ବିଲରେ ଲଙ୍କା ହସୁଛି, ହେଲେ ଚାଷୀ ଆଖିରେ ଲୁହ । ଗଞ୍ଜାମ ଜିଲ୍ଲାରେ ଏବେ କଞ୍ଚାଲଙ୍କା ଚାଷୀଙ୍କ ଅବସ୍ଥା ବେହାଲ । ମୁଣ୍ଡ ଝାଳ ତୁଣ୍ଡରେ ମାରି ଫସଲ ତ ଅମଳ କଲେ, ହେଲେ ବିକ୍ରି ବେଳକୁ ଚାଷୀ ହେଉଛି ଅଭାବୀ ବିକ୍ରିର ଶିକାର । ଯେଉଁ ଲଙ୍କା କିଛି ଦିନ ତଳେ କିଲୋ ପ୍ରତି ୯୦ ଟଙ୍କାରେ ବିକ୍ରି ହେଉଥିଲା, ଏବେ ତାହା ମାତ୍ର ୧୨ ରୁ ୧୫ ଟଙ୍କାରେ ବିକିବାକୁ ବାଧ୍ୟ ହେଉଛି ଚାଷୀ । ବାହାର ରାଜ୍ୟକୁ ରପ୍ତାନି ବନ୍ଦ ହେବା ସହ ସ୍ଥାନୀୟ ବେପାରୀଙ୍କ ମନମାନି ଚାଷୀଙ୍କ ଅଣ୍ଟା ଭାଙ୍ଗି ଦେଇଛି ।

ଲଙ୍କା ଜମିରେ ହସୁଛି ନୀଳ, ନାଲି ଲଙ୍କା । ହେଲେ କାନ୍ଦୁଛି ଚାଷୀ । ଗଞ୍ଜାମର ପ୍ରାୟ ୧୦ଟି ବ୍ଲକର ଏକର ଏକର ଜମିରେ ହେଉଛି ଲଙ୍କା ଚାଷ । ଜମି ମୁଣ୍ଡରେ ଚାଷୀ ୯୦ ଟଙ୍କାରେ ବିକୁଥିଲା କଞ୍ଚା ଲଙ୍କା । ଏବେ କିଲୋ ୧୫ ଟଙ୍କା, କିନ୍ତୁ ଆସୁନାହିଁନ୍ତି ବେପାରୀ ।

ଛତ୍ରପୁର, ଆସିକା, କବିସୂର୍ଯ୍ୟନଗର, ପୁରୁଷୋତ୍ତମପୁରରେ ଲଙ୍କା ଚାଷୀଙ୍କ ଦୁଃଖକୁ ପାଖରୁ ପରଖିଥିଲା ଅର୍ଗସ କ୍ୟାମେରା ଟିମ୍ । ଏହିଠୁ ଚାଷୀଙ୍କ ପାଖରୁ ଲଙ୍କା ନେଇ ବେପାରୀ ରାଜ୍ୟର ଅନ୍ୟ ଅଞ୍ଚଳକୁ ପଠାଉଥିଲେ । ମୁମ୍ବାଇ ଓ ରାଜସ୍ଥାନ ବି ଯାଉଥିଲା ଗଞ୍ଜାମ ଲଙ୍କା । ୨୦ ଦିନ ହେବ ଗାଁର ଛୋଟ ମଣ୍ଡିକୁ ଆଉ ଆସୁନାହାଁନ୍ତି ବେପାରୀ ।
କାହିଁକି ହଠାତ କମିଗଲା ଗଂଜାମ ଲଙ୍କାର ଆଦର । ଏଥର ଗତ ବର୍ଷ ତୁଳନାରେ ଅଧିକ ହୋଇଛି ଲଙ୍କା ଚାଷ । ପ୍ରାୟ ୮ରୁ ୧୦ ହଜାର ହେକ୍ଟରରେ ହୋଇଛି ଲଙ୍କା ଚାଷ । ହେକ୍ଟର ପିଛା ୧୫ରୁ ୧୮ ଟନ୍ ଉତ୍ପାଦନ ହେଉଛି । ଦୟା କିସମର ଲଙ୍କା ଅଧିକ ଅମଳ ଦେଉଥିବାରୁ ଚାଷୀ ଏହାକୁ ଚାଷ କରିଛି । ହେଲେ ଏହି ସମୟରେ ସୁରଟରେ ଲଙ୍କା ଉତ୍ପାଦନ ଅଧିକ ହୋଇଥିବାରୁ ଗଞ୍ଜାମ ଲଙ୍କାର ଚାହିଦା କମିଯାଇଛି । ସ୍ଥାନୀୟ ବେପାରୀ ବି ମଉକା ଦେଖି ମନମାନି କରୁଛନ୍ତି । ରଖିବାକୁ ସ୍ଥାନ ନ ଥିବାରୁ ଚାଷୀ ବାଧ୍ୟ ହେଉଛି କମ୍ ଦାମରେ ବିକିବାକୁ ।

କିଛି ଦଲାଲ ଚାଷୀଙ୍କ ପାଖରୁ ୧୫ କିମ୍ବା ୨୦ ଟଙ୍କାରେ କଞ୍ଚା ଲଙ୍କା କିଣି ନେଉଥିବା ବେଳେ ବଜାରରେ ଏହାକୁ ୩୦ରୁ ୪୦ ଟଙ୍କାରେ ବିକ୍ରି କରୁଛନ୍ତି । ଏବେ ସ୍ଥିତି ଏମିତି ହୋଇଛି ଯେ ବିହନ ଓ ସାର ଖର୍ଚ୍ଚ ବି ଉଠୁନି । ରାୟଗଡ଼ାରେ ପଣସ ଓ କେନ୍ଦ୍ରାପଡାର ରାଜନଗରରେ କିଛି ଦିନ ତଳେ ଟମୋଟୋ ଚାଷୀ ହୋଇଥିଲା ଅଭାବୀ ବିକ୍ରିର ସମ୍ମୁଖୀନ । ମୁଣ୍ଡ ଝାଳ ତୁଣ୍ଡରେ ମାରି ଚାଷୀ ବିଲରେ ଖଟୁଛି ହେଲେ ଅମଳ ବେଳ କାହିଁକି ହେଉଛି ଅଭାବୀ ବିକ୍ରିର ଶିକାର ?