Odisha Student Elections / ବାହାରିଲା ନିର୍ବାଚନ ବିଜ୍ଞପ୍ତି, ଲାଗିଲାଣି ବ୍ୟାନର ପୋଷ୍ଟର...ଉଷ୍ମ ହେଲାଣି ଛାତ୍ର ରାଜନୀତି

୮ ବର୍ଷ ପରେ କଲେଜ କ୍ୟାମ୍ପସରେ ନିର୍ବାଚନ ହେବାକୁ ଯାଉଛି । ଯାହାକୁ ନେଇ ଛାତ୍ରଛାତ୍ରୀଙ୍କ ଭିତରେ ଭରି ରହିଛି ସବୁଠୁ ଅଧିକ ଉତ୍ସାହ । ଆଜି ବିଧିବଦ୍ଧ ଭାବେ ନମାଙ୍କନ ଦାଖଲ ନେଇ କଲେଜ ଗୁଡ଼ିକ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଛାତ୍ର ସଂସଦ ସହ ଆଥଲେଟିକ୍ ଏବଂ ଡ୍ରାମାଟିକ୍ ଆସୋସିଏସନ୍ ପାଇଁ ମଧ୍ୟ ହେବ ନିର୍ବାଚନ । ସଭାପତି ପଦରୁ ଆରମ୍ଭ କରି ଉପସଭାପତି, ସେକ୍ରେଟାରୀ ଏବଂ ଆସିଷ୍ଟାଣ୍ଟ ସେକ୍ରେଟାରୀ, ଛାତ୍ର ସଂସଦର ୪ଟି ପଦ ପାଇଁ ହେବ ନିର୍ବାଚନ । ସେହିପରି ଆଥଲେଟିକ୍ ଆସୋସିଏସନ୍ ଏବଂ ଡ୍ରାମାଟିକ୍ ଆସୋସିଏସନ୍‌ର ସେକ୍ରେଟାରୀ ଓ ଆସିଷ୍ଟାଣ୍ଟ ସେକ୍ରେଟାରୀ ପଦ ମଧ୍ୟ ରହିଛି । ଅକ୍ଟୋବର ୯ ତାରିଖରେ ହେବ ନାମାଙ୍କନ ଦାଖଲ । ସକାଳ ୧୦ଟାରୁ ଦିନ ୧ଟା ଯାଏଁ ନାମାଙ୍କନ ପତ୍ର ମିଳିବ ଏବଂ ସେହି ସମୟ ମଧ୍ୟରେ ଦାଖଲ ମଧ୍ୟ କରିବାକୁ ପଡ଼ିବ ।

ସେହିଦିନ ଅପରାହ୍ନ ୨ଟାରୁ ୪ଟା ଯାଏଁ ହେବ ନାମାଙ୍କନ ପତ୍ର ଯାଞ୍ଚ। ଆଉ ସନ୍ଧ୍ୟା ୫ଟା ସୁଦ୍ଧା ପ୍ରକାଶ ପାଇବ ବୈଧ ପ୍ରାର୍ଥୀଙ୍କ ତାଲିକା । ପ୍ରାର୍ଥୀତ୍ୱ ପ୍ରତ୍ୟାହାର ପାଇଁ ଅକ୍ଟୋବର ୧୦ ତାରିଖ ସକାଳ ୧୦ଟାରୁ ଦିନ ୧ଟା ଯାଏଁ ସମୟ ଧାର୍ଯ୍ୟ ହୋଇଛି । ସେହିଦିନ ଅପରାହ୍ନ ୩ଟାରେ ପ୍ରକାଶ ପାଇବ ଚୂଡ଼ାନ୍ତ ପ୍ରାର୍ଥୀ ତାଲିକ । ଅକ୍ଟୋବର ୧୫ରେ ହେବ ମତଦାନ । ସକାଳ ୮ଟାରୁ ଦିନ ୨ଟା ଯାଏଁ ବିଭିନ୍ନ ପୋଲିଂ ଷ୍ଟେସନ୍‌ରେ ଛାତ୍ରଛାତ୍ରୀ ମତଦାନ କରିବେ । ଏହାପରେ ସେହିଦିନ ଅପରାହ୍ନ ୨ଟାରୁ ଆରମ୍ଭ ହେବ ଭୋଟ୍ ଗଣତି । ନିର୍ବାଚନ ଅଧିକାରୀ ଭାବେ ପିଜି କାଉନସିଲ୍ ଚେୟାରମ୍ୟାନ୍‌ଙ୍କ କାର୍ଯ୍ୟାଳୟକୁ ଧାର୍ଯ୍ୟ କରାଯାଇଛି । ବିଜ୍ଞପ୍ତି ପ୍ରକାଶ ପାଇବା ପରେ ରାଜନୀତିର ଆଖଡ଼ା ସ୍ଥଳ ପାଲଟିଛି ରାଜ୍ୟର ଶହ ଶହ ଶିକ୍ଷାନୁଷ୍ଠାନ । ଜମୁଛି କଲେଜ ଖଟି ।

