Schools Closed Odisha / ବନ୍ୟାକୁ ନେଇ ପ୍ରଶାସନର ବଡ଼ ନିଷ୍ପତ୍ତି, ଭଦ୍ରକରେ ବନ୍ଦ ରହିବ ୧୬୬ ବିଦ୍ୟାଳୟ

ରାଜ୍ୟରେ ଚଳିତ ବର୍ଷ ଚତୁର୍ଥ ଥର ପାଇଁ ବନ୍ୟା ମାରିଛି ଚାବୁକ୍ । ବୁଡ଼ିଛି ଫସଲ, ଭାଙ୍ଗିଛି ଘର, ଆଉ ଆଣ୍ଠେଇ ପଡ଼ିଛି ଚାଷୀର ମେରୁଦଣ୍ଡ । ସମୁଦ୍ର ଭଳି ଦିଶୁଛି ଗାଁ ଗଣ୍ଡା, ରାସ୍ତାଘାଟରେ ଛାତିଏ ଉଚ୍ଚର ବନ୍ୟାପାଣି, ତା’ ଭିତରେ ବାସହରା ହୋଇ ପଡ଼ି ରହିଛନ୍ତି ହଜାର ହଜାର ଲୋକ ।

ଭଦ୍ରକ ଜିଲ୍ଲାରେ ଲଗାତାର ବର୍ଷା ଓ ବନ୍ୟା ପରିସ୍ଥିତି ଜାରି ରହିଥିବା ବେଳେ ଛାତ୍ରଛାତ୍ରୀଙ୍କ ସୁରକ୍ଷାକୁ ଗୁରୁତ୍ୱ ଦେଇ ଜିଲ୍ଲା ପ୍ରଶାସନ ପକ୍ଷରୁ ବଡ଼ ପଦକ୍ଷେପ ନିଆଯାଇଛି । ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଭଦ୍ରକ ଜିଲ୍ଲାର ୫ଟି ବ୍ଲକ୍‌ର ୧୬୬ଟି ପ୍ରଭାବିତ ବିଦ୍ୟାଳୟ ଆଜି ବନ୍ଦ ରହିବ ।

ବନ୍ୟା ପରିସ୍ଥିତି ଏବଂ ଲଗାତାର ବର୍ଷା ଯୋଗୁଁ ଅନେକ ଅଞ୍ଚଳ ପ୍ରଭାବିତ ହୋଇଥିବାରୁ ବିଦ୍ୟାଳୟକୁ ଯାତାୟାତ ସମୟରେ ଛାତ୍ରଛାତ୍ରୀଙ୍କ ସୁରକ୍ଷା ପ୍ରତି ବିପଦ ରହିଛି । ଏହାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଏହି ନିଷ୍ପତ୍ତି ନିଆଯାଇଛି ।

ଏହି ନିର୍ଦ୍ଦେଶ ଅନୁଯାୟୀ ଧାମନଗର, ଭଦ୍ରକ, ଚାନ୍ଦବାଲି, ତିହିଡି ଓ ବାସୁଦେବପୁର ବ୍ଲକ୍‌ର ପ୍ରଭାବିତ ବିଦ୍ୟାଳୟଗୁଡ଼ିକରେ ବୁଧବାର ଶିକ୍ଷାଦାନ ବନ୍ଦ ରହିବ । ଛାତ୍ରଛାତ୍ରୀଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ବିଦ୍ୟାଳୟ ବନ୍ଦ ରଖିବାର ଏହି ନିଷ୍ପତ୍ତି ନିଆଯାଇଥିବା ବେଳେ ପରିସ୍ଥିତି ଅନୁଧ୍ୟାନ କରି ପରବର୍ତ୍ତୀ ନିଷ୍ପତ୍ତି ନିଆଯିବ।

ସେପଟେ ଉପରମୁଣ୍ଡରେ ଜଳ ପ୍ରବେଶ କମିବା ପରେ ହୀରାକୁଦ ଡ୍ୟାମ୍‌ର ଗେଟ୍‌ ସଂଖ୍ୟା ହ୍ରାସ କରାଯାଇଛି । ତେବେ ମୁଣ୍ଡଳୀ ଦେଇ ୭ ଲକ୍ଷ ୫୪ ହଜାର କ୍ୟୁସେକ୍‌ ଜଳ ପାର୍‌ ହେଉଥିବାରୁ ତଳିଆ ଅଞ୍ଚଳରେ ବିପଦ ବଢ଼ିଛି । କଟକ ଜିଲ୍ଲା ଆଠଗଡ଼ ଓ ତିଗିରିଆ ଅଞ୍ଚଳରେ ମହାନଦୀର ବ୍ୟାକ୍ ୱାଟର ପ୍ରବେଶ କରିବା ଯୋଗୁଁ ସୋମପଡ଼ା ରାସ୍ତା ଉପରେ ୩ ଫୁଟ୍‌ର ପାଣି ଚାଲୁଛି । ସୋମପଡ଼ାର ମା' ବଡ଼ ବନ୍ଧିଆଣିଙ୍କ ମନ୍ଦିର ବୁଡ଼ିଯାଇଥିବା ବେଳେ ସୁକୁଆଖେଳା ଗାଁ ଜଳବନ୍ଦୀ ହୋଇପଡ଼ିଛି ।

ସେହିପରି ବାଲେଶ୍ୱରର ବାଲିଆପାଳ, ଭୋଗରାଇ ଓ ଜଳେଶ୍ୱର ବ୍ଲକରେ ସୁବର୍ଣ୍ଣରେଖା ନଦୀର ବନ୍ୟାଜଳ ପ୍ରବେଶ କରି ଶତାଧିକ ଗାଁକୁ ବାହ୍ୟ ଜଗତରୁ ବିଚ୍ଛିନ୍ନ କରିଦେଇଛି । ଭଦ୍ରକର ଧାମନଗର ଓ ତିହିଡ଼ି, ଯାଜପୁରର ଦଶରଥପୁର ଏବଂ ଅନୁଗୋଳର ଟିକରପଡ଼ା ଅଞ୍ଚଳରେ ବନ୍ୟା ସ୍ଥିତି ସଙ୍ଗୀନ ରହିଛି । ନଦୀବନ୍ଧ ଗୁଡ଼ିକରେ ଘାଇ ସୃଷ୍ଟି ହୋଇ ଶତାଧିକ ଗାଁରେ ବନ୍ୟାପାଣି ମାଡ଼ି ଚାଲିଛି । ଉପରମୁଣ୍ଡରେ ପାଣି କମୁଥିଲେ ମଧ୍ୟ ତଳିଆ ଅଞ୍ଚଳରୁ ବନ୍ୟାପାଣି ଛାଡ଼ିବା ପାଇଁ ଆହୁରି ୩ ରୁ ୪ ଦିନ ସମୟ ଲାଗିବ ।