କିଛି ଦିନ ତଳର କଥା ଶୀତ ଦିନରେ ପ୍ରଦୂଷଣକୁ ନେଇ ଅସ୍ତବ୍ୟସ୍ତ ହୋଇଥିଲେ ସମସ୍ତେ । ବଢ଼ିଥିଲା ସରକାରଙ୍କ ଚିନ୍ତା । ଏବେ ପ୍ରଦୂଷଣ ନିୟନ୍ତ୍ରଣ ପାଇଁ ସରକାର ନେଇଛନ୍ତି ବଡ଼ ପଦକ୍ଷେପ । ରାସ୍ତାରୁ ହଟିବ ଡିଜେଲ ଚାଳିତ ଆମ ବସ୍ । ଏହା ବଦଳରେ ଇଲେକ୍ଟ୍ରୋନିକ୍ ଭେହିକିଲ୍ ଚାଲିବ ।

ଏଣିକି ରାସ୍ତାରୁ ହଟିବ ଡିଜେଲ୍ ଚାଳିତ ଆମ ବସ୍ । ଡିଜେଲ୍ ପରିବର୍ତ୍ତେ ଇଭି ଗାଡି ଚଲାଇବାକୁ ଗୁରୁତ୍ବ ଦେଉଛନ୍ତି ରାଜ୍ୟ ସରକାର । ଡିଜେଲ ଚାଳିତ ଆମ ବସ୍‌କୁ ଧୀରେ ଧୀରେ ସ୍କ୍ରାପ୍ କରାଯିବା ସହ ଇଭି ଗାଡ଼ିକୁ ରାସ୍ତାରେ ଚଳାଇବାକୁ ନିଷ୍ପତ୍ତି ହୋଇଥିବା କହିଛନ୍ତି ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ।

ପୁରୁଷ ଡ୍ରାଇଭରଙ୍କ ପରି ମହିଳାମାନେ ମଧ୍ୟ ଚଳାଇବେ ଆମ ବସ୍ । ଏନେଇ ପ୍ରଥମ ପର୍ଯ୍ୟାୟରେ ୨୦ ଜଣ ମହିଳାଙ୍କୁ ଟ୍ରେନିଂ ଦିଆଯିବ । ସେମାନେ ସବୁ ହେଭି ଭେଇକିଲ ଚଳାଇବା ପାଇଁ ଲାଇସେନ୍ସ ପ୍ରାପ୍ତ । ତେଣୁ ତାଲିମ ନେବା ପରେ ସେହି ମହିଳା ମାନେ ସ୍ୱତନ୍ତ୍ର ବସ୍ ଚଳାଇବେ । ଯାହାଦ୍ବାରା ରାସ୍ତାରେ ବସ୍ ଦୁର୍ଘଟଣା ସଂଖ୍ୟା ମଧ୍ୟ କମିବ । ଆଗାମୀ ଜାନୁଆରୀ ୩୧ ତାରିଖରେ କ୍ରୁଟ୍ ପକ୍ଷରୁ ୨୦ ଜଣ ମହିଳା ଇ-ବସ୍ ଚାଳନା ତାଲିମ ନିମନ୍ତେ ପୁନେ ଯାତ୍ରା କରିବେ ।

ମହିଳାଙ୍କ ସୁରକ୍ଷାକୁ ପ୍ରାଥମିକତା ଦେଉଛନ୍ତି ରାଜ୍ୟ ସରକାର । ତେଣୁ ସେମାନଙ୍କ ପାଇଁ ସ୍ପେଶାଲ୍ ବସ୍ ଚଳାଇବାକୁ ହେଉଛି ଯୋଜନା । ଆଗକୁ ମୁଖ୍ୟମନ୍ତ୍ରୀଙ୍କ ଅନୁମୋଦନ ପରେ ରାସ୍ତାରେ ମହିଳାଙ୍କ ପାଇଁ ଗଡ଼ିବ ଏହି ସ୍ବତନ୍ତ୍ର ଇଭି ବସ୍ । ଯାହା ଦ୍ୱାରା ମହିଳା ମାନେ ନିଜକୁ ଅଧିକ ସୁରକ୍ଷିତ ମନେ କରିବେ ।

ଡିଜେଲ୍ ପରିବର୍ତ୍ତେ ଇଭି ଗାଡ଼ି ଚାଲିବା ଦ୍ବାରା ପ୍ରଦୂଷଣରୁ ମଧ୍ୟ ମିଳିବ ମୁକ୍ତି । ଆଗକୁ ରାସ୍ତାରେ କେବଳ ଭଭି ଗାଡ଼ି ଚଳାଇବାକୁ ରାଜ୍ୟ ସରକାର ରଖିଥିବା ଟାର୍ଗେଟ ମଧ୍ୟ ଧିରେ ଧିରେ ପୁରା ହେବାକୁ ଲାଗିବ ।