ବାଲେଶ୍ୱର ଜିଲ୍ଲା ଜିଲ୍ଲାରେ ଖସୁଛି ସୁବର୍ଣ୍ଣରେଖା ଜଳସ୍ତର । କିନ୍ତୁ କମୁନି ୨ ଲକ୍ଷରୁ ଅଧିକ ଲୋକଙ୍କ ଦୁର୍ଦ୍ଦଶା । ଭୋଗରାଇ ବ୍ଲକ୍‌ର ୧୮ରୁ ଅଧିକ ପଞ୍ଚାୟତର ୧୨୦ରୁ ଅଧିକ ଗାଁ ଏବେ ବି ଜଳବନ୍ଦୀ । ଦୀର୍ଘ ୨୦ ଦିନ ହେଲା ଚକଇଶବ ଗାଁର ୨ ଶହ ପରିବାର ପାଣି ଭିତରେ ଫସି ରହିଛନ୍ତି । କୁସୁଡ଼ା ଗାଁର ଅନ୍ନପୂର୍ଣ୍ଣା ଦାସଙ୍କ ପରିବାର ଭଳି ଶହ ଶହ ଲୋକ ଛାତ ଉପରେ ଓ ପାଣି ଭିତରେ ଭୟଭୀତ ଅବସ୍ଥାରେ ଦିନ କାଟୁଛନ୍ତି । ଘରେ ଥିବା ଧାନ-ଚାଉଳ ନଷ୍ଟ ହୋଇଯାଇଛି, ଜୀବନ ବଞ୍ଚିଛି ସତ କିନ୍ତୁ ଜୀବିକା ଲୁଟିନେଇଛି ବନ୍ୟା । ପ୍ରଶାସନିକ ସହାୟତା ସମୁଦ୍ରକୁ ଶଙ୍ଖେ । ଏମିତି ସ୍ଥିତିରେ ଆଶା ସାଜିଛନ୍ତି ସମାଜସେବୀ । ବିପନ୍ନଙ୍କୁ ପାନୀୟ ଜଳ ଓ ଶୁଖିଲା ଖାଦ୍ୟ ଯୋଗାଉଛନ୍ତି । ଅନ୍ୟପଟେ ମନୁନଗର ଗାଁରେ ଓଡ୍ରାଫ୍ କି ଆମ୍ବୁଲାନ୍ସ ପହଞ୍ଚି ନ ପାରିବାରୁ ସୃଷ୍ଟି ହେଲା ବିଷମ ସ୍ଥିତି । ଅସୁସ୍ଥ ହୋଇଥିବା ଦିନବନ୍ଧୁ ପରିଡ଼ାଙ୍କୁ ସ୍ଥାନୀୟ ଜଣେ ସମାଜସେବୀ ପିଣ୍ଟୁ ପାଲ ନିଜ ଟ୍ରାକ୍ଟରରେ ମୁଖ୍ୟ ରାସ୍ତାକୁ ନେଇ ହସ୍ପିଟାଲ ପଠାଇଲେ ।

ସୁବର୍ଣ୍ଣରେଖାର ତୃତୀୟ ବନ୍ୟା ବାଲିଆପାଳ ଓ ଜଳେଶ୍ୱର ବ୍ଲକ୍‌ରେ ବି ସୃଷ୍ଟି କରିଛି ପ୍ରଳୟ । ପାଣି ନିଷ୍କାସିତ ହେଉନଥିବାରୁ ହଜାର ହଜାର ହେକ୍ଟର ଜମିରେ ପନିପରିବା ଓ ଧାନ ଚାଷ ସମ୍ପୂର୍ଣ୍ଣ ଉଜୁଡ଼ି ଯାଇଛି । ଗୋରୁଗାଈ ଭୋକ ଉପାସରେ ଅଛନ୍ତି । ଜାମକୁଣ୍ଡା ପଞ୍ଚାୟତର ବହୁ ଗାଁ ବାହ୍ୟଜଗତରୁ ବିଚ୍ଛିନ୍ନ ହୋଇଥିବା ବେଳେ ପ୍ରଶାସନ ପକ୍ଷରୁ ଦିଆଯାଇଥିବା ପାୱାରବୋଟ୍ ଗୁଡ଼ିକୁ ହଠାତ୍ ବନ୍ଦ କରିଦିଆଯାଇଛି । ଫଳରେ ଲୋକେ ଦେଶୀ ଡଙ୍ଗାରେ ଟଙ୍କା ଦେଇ ବା ବିପଦସଙ୍କୁଳ ଭାବେ ପାଣିରେ ପଶି ଯାତାୟାତ କରୁଛନ୍ତି ।

