South Odisha Flood / ଗଭୀର ଅବପାତ ଆଣିଲା ପ୍ରଳୟ...ବୁଡ଼ିଲା ହଜାର ହଜାର ଏକର ଜମି, ସର୍ବସ୍ୱାନ୍ତ ଚାଷୀ

ଉତ୍ତରରୁ ଦକ୍ଷିଣ...ବର୍ଷା ଓ ବନ୍ୟାରେ ଉବୁଟୁବୁ ପୂରା ଓଡ଼ିଶା । ବିଶେଷ କରି ଦକ୍ଷିଣ ଓଡ଼ିଶାର ଗଞ୍ଜାମ, ମାଲକାନଗିରି, ନବରଙ୍ଗପୁର ଓ ଗଜପତି ଜିଲ୍ଲାରେ ଗଭୀର ଅବପାତ ଜନିତ ଲଗାଣ ବର୍ଷା ଆଣିଦେଇଛି ଭୟଙ୍କର ଦୁର୍ଦ୍ଦଶା । ଋଷିକୂଲ୍ୟା ଓ ଚିଲିକା ଫୁଲିବା ଯୋଗୁଁ ଗଞ୍ଜାମ ଜିଲ୍ଲାରେ ଏକର ଏକର ଧାନ ଓ ପରିବା ଚାଷ ସମ୍ପୂର୍ଣ୍ଣ ଉଜୁଡ଼ି ଯାଇଛି । ସେପଟେ ମାଲକାନଗିରିର କାଲିମେଳା ଓ କୋରକୋଣ୍ଡା ଘାଟିରେ ଭୂସ୍ଖଳନ ଯୋଗୁଁ ଯାତାୟାତ ସମ୍ପୂର୍ଣ୍ଣ ଠପ୍ ହୋଇପଡ଼ିଥିବା ବେଳେ ଶତାଧିକ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି । ନବରଙ୍ଗପୁର ଜିଲ୍ଲା କୋଷାଗୁମୁଡ଼ାରେ ହଜାରେ ଏକରରୁ ଅଧିକ ଧାନ ଚାଷ ବୁଡ଼ି ରହିଥିବା ବେଳେ ସ୍ଥିତି ସଙ୍ଗୀନ ରହିଛି ।

ଲଗାଣ ବର୍ଷା ଓ ଗଭୀର ଅବପାତ ଦକ୍ଷିଣ ଓଡ଼ିଶାରେ ଆଣିଛି ପ୍ରଳୟ । ଗଞ୍ଜାମରେ ଅତି ସଙ୍ଗୀନ ହୋଇଛି ବନ୍ୟା ସ୍ଥିତି । ସମୁଦ୍ର, ଚିଲିକା ଓ ଋଷିକୂଲ୍ୟାର ଶାଖା ନଦୀଗୁଡ଼ିକ ଫୁଲିବା ଯୋଗୁଁ ହଜାର ହଜାର ଏକର ଚାଷଜମି ଜଳମଗ୍ନ । ଏ ଅସମୟ ବିପତ୍ତି ବିଶେଷ କରି ସବୁଜ ପରିବା ଓ କୋବି ଚାଷୀଙ୍କ ମେରୁଦଣ୍ଡ ଭାଙ୍ଗି ଦେଇଛି । ଗଞ୍ଜାମ ବ୍ଲକର ଝାରେଡ଼ି-ରାଧାଗୋବିନ୍ଦପୁର ଓ ସିପକୁଦା ଅଞ୍ଚଳରେ ଶହ ଶହ ଏକର ଜମିରେ ହୋଇଥିବା ଫୁଲକୋବି ଚାଷ ଓ ତଳି ସମ୍ପୂର୍ଣ୍ଣ ନଷ୍ଟ ହୋଇଯିବାରୁ ଚାଷୀ ଏବେ ସର୍ବସ୍ୱାନ୍ତ ।
ମାଲକାନଗିରି ଜିଲ୍ଲାରେ ଲଗାଣ ବର୍ଷା ଦେଇଛି ଭୟଙ୍କର ଦୁଃଖ । କାଲିମେଳା ସୁଦ୍ଧାଖୁଣ୍ଟା-ଆମ୍ବପଦର ଘାଟି ରାସ୍ତାର ମାଛଘାଟି ନିକଟରେ ବିଶାଳ ଭୂସ୍ଖଳନ ଘଟିଛି । ଗଛ ଉପୁଡ଼ି ଓ ମାଟି ଅତଡ଼ା ଖସି ଯାତାୟାତ ସମ୍ପୂର୍ଣ୍ଣ ଠପ୍ ହୋଇଥିବା ବେଳେ ବହୁ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି । କାଲିମେଳାରୁ ବାହାରିଥିବା ODRAF ଟିମ୍ ମଧ୍ୟ ରାସ୍ତାରେ ଅଟକି ରହିଛି । ସେହିପରି କୋରକୋଣ୍ଡା ବ୍ଲକର ବାୟାପଡ଼ା ଘାଟିରେ ଭୂସ୍ଖଳନ, ବଣ୍ଡାଘାଟିରେ କଲଭର୍ଟ ଭାଙ୍ଗିବା ଓ ଜିଲ୍ଲାର ୧୦୪୫ଟି ଗାଁ ବର୍ଷାରେ ପ୍ରଭାବିତ ହୋଇଛି ।

ନବରଙ୍ଗପୁର କୋଷାଗୁମୁଡ଼ା ବ୍ଲକର ୭ଟି ପଞ୍ଚାୟତରେ ସିଲା ନଦୀର ବନ୍ୟାଜଳ ମାଡ଼ିଯାଇ ହଜାରେ ଏକରରୁ ଉର୍ଦ୍ଧ୍ୱ ଧାନ ଓ ମକା ଚାଷ ବୁଡ଼ାଇ ଦେଇଛି । ଋଣ କରି ଚାଷ କରିଥିବା ଚାଷୀ ଏବେ ଚିନ୍ତାରେ । ଏହି ସମୟରେ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଓ ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ବୋଟ୍ ଯୋଗେ ଜଳବନ୍ଦୀ ଅଞ୍ଚଳ ଘାଟବାସୁଲି, ଦୁଗଲାହାଣ୍ଡି ଓ ପଡ଼େଇଗୁଡ଼ା ପରିଦର୍ଶନ କରି ସୁଖିଲା ଖାଦ୍ୟ ଓ କମ୍ବଳ ବଣ୍ଟନ କରିଛନ୍ତି । ଘରଦ୍ୱାର ଭାଙ୍ଗିବା ସହ ଚାଷଜମିରେ ବାଲି ଚରିଯିବା ଦକ୍ଷିଣ ଓଡ଼ିଶାର ଲୋକଙ୍କ ଜୀବନଜୀବିକାକୁ ଦୋହଲାଇ ଦେଇଛି ।