FIR Against Contractor / ଆଉ ଚଳିବନି ମନମାନି; ପାନୀୟ ଜଳ ପ୍ରକଳ୍ପ ନ ସରିଲେ ସିଧା ଏତଲା

ପୁରୀ: ରାଜ୍ୟରେ ଆଉ ଚଳିବନି ଅଣଓଡ଼ିଆ ଠିକାଦାରଙ୍କ ମନମାନି । ମେଗା ପାନୀୟ ଜଳ ପ୍ରକଳ୍ପ କାମରେ ବିଳମ୍ବ କରି ଲୋକଙ୍କୁ ହଇରାଣ କରୁଥିବା ଠିକା ସଂସ୍ଥା ବିରୋଧରେ ଏବେ ଶକ୍ତ ହୋଇଛନ୍ତି ରାଜ୍ୟ ସରକାର । ପୂର୍ବରୁ ଅବହେଳା ପାଇଁ ଯନ୍ତ୍ରୀଙ୍କ ଦରମା ବନ୍ଦ ହୋଇଥିବା ବେଳେ, ଏବେ ସିଧାସଳଖ ଆନ୍ଧ୍ରପ୍ରଦେଶର ‘GPR INFRA’ କମ୍ପାନୀ ନାଁରେ ଥାନାରେ ହୋଇଛି ଏତଲା ।

ବିଜେଡି ସରକାର ଅଣଓଡ଼ିଆ ଠିକାଦାରଙ୍କୁ ଟେକି ଦେଇଥିଲେ ପ୍ରାୟ ୩୫ ହଜାର କୋଟିର ୨୦୭ଟି ପ୍ରକଳ୍ପ । ହେଲେ ନଗଦ ଆସିଥିବା RTI ତଥ୍ୟରୁ ବାହାରିଛି ଚାଞ୍ଚଲ୍ୟକର ତଥ୍ୟ । ୨୦୭ଟି ପ୍ରକଳ୍ପ ମଧ୍ୟରୁ ଅଗଷ୍ଟ ସୁଦ୍ଧା ସମ୍ପୂର୍ଣ୍ଣ ହୋଇପାରିଛି ମାତ୍ର ୩୨ଟି ପ୍ରକଳ୍ପ । ପୁରୀ, ଗଞ୍ଜାମରୁ ଯାଜପୁର... ସବୁଠି ରାସ୍ତା ଓ ଗାଁ ଗାଁରେ ଗାତ ଖୋଳି ଅଧାପନ୍ତରିଆ ଭାବେ କାମ ଛାଡ଼ି ପଳାଇଛନ୍ତି ବାହାର ଠିକାଦାର ।

ଆକ୍ସନ ମୁଡରେ ପଞ୍ଚାୟତିରାଜ ଓ ଗ୍ରାମ୍ୟ ଜଳ-ପରିମଳ ବିଭାଗ । ମେଗା ପାଣି ପ୍ରକଳ୍ପ କାମରେ ବିଳମ୍ବ କଲେ ଆଉ ମିଳିବନି ନିସ୍ତାର । ପୂର୍ବରୁ ଅବହେଳା ପାଇଁ ଅଫିସରଙ୍କ ଦରମା ବନ୍ଦ ହୋଇଥିବା ବେଳେ, ଏବେ ସିଧାସଳଖ ଅଣଓଡ଼ିଆ ଠିକାଦାରଙ୍କ ନାଁରେ ଥାନାରେ ହୋଇଛି ଏତଲା । ବ୍ରହ୍ମଗିରି ବ୍ଲକ ଭଣ୍ଡାରିକୁଦାଠାରେ ୫୯ଟି ଗାଁକୁ ବିଶୁଦ୍ଧ ପାଣି ଯୋଗାଇବା ପାଇଁ ୨୦୨୨-୨୩ରେ ଆନ୍ଧ୍ରପ୍ରଦେଶର 'GPR INFRA' କମ୍ପାନୀକୁ ଦାୟିତ୍ୱ ଦିଆଯାଇଥିଲା ।

