Baitarani River Embankment / ବୈତରଣୀ ଉପରେ ସରକାରଙ୍କ ସ୍ପେଶାଲ ଫୋକସ୍, ନଦୀ ବନ୍ଧ ହେବ ଚଉଡ଼ା ଓ ଉଚ୍ଚା

ଉପରମୁଣ୍ଡରେ ବର୍ଷା କମିଛି, ନଦୀଗୁଡ଼ିକରେ ବନ୍ୟାଜଳ ବି ହ୍ରାସ ପାଉଛି । ହେଲେ ତଳିଆ ଅଞ୍ଚଳରେ ଲୋକଙ୍କ ଦୁଃଖ, ଦୁର୍ଦ୍ଦଶା ଆଉ କଷ୍ଟ ଆଦୌ କମୁନାହିଁ । ବାଲେଶ୍ୱର, ଭଦ୍ରକ, ଯାଜପୁର ଓ କେନ୍ଦ୍ରାପଡ଼ାରେ ଏବେ ବି ଶତାଧିକ ଗାଁ ଜଳବନ୍ଦୀ । କେଉଁଠି ମାଟି କାନ୍ଥ ଓ ଓଦା ଭିଜା ଚୁଲିକୁ ଦେଖି ବିପନ୍ନ ଆଖିରୁ ଲୁହ ଝରୁଛି ତ ଆଉ କେଉଁଠି ହସ୍ପିଟାଲ ଯିବାକୁ ଡଙ୍ଗାଟିଏ ନପାଇ ଆଣ୍ଠୁଏ ପାଣିରେ କନ୍ଧରେ ରୋଗୀ ବୋହୁଛନ୍ତି ଗ୍ରାମବାସୀ । ସେପଟେ ଏହି ଭୟଙ୍କର ବନ୍ୟା ପରେ ଜଳସମ୍ପଦ ବିଭାଗ ଚେତିଛି । ଏଥର ମାନବକୃତ ନୁହେଁ, ବରଂ ଜଳର ଅଧିକ ପ୍ରବାହ ଯୋଗୁଁ ଭାଙ୍ଗିଛି ବନ୍ଧ । ଏଣିକି ବୈତରଣୀ ସମେତ ସବୁ ସମ୍ବେଦନଶୀଳ ନଦୀବନ୍ଧକୁ ଅଧିକ ଉଚ୍ଚ ଓ ଚଉଡ଼ା କରାଯିବ ବୋଲି ସୂଚନା ଦେଇଛନ୍ତି ସର୍ବୋଚ୍ଚ ଯନ୍ତ୍ରୀ ।

ଉତ୍ତର ବାଲେଶ୍ବରବାସୀଙ୍କୁ ଦୁଃଖ ଦେଉଛି ସୁବର୍ଣ୍ଣରେଖା । ବନ୍ୟା ପାଣି ଖସୁଛି ସତ, ହେଲେ ଭୋଗରାଇରେ ବଢ଼ିଚାଲିଛି ଦୁର୍ଦ୍ଦଶା । ଆରୁହାବୃତ୍ତି ସାହିରେ ୪ ଦିନ ହେଲା ଜଳିନି ଚୁଲି, ବନ୍ଧ ଉପରେ ବିତୁଛି ରାତି । ପାଣି ଛାଡ଼ିବା ପରେ ଲୋକେ ଭିଜା ଘରକୁ ଫେରୁଛନ୍ତି, ଏଠି ସେମାନଙ୍କୁ ସ୍ବାଗତ କରୁଛି ଆଣ୍ଠୁଏ ପଙ୍କ ଆଉ ଭଙ୍ଗା ମାଟି କାନ୍ଥ । ୩୦ ବର୍ଷ ଧରି ବସବାସ କରୁଥିବା ୩୦ଟି ପରିବାର ପାଖରେ ପଟ୍ଟା ଖଣ୍ଡିଏ ନଥିବାରୁ ପକ୍କା ଘରଟିଏ ବି ବନେଇ ପାରୁନାହାନ୍ତି । ଏପଟେ ସୁବର୍ଣ୍ଣରେଖାର ଦ୍ୱିତୀୟ ପର୍ଯ୍ୟାୟ ବନ୍ୟାରେ ୧୦ ହଜାର ହେକ୍ଟରରୁ ଅଧିକ ଧାନ ତଳି ସମ୍ପୂର୍ଣ୍ଣ ନଷ୍ଟ ହୋଇଯାଇଛି ।

ସେପଟେ ଭଦ୍ରକ ଜିଲ୍ଲାରେ ବୈତରଣୀ ଓ ସାଳନ୍ଦୀର ଜଳସ୍ତର କମିଥିଲେ ବି ଧାମନଗର, ତିହିଡ଼ି ଓ ଚାନ୍ଦବାଲିର ଶତାଧିକ ଗାଁ ଏବେ ବି ସମୁଦ୍ର ଭଳି ଦିଶୁଛି । ତିହିଡ଼ି ବ୍ଲକ୍ ତଳଦପା ଗାଁରେ ଦୀର୍ଘ ୨୦ ଦିନ ହେବ ଲୋକେ ଜଳବନ୍ଦୀ । ଦେଶୀ ଡଙ୍ଗାଟିଏ ସେମାନଙ୍କର ଏକମାତ୍ର ଭରସା । ସେପଟେ ବାସୁଦେବପୁର ବ୍ଲକ୍ ଜଗନ୍ନାଥପ୍ରସାଦ ପଞ୍ଚାୟତରେ ୪ରୁ୫ ଫୁଟ ପାଣି ଜମି ରହିଥିବାରୁ ବିପଦସଙ୍କୁଳ ଭାବେ ବାଉଁଶ ଓ ସୋଲ ଭେଳାରେ ସ୍କୁଲ ଯାଉଛନ୍ତି କୋମଳମତି ଶିଶୁ ।

