିବହନ ବିଭାଗ ୧୬ କୋଟି ଟଙ୍କା ଆଦାୟ କରିଛି ବୋଲି ପରିବହନ ମନ୍ତ୍ରୀ କହିଛନ୍ତି। 

ସଡ଼କ ସୁରକ୍ଷା ପାଇଁ ସୁପ୍ରିମକୋର୍ଟ କଡ଼ା ଆଭିମୁଖ୍ୟ ଗ୍ରହଣ କରିଥିଲେ। ବେଆଇନ ପାର୍କିଂ ଉପରେ ରୋକ୍: ଜାତୀୟ ରାଜପଥରେ ଭାରୀ କିମ୍ବା ବ୍ୟବସାୟିକ ଯାନଗୁଡ଼ିକ ଏଣିକି ଯେଉଁଠି ସେଇଠି ପାର୍କିଂ କରିପାରିବେ ନାହିଁ। କେବଳ ନିର୍ଦ୍ଧାରିତ ସ୍ଥାନରେ ହିଁ ପାର୍କିଂ କରିବାକୁ ଅନୁମତି ମିଳିବ। ଏହାକୁ ATMS ଏବଂ ଇ-ଚାଲାଣ ମାଧ୍ୟମରେ କଡ଼ାକଡ଼ି ନଜର ରଖାଯିବ। ସାରା ଦେଶରେ ଯେତିକି ରାସ୍ତା ଅଛି ତା’ର ମାତ୍ର ୨% ଜାତୀୟ ରାଜପଥ। ହେଲେ ସଡ଼କ ଦୁର୍ଘଟଣା‌ରେ ଯେତିକି ମୃତ୍ୟୁ ହେଉଛି ତା’ର ୩୦% ଜାତୀୟ ରାଜପଥରେ ହେଉଛି। ସେଥିପାଇଁ ୬୦ ଦିନରେ ଜବରଦଖଲ ହଟାଇବା : ରାଜପଥ କଡ଼ରେ ଥିବା ବେଆଇନ ଢାବା, ଦୋକାନ ବା ଅନ୍ୟାନ୍ୟ ନିର୍ମାଣକୁ ହଟାଇବାକୁ ଜିଲ୍ଲା ମାଜିଷ୍ଟ୍ରେଟମାନଙ୍କୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ।

ପଢନ୍ତୁ ଏହି ଖବର: ଜାତୀୟ ରାଜପଥରେ ହୋଇପାରିବନି ବେଆଇନ ପାର୍କିଂ, ଢାବା, ଦୋକାନ ବା ଅନ୍ୟାନ୍ୟ ନିର୍ମାଣକୁ ହଟାଇବାକୁ ନିର୍ଦ୍ଦେଶ

ପ୍ରତ୍ୟେକ ଜିଲ୍ଲାରେ ଜିଲ୍ଲାପାଳ ଏବଂ ଆରକ୍ଷୀ ଅଧୀକ୍ଷକଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟାସ୍କ ଫୋର୍ସ ଗଠନ କରାଯିବ। ଏହି ଟିମ୍ ନିୟମିତ ଭାବେ ସଡ଼କ ସୁରକ୍ଷାର ସମୀକ୍ଷା କରିବେ। NHAI କୁ ନିର୍ଦ୍ଦେଶ ଦିଆଯାଇଛି ଯେ, ପ୍ରତି ୭୫ କିଲୋମିଟର ବ୍ୟବଧାନରେ ଆମ୍ବୁଲାନ୍ସ ଏବଂ ରିକଭରି କ୍ରେନ୍ ମୁତୟନ କରାଯିବ। ଆସନ୍ତା ୪୫ ଦିନ ମଧ୍ୟରେ ସମସ୍ତ ଦୁର୍ଘଟଣାପ୍ରବଣ ସ୍ଥାନ ବା 'Blackspots' ଚିହ୍ନଟ କରି ସେଠାରେ ହାଇ-ଇଣ୍ଟେନସିଟି ଲାଇଟ୍ ଏବଂ ସିସିଟିଭି କ୍ୟାମେରା ଲଗାଇବାକୁ ନିର୍ଦ୍ଦେଶ ଦିଆଯାଇଛି।
ଜାତୀୟ ରାଜପଥର ମଧ୍ୟ ଭାଗରୁ ୪୫ ମିଟର ପର୍ଯ୍ୟନ୍ତ କୌଣସି ଆବାସିକ, ୭୫ ମିଟର ପର୍ଯ୍ୟନ୍ତ କୌଣସି ବ୍ୟାବସାୟିକ ପ୍ରତିଷ୍ଠାନ ନିର୍ମାଣ ହେବନି କି ଏଥିପାଇଁ ଜମିର କିସମ ପରିବର୍ତ୍ତନ ହେବନି। ଏନେଇ ରାଜ୍ୟ ସରକାର ବିଜ୍ଞପ୍ତି ଜାରି କରିବାକୁ ସୁପ୍ରିମକୋର୍ଟ କଡ଼ା ନିର୍ଦ୍ଦେଶ ଦେଇଥିଲେ।