Flood Relief Package / ବନ୍ୟା ବିପନ୍ନଙ୍କ ସହ ସରକାର; ୩୩%ରୁ ଅଧିକ ଫସଲ କ୍ଷତି, କ୍ଷତିଗ୍ରସ୍ତ ଘର ପାଇଁ ସହାୟତା ଘୋଷଣା

ଭୁବନେଶ୍ଵର: ବନ୍ୟାରେ ବାସ ସହ ବେଉସା ଉଜୁଡ଼ି ଯାଇଛି । ମୁଣ୍ଡ ଉପରୁ ଛାତ ହଟିଯିବା ସହ ବନ୍ୟା ଛଡ଼ାଇ ନେଇଛି ବର୍ଷକର ଖାଦ୍ୟ । କେଉଁଠି ଘର ପାଣିରେ ବୁଡ଼ିଛି, କେଉଁଠି ପ୍ରବଳ ସୁଅ ଭସାଇ ନେଇଛି । ବାସ ସ୍ଥାନ ସହ ଭୂମିରେ ଲୋଟି ଯାଇଛି କ୍ଷେତରେ ଫଳିଥିବା ସୁନା ସଶ୍ୟ । ଦକ୍ଷିଣ ଓଡ଼ିଶାରେ ବାତ୍ୟା 'ଅର୍ଣ୍ଣବ' ଓ ପରବର୍ତ୍ତୀ ବନ୍ୟା ପରେ ସ୍ଥିତି ଚିନ୍ତାଜନକ ରହିଛି ।

ଦକ୍ଷିଣ ଓଡ଼ିଶାର ଜିଲ୍ଲା ଗୁଡ଼ିକରେ ବ୍ୟାପକ କ୍ଷୟକ୍ଷତି ହୋଇଛି । ସର୍ବାଧିକ ପ୍ରଭାବିତ ହୋଇଛି ୩ ଜିଲ୍ଲା ଗଞ୍ଜାମ, ଗଜପତି, କନ୍ଧମାଳ । ଏହି ୩ ଜିଲ୍ଲା ପାଇଁ ରବିବାର ପ୍ୟାକେଜ୍ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏବେ କ୍ଷୟକ୍ଷତି ଆକଳନ ଚାଲିଥିବା ବେଳେ ସରକାର ଚାଷୀ ଓ ଘର କ୍ଷତିଗ୍ରସ୍ତଙ୍କୁ ଦୃଷ୍ଟିରେ ରଖି ପ୍ୟାକେଜ୍ ଘୋଷଣା କରିଛନ୍ତି ।

ଫୋକସରେ ଚାଷୀ

ବନ୍ୟା ପ୍ରଭାବିତ ଅଞ୍ଚଳର ଚାଷ ଜମିରେ ୩୩ ପ୍ରତିଶତରୁ ଅଧିକ ଫସଲ ନଷ୍ଟ ହୋଇଥିବା ସମସ୍ତ ଚାଷୀଙ୍କୁ ସହାୟତା ମିଳିବ । ସର୍ବାଧିକ ୨ ହେକ୍ଟର ପର୍ଯ୍ୟନ୍ତ କୃଷି ନିବେଶ ସହାୟତା ପ୍ରଦାନ କରିବେ ସରକାର । ଅଣଜଳସେଚିତ ଚାଷ ଜମି ହେକ୍ଟର ପିଛା ୮ ହଜାର ୫ ଶହ ଟଙ୍କା । ନିଶ୍ଚିତ ଜଳସେଚିତ ଚାଷ ଜମି ହେକ୍ଟର ପିଛା ୧୭ ହଜାର ଟଙ୍କା । ସମସ୍ତ ପ୍ରକାର ଫସଲ ପାଇଁ ହେକ୍ଟର ପିଛା ୨୨ ହଜାର ୫୦୦ ଟଙ୍କା ପ୍ରଦାନ କରାଯିବ ।