ସେପଟେ ଯାଜପୁର ଜିଲ୍ଲାରେ ବୈତରଣୀ ଓ ଶାଖା ନଦୀ କାଣୀରେ ବନ୍ୟା ଆସିବା ଫଳରେ ଦଶରଥପୁର ବ୍ଲକ୍‌ର ୧୯ଟି ଗ୍ରାମ ପଞ୍ଚାୟତର ୬୨ଟି ଗାଁ ଗୁରୁତର ଭାବେ ପ୍ରଭାବିତ ହୋଇଛି । ତରପଦା, ମଲ୍ଲିକାପୁର, କସପା ଓ ଜୟନ୍ତରା ପଞ୍ଚାୟତରେ ନିର୍ମାଣଧୀନ ଘାଇ ବାଟେ ପୁଣି ବନ୍ୟାପାଣି ପଶିବାରୁ ବ୍ୟାପକ ଚାଷଜମି ବୁଡ଼ି ରହିଛି । ପାଣି କମିବା ପରେ ଏବେ ଡୋଭାବିଲ ପାଟଣାଠାରେ ଜଳସମ୍ପଦ ବିଭାଗ ପକ୍ଷରୁ ଯୁଦ୍ଧକାଳୀନ ଭିତ୍ତିରେ ଘାଇ ମରାମତି ଚାଲିଛି । ୨୦୦ରୁ ଅଧିକ ଶ୍ରମିକ ବାଲିବସ୍ତା, ଡଷ୍ଟ, କାଠ ଓ ବାଉଁଶ ବ୍ୟବହାର କରି ବନ୍ଧା ରାସ୍ତା ମରାମତି କରୁଛନ୍ତି ।

ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ୍‌ରେ ବନ୍ୟା ପରେ ବନ୍ୟା ଲୋକଙ୍କ ଜୀବନକୁ ଅସ୍ତବ୍ୟସ୍ତ କରିସାରିଲାଣି । ମାତ୍ର ଗୋଟିଏ ମାସ ମଧ୍ୟରେ ଲଗାତାର ୪-୪ଟି ବନ୍ୟା ପ୍ରକୃତିର ଦାଉ ସାଜିଛି । ଚାନ୍ଦବାଲିର ମୁଆଁ ଗାଁ ଆଜି ବି ଜଳମଗ୍ନ । ଆରଡ଼ି-ମୁଆଁ ଘୋଷରା ରାସ୍ତାରେ ବନ୍ୟାପାଣି ପ୍ରବାହିତ ହେଉଥିବାରୁ ଗାଁକୁ ଯିବା ପାଇଁ ଡଙ୍ଗା ହିଁ ସାଜିଛି ଏକମାତ୍ର ଭରସା । ପୂର୍ବ ବନ୍ୟାର ଘା’ ଶୁଖିନଥିବା ବେଳେ ଲୋକେ ଘରଦ୍ୱାର ସଜାଡ଼ି ସ୍ୱାଭାବିକ ଜୀବନକୁ ଫେରିବାକୁ ଚେଷ୍ଟା କରୁଥିବା ବେଳେ ପୁନର୍ବାର ବନ୍ୟା ଆସି ସବୁ ଆଶାକୁ ଧୋଇ ନେଇଛି ।

ପ୍ରକୃତିର ଦାଉ ଏବଂ ପ୍ରଶାସନର ଅବହେଳା ଭିତରେ ଓଡ଼ିଶାର ଏହି ତିନି ଜିଲ୍ଲାର ବନ୍ୟା ବିପନ୍ନ ଏବେ ଦୁର୍ଦ୍ଦଶା ଭୋଗୁଛନ୍ତି । ତୁରନ୍ତ କ୍ଷତିପୂରଣ ସହ ପାୱାରବୋଟ୍ ଓ ରିଲିଫ୍ ସାମଗ୍ରୀ ପହଞ୍ଚାଇବାକୁ ଦାବି ହୋଇଛି ।

ଏଥିସହ ପଢ଼ନ୍ତୁ: ବାରମ୍ବାର ବନ୍ୟା ବଢାଉଛି ଲୋକଙ୍କ ଦୁର୍ଦ୍ଦଶା, ସୁବର୍ଣ୍ଣରେଖା ବନ୍ୟା ନେଲା ଦୁଇଟି ଅମୁଲ୍ୟ ଜୀବନ