ହେଲେ ଦୀର୍ଘ ବର୍ଷ ଧରି କାମ ଶେଷ ନକରି ଗାଁ ଗାଁରେ ରାସ୍ତା ଖୋଳି, ପାଇପ ପାଇଁ ବଡ଼ ବଡ଼ ଗାତ କରି ଛାଡ଼ି ଦେଇଛି ସଂସ୍ଥା । ଫଳରେ ରାୟବିଧାର, ମଣପଡ଼ା, କୁଶୁବେଣ୍ଟି, ବ୍ରାହ୍ମଣିଆ, କହଳପଦା, ଧରଣୀକୁଦି ଓ ବଡ଼ବେଣାକୁଦି ପଞ୍ଚାୟତର ସମସ୍ତ ଗ୍ରାମବାସୀ ନାହିଁ ନଥିବା ଦୁର୍ଦ୍ଦଶା ଭୋଗୁଛନ୍ତି । ଶେଷରେ କନିଷ୍ଠ ଯନ୍ତ୍ରୀ ବ୍ରହ୍ମଗିରି ଥାନାରେ ସମ୍ପୃକ୍ତ ଠିକା ସଂସ୍ଥା ବିରୋଧରେ FIR ଦେଇଛନ୍ତି ।

ବର୍ଷ ପରେ ବର୍ଷ ଗଡ଼ୁଛି, କଣ୍ଟ ପୁରୁଛି ହେଲେ ଶେଷ ହେଉନି ପାନୀୟ ଜଳ ପ୍ରକଳ୍ପ । ରାଜ୍ୟରେ ଅଧାପନ୍ତରିଆ ହୋଇପଡ଼ିଛି ପ୍ରାୟ ୩୫ ହଜାର କୋଟି ଟଙ୍କାର ମେଗା ପ୍ରକଳ୍ପ । ପୂର୍ବ ସରକାରଙ୍କ ଅଣଓଡ଼ିଆ ଠିକାଦାର ପ୍ରୀତି ଯୋଗୁଁ ଆଜି ହନ୍ତସନ୍ତ ହେଉଛନ୍ତି ସାଧାରଣ ଲୋକ ।

ଅସମ୍ପୂର୍ଣ୍ଣ ପ୍ରକଳ୍ପ ଦାୟିତ୍ୱରେ ଥିବା ପୁରୀ ଜିଲ୍ଲାର ୧୪ ଜଣ JE ଓ AEଙ୍କ ଦରମା ବନ୍ଦ କରିବାକୁ RWSS ଚିଫ୍ ଇଞ୍ଜିନିୟର ନିର୍ଦ୍ଦେଶ ଦେଇଥିଲେ । ପୁରୀ ଜିଲ୍ଲାରେ ୨୦୧୮ରୁ ଆରମ୍ଭ ହୋଇଥିବା ୮ଟି ମେଗା ପ୍ରକଳ୍ପ ମଧ୍ୟରୁ ଏଯାଏଁ ମାତ୍ର ଗୋଟିଏ କାର୍ଯ୍ୟକ୍ଷମ ହୋଇପାରିଛି ।

ସେପଟେ RTI ତଥ୍ୟରୁ ଆସିଛି ଆଉ ଏକ ସାଂଘାତିକ ସତ । ପୂର୍ବତନ ମୁଖ୍ୟମନ୍ତ୍ରୀଙ୍କ ଜିଲ୍ଲା ଗଞ୍ଜାମର ୧୧ ଟି ବ୍ଲକକୁ ପାଣି ଯୋଗାଇବା ଲକ୍ଷ୍ୟରେ ଜଗନ୍ନାଥପ୍ରସାଦ ବ୍ଲକ ଗାୟାଗଣ୍ଡା ଠାରେ ଆରମ୍ଭ ହୋଇଥିଲା ମହାନଦୀ ଜଳ ପ୍ରକଳ୍ପ । ୧ ହଜାର ୯ ଶହ ୭୩ କୋଟି ବ୍ୟୟରେ ୨୦୨୨ରେ L&T କମ୍ପାନୀକୁ ଦେଇଥିଲେ ପ୍ରକଳ୍ପ କାମ । ହେଲେ ଆଜିଯାଏ କାମ ସରୁନି । ବିଛା ଯାଇଥିବା ପାଇପ ରକ୍ଷଣା ବେକ୍ଷଣ ଅଭାବରୁ କେଉଁଠି ପାଇପ ଉପରେ ଗାଡ଼ି ଚକା ମାଡିଗଲାଣି ତ ଆଉ କେଉଁଠି ପାଇପ କଟି ଗଲାଣି । ପ୍ରକଳ୍ପ ନିର୍ମାଣ ଶେଷ ବେଳକୁ ପାଇପ ଲାଇନ ଗୁଡ଼ିକ ଥିବ ନା ନାହିଁ ସନ୍ଦେହ ।