ପ୍ରଭାବିତ ଚାଷୀଙ୍କ ପାଇଁ କୃଷି ନିବେଶ ସହାୟତା (ପନିପରିବା, ବାରମାସୀ) ଅତି କମ୍‌ରେ ୨୫୦୦ ଟଙ୍କା ମିଳିବ । ନିଶ୍ଚିତ ଜଳସେଚିତ ଅଞ୍ଚଳରେ ୨ ହଜାର ଟଙ୍କା, ବର୍ଷା ନିର୍ଭରଶୀଳ ଅଞ୍ଚଳରେ ସର୍ବନିମ୍ନ ୧ ହଜାର ଟଙ୍କା ଦିଆଯିବ । ବାଲିଚର ଜମି ଓ ପଟୁ ମାଟି ହଟାଇବା ପାଇଁ ହେକ୍ଟର ପିଛା ୧୮ ହଜାର ଟଙ୍କା ସହାୟତା ପ୍ରଦାନ କରିବେ ସରକାର । ପ୍ରତ୍ୟେକ ଚାଷୀ ସର୍ବନିମ୍ନ ସହାୟତା ରାଶି ୨ ହଜାର ୨ ଶହ ଟଙ୍କା ପାଇବେ ।

ଏଥିସହ ପଢ଼ନ୍ତୁ: ଗଞ୍ଜାମ, ଗଜପତି, କନ୍ଧମାଳ ପାଇଁ ମୁଖ୍ୟମନ୍ତ୍ରୀଙ୍କ ପ୍ୟାକେଜ୍ ଘୋଷଣା; ପ୍ରତି ପରିବାର ପାଇବେ ନଗଦ ଅଢ଼େଇ ହଜାର ଟଙ୍କା 

ଚାଷୀଙ୍କୁ ୧ ଲକ୍ଷ ୨୦ ହଜାର ଡାଲି ଜାତୀୟ, ୫ ହଜାର ତୈଳ ବୀଜ ମିନିକିଟ୍, ୫୦ ହଜାର ପନିପରିବା ମଞ୍ଜି କିଟ୍ ଦିଆଯିବ । ରବି ଋତୁ ୨୦୨୬-୨୭ରେ କୀଟନାଶକ ଓ ଜୈବ କୀଟନାଶକ ଉପରେ ୭୫ ପ୍ରତିଶତ ସବସିଡି ବ୍ୟବସ୍ଥା କରାଯିବ । ଫସଲ ବୀମା ପାଇଁ ତୁରନ୍ତ ପଦକ୍ଷେପ ନିଆଯିବ ।

କୃଷି ଋଣ

ଖରିଫ ୨୦୨୬ ସମୟରେ ଦିଆଯାଇଥିବା ଋଣ ପ୍ରଭାବିତ ଅଞ୍ଚଳରେ ୩୩ ପ୍ରତିଶତରୁ ଫସଲ ଅଧିକ ନଷ୍ଟ କ୍ଷେତ୍ରରେ ମଧ୍ୟମ ମିଆଦି ଋଣରେ ପରିଣତ କରାଯିବ । ସ୍ଵଳ୍ପ ମିଆଦି ଋଣକୁ ମଧ୍ୟମ ମିଆଦି ଋଣରେ ରୂପାନ୍ତରିତ କରାଯିବ । ଚଳିତ ରବି ଋତୁରେ ଚାଷୀଙ୍କୁ ଅଧିକ ଋଣ ଦେବା ଲାଗି ବ୍ୟବସ୍ଥା ହେବ ।

କ୍ଷତିଗ୍ରସ୍ତ ଘର ପାଇଁ ସହାୟତା

କ୍ଷତିଗ୍ରସ୍ତ ଘର ପାଇଁ ସରକାର ସହାୟତା ଦେବେ । ସମତଳ ଅଞ୍ଚଳରେ ଘର ସମ୍ପୂର୍ଣ୍ଣ ନଷ୍ଟ ହୋଇଥିଲେ ୧ ଲକ୍ଷ ୨୦ ହଜାର ଟଙ୍କା ମିଳିବ । ପାହାଡ଼ିଆ ଅଞ୍ଚଳରେ ଘର ସମ୍ପୂର୍ଣ୍ଣ ଭାଙ୍ଗି ଯାଇଥିଲେ ୧ ଲକ୍ଷ ୩୦ ହଜାର ଟଙ୍କା ଦିଆଯିବ । ଆଂଶିକ କ୍ଷତିଗ୍ରସ୍ତ ପକ୍କା ଘର ପାଇଁ ୬ ହଜାର ୫୦୦ ଟଙ୍କା, ଆଂଶିକ କ୍ଷତିଗ୍ରସ୍ତ କଚ୍ଚା ଘର ପାଇଁ ୪ ହଜାର ଟଙ୍କା ପ୍ରଦାନ କରାଯିବ । କୁଡ଼ିଆ ଘର ନଷ୍ଟ ହୋଇଥିଲେ ୮ ହଜାର ମିଳିବ । ଗୁହାଳ ଘର କ୍ଷତିଗ୍ରସ୍ତ ହୋଇଥିଲେ ୩ ହଜାର ଟଙ୍କା ମିଳିବ ।

