ରାଜ୍ୟରେ ଦେଖା ଦେଇଛି ଭୟଙ୍କର ତୈଳ ସଙ୍କଟ । ପେଟ୍ରୋଲ ପମ୍ପରେ ମିଳୁନାହିଁ ପେଟ୍ରୋଲ-ଡିଜେଲ୍‌ । ତେଲ ପକାଇବାକୁ ଆସି ପେଟ୍ରୋଲ ପମ୍ପରୁ ନିରାଶ ହୋଇଫେରୁଛନ୍ତି ସାଧାରଣ ଲୋକ । ରାଜ୍ୟର ବିଭିନ୍ନ ସ୍ଥାନରୁ ଦେଖିବାକୁ ମିଳୁଛି ଏହି ଚିତ୍ର । କେଉଁଠି ପେଟ୍ରୋଲ ପାଇଁ ଲମ୍ବା ଧାଡ଼ି ତ ଆଉ କେଉଁଠି ଦେଖିବାକୁ ମିଳୁଛି ହାହାକାର ସ୍ଥିତି । କଟକ, ଭୁବନେଶ୍ବର, ପୁରୀ, ରାଉରକେଲା, ବାଲେଶ୍ବର, ବାରିପଦା, ବଲାଙ୍ଗିର ଆଦି ସହରରେ ସ୍ଥିତି ସଙ୍ଗୀନ ହୋଇପଡ଼ିଛି ।

ତୈଳ ସଙ୍କଟ ଯୋଗୁଁ ପ୍ରଭାବିତ ହୋଇଛି ଘରୋଇ ବସ୍ ଚଳାଚଳ । ରାଜ୍ୟରେ ୧୪ ହଜାର ଘରୋଇ ବସସ୍‌ ଚଳାଚଳ କରୁଥିବା ବେଳେ ଏବେ ପାଖାପାଖି ୨ ହଜାର ବସ୍‌ ବନ୍ଦ ହୋଇଗଲାଣି । ପେଟ୍ରୋଲ ପମ୍ପରେ ତେଲ ନ ମିଳିବା ଯୋଗୁଁ ବିଭିନ୍ନ ଜିଲ୍ଲାରୁ ଏବଂ ଗାଁ ଗହଳିରୁ ବସ୍ ଆସିପାରୁନାହିଁ । ଏଭଳି ସ୍ଥିତି ଲାଗି ରହିଲେ ୫/୬ ଦିନ ଭିତରେ ରାଜ୍ୟରେ ସମସ୍ତ ବସ୍‌ ଚଳାଚଳ ବନ୍ଦ ହୋଇଯିବ । ସରକାର ଏଥିପ୍ରତି ତୁରନ୍ତ ଧ୍ୟାନ ଦିଅନ୍ତୁ । ପବ୍ଲିକ ଟ୍ରାନ୍ସପୋର୍ଟ ଭାବରେ ବ୍ୟବହାର ହେଉଥିବା ଗାଡ଼ି ଗୁଡିକ ପାଇଁ ସ୍ୱତନ୍ତ୍ର ବ୍ୟବସ୍ଥା କରି ପେଟ୍ରୋଲ ପମ୍ପ ଗୁଡିକରେ ତେଲ ଯୋଗାଇ ଦିଅନ୍ତୁ । ନଚେତ ଆଗକୁ ପରିସ୍ଥିତି ଉତ୍କଟ ହେବ ବୋଲି କହିଛନ୍ତି ଘରୋଇ ବସ୍ ମାଲିକ ସଂଘ ସମ୍ପାଦକ ଦେବେନ୍ଦ୍ର ସାହୁ ।

ସେପଟେ ବସ୍‌ ବନ୍ଦ ହେବା ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ପରିବହନ ମନ୍ତ୍ରୀ । ସେ କହିଛନ୍ତି, ଆଜି ମଧ୍ୟପ୍ରାଚ୍ୟ ରାଷ୍ଟ୍ରରେ ଯୁଦ୍ଧ ସ୍ଥିତି ଯୋଗୁଁ ବିଶ୍ବରେ ତୈଳ ସଙ୍କଟ ସୃଷ୍ଟି ହୋଇଛି । ତାକୁ ସହଯୋଗ କରିବା ଦରକାର ଏହା ମନୁଷ୍ୟକୃତ ବା ସରକାର କୃତ ନୁହେଁ । ଏହା ଅନ୍ୟମାନଙ୍କ ପ୍ରେସର ଯୋଗୁଁ ହିଁ ହୋଇଛି । ପ୍ରଧାନମନ୍ତ୍ରୀଙ୍କ ଅପିଲ୍‌କୁ ସମସ୍ତେ ମିଳିମିଶି ସହଯୋଗ କରିବା କଥା । କଟୁ ବାକ୍ୟ ଏଥିରେ ପ୍ରୟୋଗ କରିବା ଉଚିତ୍ ନୁହେଁ ବୋଲି କହିବା ସହିତ ଘରୋଇ ବସ୍ ମାଲିକ ସଂଘକୁ ବାର୍ତ୍ତା ଦେଇଛନ୍ତି ପରିବହନ ମନ୍ତ୍ରୀ ।