ସେପଟେ ଛାତ୍ର ସଂସଦ ନିର୍ବାଚନକୁ ନେଇ ସମରସଜ୍ଜା ଆରମ୍ଭ କରିଦେଇଛନ୍ତି ବିଭିନ୍ନ ଛାତ୍ର ସଂଗଠନ । ପ୍ରମୁଖ ଭାବେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ, NSUI ଓ BCJD ରାଜ୍ୟର ଅଧିକଂଶ କଲେଜରେ ମଇଦାନରେ ରହିଛି । ଅନ୍ୟ ଛାତ୍ରସଂଗଠନ ସମେତ ଅନେକ ଛାତ୍ରଛାତ୍ରୀ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିବାକୁ ମନ ବଳାଇଥିବା ମଧ୍ୟ ଦେଖିବାକୁ ମିଳିଛି ।

ଉତ୍ସାହ ସାଥେ ସାଥେ କ୍ୟାମ୍ପସରେ ଭରିଲାଣି ରାଜନୈତିକ ଉଷ୍ମତା । ବାଲେଶ୍ବର ନୀଳଗିରିରେ ପୋଷ୍ଟର ଚିରାକୁ ନେଇ ତେଜିଛି ଛାତ୍ର ଅଶାନ୍ତି । ସେପଟେ ୮ ବର୍ଷ ପରେ ନିର୍ବାଚନ ହେଉଥିବାରୁ ଏହାକୁ ଶାନ୍ତି ଶୃଙ୍ଖଳାର ସହ କରିବା ଉପରେ ଜୋର ଦେଇଛନ୍ତି କଲେଜ କର୍ତ୍ତୃପକ୍ଷ ।

ରାଜଧାନୀ ଭୁବନେଶ୍ବରରେ ଥିବା ବିଭିନ୍ନ କଲେଜ ସମେତ ବିଶ୍ବବିଦ୍ୟାଳୟ ଗୁଡ଼ିକରେ ମଧ୍ୟ ଛାତ୍ରସଂସଦ ନିର୍ବାଚନ ଲାଗି ବିଜ୍ଞପ୍ତି ପ୍ରକାଶ ପାଇଛି । ନିର୍ବାଚନ ସମୟରେ ଛାତ୍ରଛାତ୍ରୀ ଓ ପ୍ରାର୍ଥୀଙ୍କୁ ନିର୍ବାଚନ ଗାଇଡ୍‌ଲାଇନ୍‌, କୋଡ୍ ଅଫ୍ କଣ୍ଡକ୍ଟ ଏବଂ ବିଶ୍ୱବିଦ୍ୟାଳୟର ନିର୍ଦ୍ଦେଶାବଳୀ କଡ଼ାକଡ଼ି ଭାବେ ପାଳନ କରିବାକୁ କୁହାଯାଇଛି ।

ଭୁବନେଶ୍ବରରେ ଥିବା କଲେଜ ଗୁଡ଼ିକରେ ଶାନ୍ତିଶୃଙ୍ଖଳା ବଜାୟ ରଖିବାକୁ ଜୋର ଦେଇଛି ପୋଲିସ । କ୍ୟାମ୍ପସରେ ମୁତୟନ ହେବେ ସୁରକ୍ଷାବଳ । କ୍ୟାମ୍ପସରେ ଅଣଛାତ୍ର ପ୍ରବେଶ, AIର ଦୁରୁପୋଯୋଗ, ସୋସିଆଲ ମିଡିଆର ଅପବ୍ୟବହାରକୁ ନେଇ ଶକ୍ତ ଆଭିମୁଖ୍ୟ ଆପଣାଯାଇଥିବା ସୂଚନା ଦେଇଛନ୍ତି ଭୁବନେଶ୍ବର ଡିସିପି । ଛାତ୍ରଙ୍କ ଭିତରେ ଦୃଢ଼ ନେତୃତ୍ବ ଗଢ଼ିବା ଲାଗି ଏ ପଦକ୍ଷେପ । ତେବେ କ୍ୟାମ୍ପସ ଭୋଟିଂରେ କିଏ ମାରୁଛି ବାଜି ତା ଉପରେ ନଜର ।