ଘର ସମ୍ପୂର୍ଣ୍ଣ ଭାସିଯିବା, ନଷ୍ଟ ହୋଇଯିବା, ୨ ଦିନରୁ ଅଧିକ ଜଳମଗ୍ନ ହୋଇ ରହିଥିଲେ ଉକ୍ତ ପରିବାରକୁ ପୋଷାକପତ୍ର ଲାଗି ଅଢ଼େଇ ହଜାର ଟଙ୍କା, ବାସନ କୁସନ ଓ ଘରକରଣା ସାମଗ୍ରୀ ପାଇଁ ଅଢ଼େଇ ହଜାର ଟଙ୍କା ପ୍ରଦାନ କରାଯିବ । ଏଥିସହ ବନ୍ୟା ପ୍ରଭାବିତ ଅଞ୍ଚଳର ପ୍ରତି ପରିବାରକୁ ୫୦ କେଜି ଚାଉଳ ସହ ସରକାର ଅଢ଼େଇ ହଜାର ଟଙ୍କା ନଗଦ ପ୍ରଦାନ କରିବେ ।

ପଶୁ ସମ୍ପଦ ପାଇଁ ସହାୟତା

ଗାଇଁ, ମଇଁଷି ମୃତ୍ୟୁ କ୍ଷେତ୍ରରେ ୩୭ ହଜାର ୫୦୦ ଟଙ୍କା ପ୍ରଦାନ କରାଯିବ । ମେଣ୍ଢା ଓ ଛେଳି ପାଇଁ ୪ ହଜାର ଟଙ୍କା, ବଳଦ ଓ ଘୋଡ଼ା ପାଇଁ ୩୨ ହଜାର ଟଙ୍କା, ବାଛୁରୀ ଓ ଗଧ ପାଇଁ ୨୦ ହଜାର ଟଙ୍କା ମିଳିବ । କୁକୁଡ଼ା ପାଇଁ ପକ୍ଷୀ ପିଛା ୧୦୦ ଟଙ୍କା ହିସାବରେ ସର୍ବାଧିକ ୧୦ ହଜାର ଟଙ୍କା ଦିଆଯିବ ।

ଦୁଗ୍ଧ ଚାଷୀଙ୍କୁ ୫୦୦ କିଲୋ ପର୍ଯ୍ୟନ୍ତ ଗୋଖାଦ୍ୟ ପ୍ରଦାନ କରାଯିବ । ମତ୍ସ୍ୟ ଚାଷ ପାଇଁ ହେକ୍ଟର ପିଛା ୧ ଲକ୍ଷ ୧୨ ହଜାର ଟଙ୍କା ୫୦୦ ପର୍ଯ୍ୟନ୍ତ କ୍ଷତିପୂରଣ ମିଳିବ । ସମୁଦ୍ର ଓ ଚିଲିକାରେ ଆଂଶିକ କ୍ଷତିଗ୍ରସ୍ତ ଡଙ୍ଗା ପିଛା ୫୦୦୦ ଟଙ୍କା କ୍ଷତିପୂରଣ ମିଳିବ । ବାତ୍ୟା ଦ୍ୱାରା ପ୍ରଭାବିତ ସମସ୍ତ ମହିଳା ସ୍ୱୟଂ ସହାୟକ ଗୋଷ୍ଠୀଙ୍କୁ ୫ ହଜାର ଟଙ୍କାର ସିଡ୍ ମନି ଦେବାକୁ ସରକାର ଘୋଷଣା କରିଛନ୍ତି ।