Odisha Rent Law 2026 / ଘରଭଡ଼ା ପାଇଁ ଏଗ୍ରିମେଣ୍ଟ ବାଧ୍ୟତାମୂଳକ, ଆଉ ମନଇଚ୍ଛା ବଢ଼ିବନି ଭଡ଼ା

ମନ ଇଛା ଘର ଭଡା ବଢ଼େଇ ପାରିବେନି ମାଲିକ କି ଯେତେବେଳେ ଇଛା ଘର ଖାଲି କରିବାକୁ କହିପାରିବେନି । ସହରାଂଚଳରେ ଭଡ଼ାଟିଆଙ୍କ ପାଇଁ ଆସିବ ନୂଆ ଆଇନ । ପ୍ରାୟ ୫ ଦଶନ୍ଧିର ପୁରୁଣା ଆଇନ ପରିବର୍ତ୍ତେ ରାଜ୍ୟ ସରକାର ‘ଓଡ଼ିଶା ଅର୍ବାନ ଏରିଆ ରେଣ୍ଟାଲ କଣ୍ଟ୍ରୋଲ ଆକ୍ଟ-୨୦୨୬’ ଆଣିବାକୁ ଯାଉଛନ୍ତି । ଏ ନୂଆ ଆଇନରେ ଆଉ କ'ଣ କ'ଣ ରହିଛି ବ୍ୟବସ୍ଥା ଆସନ୍ତୁ ଜାଣିବା ।

ଏଣିକି ବେସରକାରୀ ଘର ଭଡ଼ାରେ ମୁଣ୍ଡ ପୂରେଇବେ ସରକାର । ଓଡ଼ିଶା ଅର୍ବାନ ଏରିଆ ରେଣ୍ଟାଲ କଣ୍ଟ୍ରୋଲ ଆକ୍ଟ-୨୦୨୬ ଆଣିବାକୁ ଯାଉଛି ନଗର ଉନ୍ନୟନ ବିଭାଗ । ଯାହାକି ଉଭୟ ଘର ମାଲିକ ଓ ଭଡ଼ାଟିଆଙ୍କୁ ଆଇନଗତ ସୁରକ୍ଷା ଯୋଗାଇଦେବ । ଏହି ନିୟମ ସହରର ସମସ୍ତ ପ୍ରକାରର ଆବାସିକ ଘର, ଦୋକାନ ବଜାର ଓ ସ୍କୁଲ-କଲେଜ ପାଇଁ ଦିଆଯାଉଥିବା ଭଡ଼ାଘର ନିମନ୍ତେ ଲାଗୁ ହେବ ।

ଏଣିକି କୌଣସି ବି ଘର ଏଗ୍ରିମେଣ୍ଟ ବିନା ଭଡ଼ାରେ ଦିଆଯାଇପାରିବ ନାହିଁ । ସହରାଞ୍ଚଳରେ ଜଣେ ଅଧିକାରୀଙ୍କୁ ରେଣ୍ଟ ଅଥରିଟି ଭାବେ ଦାୟିତ୍ୱ ଦିଆଯିବ । ଭଡ଼ା ନେବାର ୨ ମାସ ଭିତରେ ସ୍ଥାନୀୟ ରେଣ୍ଟ ଅଥରିଟି' ଓ ସେମାନଙ୍କ ଥାନାର ଅଧିକାରୀଙ୍କୁ ଜଣାଇବା ବାଧ୍ୟତାମୂଳକ ହେବ । କୌଣସି ପରିସ୍ଥିତିରେ ବି ଘର ମାଲିକ ଭଡ଼ାଟିଆଙ୍କ ପାଣି, ବିଦ୍ୟୁତ କିମ୍ବା ଗ୍ୟାସ ବନ୍ଦ କରିପାରିବେ ନାହିଁ । ଘର ମାଲିକ କିମ୍ବା ପ୍ରପର୍ଟି ମ୍ୟାନେଜର ଯାଂଚ କିମ୍ବା ମରାମତି ପାଇଁ ଘରକୁ ଯିବା ପୂର୍ବରୁ ଅତିକମରେ ୨୪ ଘଣ୍ଟା ପୂର୍ବରୁ ଲିଖିତ କିମ୍ବା ଡିଜିଟାଲ ନୋଟିସ ଦେବେ । ସୂର୍ଯ୍ୟୋଦୟ ପୂର୍ବରୁ ବା ସୂର୍ଯ୍ୟାସ୍ତ ପରେ ଘର ଭିତରକୁ ପ୍ରବେଶ କରିପାରିବେ ନାହିଁ ମାଲିକ ।