ଏଥିସହ ପଢ଼ନ୍ତୁ: ବନ୍ୟା କମିଲା...ଯନ୍ତ୍ରଣା ବଢ଼ିଲା, ତିନି ଜିଲ୍ଲାରେ ଜଳବନ୍ଦୀ ଲୋକଙ୍କ ହାହାକାର

ଠିକ୍ ସେମିତି ଅନିଶ୍ଚିତତା ଭିତରେ ଯାଜପୁର ଧର୍ମଶାଳା ନିର୍ବାଚନ ମଣ୍ଡଳୀ ବାଲିକୁଦିଆ ଇଣ୍ଟେକ ୱେଲ ପ୍ରୋଜେକ୍ଟ । ୩ ଶହ ୩୫କୋଟି ଟଙ୍କା ବ୍ୟୟରେ ଧର୍ମଶାଳା ଓ ବଡ଼ଚଣାରେ ଜଳ ଯୋଗାଣ ପାଇଁ ୨୦୧୮ରେ କାମ ଆରମ୍ଭ ହୋଇଥିଲା । ପ୍ରତି ପଞ୍ଚାୟତରେ ଓଭର ହେଡ୍ ଟାଙ୍କି ବସିଛି, ଗାଁ ଗାଁ ରେ ପାଇପ ଲାଇନ ବି ବିଛା ଯାଇଛି । ହେଲେ ପାଣି ଆସୁନି । ଏପଟେ ୮୫ ପ୍ରତିଶତ କାମ ହେଉଥିବା ଦର୍ଶାଇ ଠିକା ସଂସ୍ଥା ପାଖାପାଖି ୩ ଶହ ୨୩ କୋଟି ଟଙ୍କା ଉଠାଇ ସାରିଲାଣି ।

ବିଜେଡି ସରକାର ସମୟରେ ଏସବୁ କାମର ପୋଲ ଖୋଲିଛି ନଗଦ ଆସିଥିବା ଆରଟିଆଇ ତଥ୍ୟ । ପ୍ରାୟ ୩୫ ହଜାର କୋଟି ଟଙ୍କାର ୨୦୭ ଟି ପ୍ରକଳ୍ପ ବାବଦରେ ଏହି ତଥ୍ୟ ଦେଇଛନ୍ତି ରାଜ୍ୟ ସରକାର । ସେଥିରୁ ୩୨ଟି ପ୍ରକଳ୍ପ କାର୍ଯ୍ୟକ୍ଷମ ହୋଇଥିବା ବେଳେ ୨ଟି ପ୍ରକଳ୍ପ ଆଂଶିକ କାର୍ଯ୍ୟକ୍ଷମ ହୋଇଛି। ମନ୍ତ୍ରୀ କହିଛନ୍ତି ଲକ୍ଷ୍ୟ ସମୟରେ କାମ ସାରିବାକୁ କୁହାଯାଇଛି । ବିଳମ୍ଭ କଲେ ଠିକା ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ଚେତାବନୀ ବି ଦିଆଯାଇଛି ।

କେବଳ ଏତଲା ନୁହେଁ, ଅବହେଳା କରୁଥିବା ଏଜେନ୍ସିକୁ ସମ୍ପୂର୍ଣ୍ଣ ବ୍ଲାକଲିଷ୍ଟ କରି ନୂତନ ଠିକାଦାରଙ୍କୁ ଦାୟିତ୍ୱ ଦେବାକୁ ଦାବି ଜୋର ଧରିଛି । ମାର୍ଚ୍ଚ ୨୦୨୭ ସୁଦ୍ଧା ପ୍ରତି ଗାଁରେ ଶୁଦ୍ଧ ପାନୀୟ ଜଳ ପହଞ୍ଚାଇବା ସରକାରଙ୍କ ଲକ୍ଷ୍ୟ କେବେ ପୂରଣ ହେଉଛି, ତାହା ଦେଖିବାକୁ ବାକି ରହିଲା ।