ଅନ୍ୟପଟେ ଯାଜପୁର ଜିଲ୍ଲା ଦଶରଥପୁର ଓ ବିଞ୍ଝାରପୁର ଅଞ୍ଚଳରେ ହାହାକାର । ଖରସ୍ରୋତା ନଦୀର ନୂଆମାହାରାଠାରେ ସୃଷ୍ଟି ହୋଇଥିବା ୩୦୦ ଫୁଟର ବିରାଟ ଘାଇ ଦେଇ ଏବେ ବି ଗାଁ ଭିତରକୁ ହୁ ହୁ ହୋଇ ପଶୁଛି ବନ୍ୟା ପାଣି । ୧୦ଟି ପଞ୍ଚାୟତ ସମ୍ପୂର୍ଣ୍ଣ ଜଳମଗ୍ନ । ଗୋ ଖାଦ୍ୟ ଅଭାବରୁ ଗୋ ସମ୍ପଦ କଷ୍ଟ ପାଉଥିବା ବେଳେ ପ୍ରଶାସନିକ ସହାୟତା ମିଳୁନଥିବା ଅଭିଯୋଗ ହୋଇଛି ।

କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ ଅର୍ଗଳ ଗାଁରୁ ଆସିଛି ଚିନ୍ତାଜନକ ଦୃଶ୍ୟ । ଗାଁରେ ଡଙ୍ଗାଟିଏ ନଥିବାରୁ ଜ୍ୱରରେ ଆକ୍ରାନ୍ତ ଗୁରୁତର ରୋଗୀଙ୍କୁ ଛଅ ଜଣ ଯୁବକ କନ୍ଧରେ ପକାଇ ଆଣ୍ଠୁଏ ପାଣିରେ ୨ କିଲୋମିଟର ପଶି ମେଡିକାଲ ନେଇଛନ୍ତି । ତେବେ ଏହି ସଙ୍କଟ ସମୟରେ ବିପନ୍ନଙ୍କ ପାଇଁ ଦେବଦୂତ ସାଜିଛନ୍ତି ଆୟୁଷ ଡାକ୍ତର ଲକ୍ଷ୍ମୀପ୍ରିୟା ଦାଶ । ତୁଳସୀଡ଼ିଆ ମେଡିକାଲ ବୁଡ଼ିଯିବା ପରେ କୁମ୍ଭୀର ଓ ସାପ ଭୟକୁ ଖାତିର ନକରି ୩ କିଲୋମିଟର ଆଣ୍ଠୁଏ ପାଣିରେ ଚାଲି ଚାଲି ଘର ଘର ବୁଲି ସେବା ଯୋଗାଉଛନ୍ତି ଏହି ମହିଳା ଡାକ୍ତର ।

ସେପଟେ ପ୍ରତିବର୍ଷ ବନ୍ୟା ଆସିଲେ ନଦୀବନ୍ଧ ଭାଙ୍ଗିବା ପାଲଟିଛି ସାଧାରଣ କଥା । ତେବେ ଏଥର ବଡ଼ ନିଷ୍ପତ୍ତି ନେଇଛି ଜଳସମ୍ପଦ ବିଭାଗ । ସର୍ବୋଚ୍ଚ ଯନ୍ତ୍ରୀଙ୍କ ଅନୁସାରେ ଏଥର କୌଣସି ମାନବକୃତ ଘାଇ ହୋଇନାହିଁ, ଜଳର ପ୍ରବଳ ପ୍ରବାହ ଯୋଗୁଁ ବନ୍ଧ ଭାଙ୍ଗିଛି । ଏଣିକି ସାଳନ୍ଦୀ, କାଣୀ ଓ ବିଶେଷ କରି ବୈତରଣୀ ନଦୀବନ୍ଧ ଉପରେ ସରକାର ଅଧିକ ଫୋକସ କରିବେ । ନାବାର୍ଡ ଫଣ୍ଡିଂରେ ସବୁ ଦୁର୍ବଳ ନଦୀବନ୍ଧକୁ ଅଧିକ ଉଚ୍ଚ ଓ ଚଉଡ଼ା କରାଯିବ ।

ନଦୀବନ୍ଧ ଉଚ୍ଚ ଆଉ ଚଉଡ଼ା ହେବ ସତ, ହେଲେ ଏବେ ଜଳବନ୍ଦୀ ଅବସ୍ଥାରେ ଥିବା ଲୋକଙ୍କ ପାଖରେ ସଠିକ୍ ସମୟରେ ରିଲିଫ୍, ପାନୀୟ ଜଳ, ଗୋଖାଦ୍ୟ ଓ ଚିକିତ୍ସା ସେବା ପହଞ୍ଚାଇବା ପ୍ରଶାସନ ପାଇଁ ବଡ଼ ଚ୍ୟାଲେଞ୍ଜ ।