Odisha Flood Update / ଉତ୍ତର ଓଡ଼ିଶାକୁ ପିଛା ଛାଡ଼ୁନି ବନ୍ୟା, ଟିକିଏ ପାଗ ବିଗିଡ଼ିଲେ ଭାସୁଛି ଉତ୍ତର ଠୁ ଉପକୂଳ

ଛାନିଆ କଲାଣି ନଈ ବଢ଼ି । ଯେତେ ଥର ଉପର ମୁଣ୍ଡରେ ବର୍ଷା ହେଉଛି, ସେତେ ଥର ମାଡ଼ି ଆସୁଛି ବନ୍ୟା । ସିଧା କହିବାକୁ ଗଲେ ଉତ୍ତର ଓଡ଼ିଶାକୁ ପିଛା ଛାଡ଼ୁନି ବନ୍ୟା ଡର । ଉପରମୁଣ୍ଡରେ ବର୍ଷା ଯୋଗୁ ଏବେ ଉଛୁଳିଲାଣି ସୁବର୍ଣ୍ଣରେଖା, ବୁଢ଼ାବଳଙ୍ଗ, ଜଳକା, ସୋନ, ବୈତରଣୀ ଓ ସାଳନ୍ଦୀ । ଫୁଲୁଛି ନଦୀ, ରାତି ଅନିଦ୍ରା ନଈ କୂଳିଆ ଆଉ ସଜାଗ ପ୍ରଶାସନ । ଚଳିତ ବର୍ଷ ସୁବର୍ଣ୍ଣରେଖାରେ ଆସୁଛି ଚତୁର୍ଥ ବନ୍ୟା । ସଜାଗ ପାଇଁ ପ୍ରଶାସନ ପକ୍ଷରୁ କରାଯାଉଛି ସଚେତନ । ସେପଟେ ହୀରାକୁଦର ୨୦ ଗେଟ ଖୋଲା ଥିବାରୁ ଆସନ୍ତାକାଲି ରାତିରେ ମୁଣ୍ଡଳୀ ଅତିକ୍ରମ କରିବ ୬ ଲକ୍ଷ କ୍ୟୁସେକ୍ ବନ୍ୟାଜଳ ।

ଗଭୀର ଅବପାତ ପ୍ରଭାବରେ ସାରା ରାଜ୍ୟରେ ବର୍ଷା ଛେଚିଲା । ମୁଣ୍ଡ ଉପରୁ କଳା ବାଦଲ ସିନା ହଟିଛି, ଦେଲେ ନଦୀ ନାଳ ଫୁଲୁଥିବାରୁ ନଈ କୂଳିଆଙ୍କ ଛାତି ଧଡ଼ଧଡ଼ । ସୁବର୍ଣ୍ଣରେଖା, ବୁଢ଼ାବଳଙ୍ଗ, ଜଳକା, ସୋନ, ବୈତରଣୀ ଓ ସାଳନ୍ଦୀ ଉପରେ ଏବେ ନଜର । ଫୁଲୁଛି ନଦୀ, ରାତି ଅନିଦ୍ରା ନଈ କୂଳିଆ ଆଉ ସଜାଗ ରହିଛି ପ୍ରଶାସନ । ଚଳିତ ବର୍ଷ ସୁବର୍ଣ୍ଣରେଖାରେ ଆସୁଛି ଚତୁର୍ଥ ବନ୍ୟା । ପୂର୍ବ ତିନି ବନ୍ୟା ଠାରୁ ଏଥର ଅଧିକ ପାଣି ଆସିବ ବୋଲି ଆକଳନ ପରେ ସଜାଗ ରହିଛି ଜଳ ସମ୍ପଦ ବିଭାଗ । ଦୁର୍ବଳ ନଦୀ ବନ୍ଧ ଉପରେ ନଜର ରଖିବା ସହ ମହଜୁଦ ରଖାଯାଇଛି ବାଲିବସ୍ତା । ପୂର୍ବ ଥର ଯେଭଳି ଘାଇ ଘାଇଲା କଲା ଏଥର ଯେମିତି ସେଭଳି ସ୍ଥିତି ନ ଉପୁଜେ ସେଥିପ୍ରତି ରହିଛି କଡ଼ା ନଜର । ସୁବର୍ଣ୍ଣରେଖା ବିପଦସଂକେତ ଉପରେ ଥିବାରୁ ତଳିଆ ଅଞ୍ଚଳରେ ଉପୁଜିପାରେ ବନ୍ୟାସ୍ଥିତି । ଦୁର୍ବଳ ନଦୀବନ୍ଧ ସ୍ଥାନରେ ପ୍ରାୟ ୫ରୁ ୭ ହଜାର ବାଲିବସ୍ତା ଷ୍ଟକ୍ ରଖାଯାଇଛି ।

ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀଙ୍କ ସୂଚନା ଅନୁଯାୟୀ, ସୁବର୍ଣ୍ଣରେଖାର ଜଳସ୍ତର ବଢୁଛି । ଫଳରେ ବସ୍ତା, ବାଲିଆପାଳ, ଭୋଗରାଇ ଓ ଜଳେଶ୍ୱର ଅଞ୍ଚଳରେ ବନ୍ୟା ସ୍ଥିତି ସୃଷ୍ଟି ହୋଇପାରେ । ବୁଢ଼ାବଳଙ୍ଗ ବି ବିପଦ ସଂକେତ ଉପରେ ରହିଛି । ଆଜି ରାତିରେ ବୁଢାବଳଙ୍ଗ ଜଳସ୍ତର କ୍ରମଶଃ ହ୍ରସ ପାଇବ । ବୈତରଣୀ, ଜଳକା ଓ ସାଳନ୍ଦୀରେ ପାଣି ବଢ଼ୁଛି । ଆନନ୍ଦପୁର ବ୍ୟାରେଜ୍‌ର ୩୧ଟି ଗେଟ୍ ଖୋଲାଯାଇ ଜଳ ନିଷ୍କାସିତ ହେଉଛି ।

ସେହିପରି ମହାନଦୀରେ ବି ବଢିବ ପାଣି । ମୋଟ ୨୦ଟି ଗେଟରେ ଦେଇ ଜଳ ନିଷ୍କାସନ ଜାରି ରହିଛି । ୨୦ ଗେଟରେ ସେକେଣ୍ତ ପ୍ରତି ୩ ଲକ୍ଷରୁ ଅଧିକ କ୍ୟୁସେକ ଜଳ ନିଷ୍କାସିତ ହେଉଛି । ଆସନ୍ତାକାଲି ମଧ୍ୟରାତ୍ରି ସୁଦ୍ଧା ମୁଣ୍ଡଳୀଠାରେ ୬ ଲକ୍ଷ କ୍ୟୁସେକ୍ ବନ୍ୟାଜଳ ପ୍ରବାହିତ ହେବାର ସମ୍ଭାବନା ରହିଛି ।

ଉପରେ ବର୍ଷା, ଫୁଲୁଛି ତଳମୁଣ୍ଡ । ସତର୍କ ରହିବାକୁ ଡାକବାଜୀ ଯନ୍ତ୍ରରେ କରାଯାଉଛି ସତର୍କ । ଭଦ୍ରକ ଜିଲ୍ଲାର ଧାମନଗର ଅଞ୍ଚଳର ବୈତରଣୀ ଓ ଏହାର ଶାଖା ନଦୀ ଗେଙ୍ଗୁଟି ଏବଂ କୋଚିଳାରେ ବନ୍ୟା ଆସିଛି । ଲୋକଙ୍କୁ ସୁରକ୍ଷିତ ସ୍ଥାନକୁ ଯିବା ପାଇଁ ପରାମର୍ଶ ଦେଇଛି ପ୍ରଶାସନ ।

ପାଣିପାଗ ବିଭାଗର ସୂଚନା ଅନୁଯାୟୀ ଦୁର୍ବଳ ହେଉଛି ଅବପାତ । ଆସନ୍ତା ୧୨ ଘଣ୍ଟା ମଧ୍ୟରେ ଏହା ଆହୁରି ଦୁର୍ବଳ ହୋଇ ସ୍ପଷ୍ଟ-ଚିହ୍ନିତ ଲଘୁଚାପ କ୍ଷେତ୍ରରେ ପରିଣତ ହେବେ । ପ୍ରଭାବରେ ଆହୁରି ୨୪ ଘଣ୍ଟା ରାଜ୍ୟରେ ବର୍ଷା ସମ୍ଭାବନା ଥିବା ପାଣିପାଗ ବିଭାଗ ସୂଚନା ଦେଇଛି । ଆସନ୍ତା ୨୮ରୁ ରାଜ୍ୟରେ ପାଗ ବଦଳିବା ସହ ବର୍ଷା କମିବ । ଗତ ୨୪ ଘଣ୍ଟା ମଧ୍ୟରେ ସର୍ବାଧିକ ବର୍ଷା ମୟୂରଭଞ୍ଜର ନବନାରେ ୧୨୪.୪ ମିଲିମିଟର ରେକର୍ଡ ହୋଇଛି । ପାଣିପାଗ କେନ୍ଦ୍ରର ସୂଚନା ଟିକିଏ ଆଶ୍ବସ୍ତ ଆଣିଥିଲେ ବି ଉପର ମୁଣ୍ଡରେ ବର୍ଷା ଯୋଗୁ ଫୁଲୁଥିବା ନଦୀ ନାଳ ଯୋଗୁ ଉତ୍ତର ଓ ଉପକୂଳିଆଙ୍କ ଛାତି ଧଡ଼ଧଡ଼ ।