ନୂଆ ଆଇନରେ ସିକ୍ୟୁରିଟି ଡିପୋଜିଟ୍ ସୀମା ନିର୍ଦ୍ଧାରଣ କରାଯାଇଛି । ଆବାସିକ ଘର ପାଇଁ ଦୁଇ ମାସର ଓ ବ୍ୟବସାୟିକ ଘର ପାଇଁ ସର୍ବାଧିକ ଛଅ ମାସର ଭଡ଼ା ନିଆଯିବ । ଏଗ୍ରିମେଣ୍ଟରେ ଲେଖା ନ ହେଇଥିଲେ ଘରଭଡ଼ା ବୃଦ୍ଧି କରିପାରିବେନି ମାଲିକ । ଚୁକ୍ତି ଅବଧି ମଧ୍ୟରେ କୌଣସି ଭଡ଼ାଟିଆଙ୍କୁ ମନଇଚ୍ଛା ବାହାର କରାଯାଇପାରିବ ନାହିଁ । ଭଡ଼ା ନ ଦେବା, ବାକି ରଖିବା, ସବଲେଟ୍ ଦେବା, ସମ୍ପତ୍ତିର ଅପବ୍ୟବହାର, ବେଆଇନ କାମ କରିବା ଅଭିଯୋଗରେ ରେଣ୍ଟ କୋର୍ଟରେ ଆବେଦନ କରି ଉଛେଦ ଆଦେଶ ଆଣି ପାରିବେ । ଯଦି ଚୁକ୍ତି ସରିବା ପରେ ବି ଭଡ଼ାଟିଆ ଘର ଖାଲି ନ କରନ୍ତି, ତେବେ ପ୍ରଥମ ଦୁଇ ମାସ ପାଇଁ ଦୁଇଗୁଣ ଭଡ଼ା ପରେ ଚାରିଗୁଣ ବର୍ଦ୍ଧିତ ଭଡ଼ା ଦେବାକୁ ବାଧ୍ୟ ହେବେ ।

ପ୍ରତି ସହରାଞ୍ଚଳରେ ଜଣେ ଡେପୁଟି କଲେକ୍ଟର ପାହ୍ୟାର ଅଫିସର ‘ରେଣ୍ଟ ଅଥରିଟି' ଭାବେ ରହିବେ । ଅତିରିକ୍ତ ଜିଲ୍ଲାପାଳଙ୍କ ପାଖରେ ‘ରେଣ୍ଟ କୋର୍ଟକୁ ଆସିଥିବା ମାମଲାର ଶୁଣାଣି କରିବେ । ଜିଲ୍ଲା ଜଜ୍‌ଙ୍କୁ ନେଇ ‘ରେଣ୍ଟ ଟ୍ରିବ୍ୟୁନାଲ' ଗଠନ କରାଯିବ । ଏବେ ନୂଆ ଆଇନ ନେଇ ଚିଠା ପ୍ରସ୍ତାବ ଆସିଥିବା ବେଳେ ଏନେଇ ମତାମତ ମାଗିଛି ବିଭାଗ । ଖୁବଶୀଘ୍ର ଏହା ଆଇନରେ ପରିଣତ ହେବ ।