କମିଶନରେଟ ପୋଲିସ କବ୍‌ଜାରେ କୁଖ୍ୟାତ ବନ୍ଧୁକ ମାଫିଆ । ଯାଜପୁର ବିଞ୍ଝାରପୁର ଅଞ୍ଚଳରୁ ଗିରଫ ହେଲେ ବନ୍ଧୁକ ମାଫିଆ । ୬ଟି ବନ୍ଧୁକ, ୧୦ଟି ଜୀବନ୍ତ ଗୁଳି ଜବତ । ବିହାରରୁ ବନ୍ଧୁକ ଆଣି ଓଡ଼ିଶାରେ ଡିଲ୍‌ କରୁଥିଲେ । ସେପଟେ ଭୁବନେଶ୍ୱର ରେଳ ଷ୍ଟେସନରେ ପେଟ୍ରୋଲିଂ ବେଳେ ଧରା ପଡ଼ିଲେ ୬ ଡକାୟତ ।

ଦୁଷ୍କର୍ମ ଅଭିଯୁକ୍ତରୁ ବନ୍ଧୁକ ମାଫିଆ । ବିହାରରୁ ବନ୍ଧୁକ ଆଣି ଭୁବନେଶ୍ୱରରେ କରୁଥିଲା ଡିଲ୍ । ଜମି ପୋଜେସନ ଗ୍ୟାଙ୍ଗକୁ ବିକୁଥିଲା ବିହାରୀ ବନ୍ଧୁକ । ୬ ବିହାରୀ ବନ୍ଧୁକ ସହ ୧୦ ଜୀବନ୍ତ ଗୁଳି ଜବତ । ମନୋଜ କୁମାର ମଲିକ ଓରଫ ପପୁ । ଘର ଯାଜପୁର ବିଂଝାରପୁର ଅଞ୍ଚଳରେ । ତା ନିକଟରୁ ଜବତ ହୋଇଛି ୬ଟି ସେମି ଅଟୋମେଟିକ ପିସ୍ତଲ, ୧୦ ରାଉଣ୍ଡ ଜୀବନ୍ତ ଗୁଳି, ୬ଟି ମ୍ୟାଗାଜିନ୍‌, ଗୋଟିଏ ମୋବାଇଲ ଫୋନ୍‌, ଗୋଟିଏ ବାଇକ ଏବଂ ଟଙ୍କା । ୬ ବର୍ଷ ତଳେ ଦୁଷ୍କର୍ମ ମାମଲାରେ ଗିରଫ ହୋଇ ଜେଲ ଯାଇଥିଲା ମନୋଜ । ଜେଲରୁ ବାହାରିବା ପରେ ଚଳାଇଥିଲା ବନ୍ଧୁକ ରାକେଟ । ବାଇକରେ ବୁଲି ବୁଲି କରୁଥିଲା ବନ୍ଧୁକ ଡିଲ୍‌ । ଗୋଟେ ଗୋଟେ ବନ୍ଧୁକ ୨୦ ହଜାର ଟଙ୍କାରେ ବିକ୍ରି କରୁଥିବା ତଦନ୍ତରୁ ଜାଣିବାକୁ ପାଇଛି ପୋଲିସ ।

ସେପଟେ ଭୁବନେଶ୍ୱର ରେଳ ଷ୍ଟେସନରେ ପେଟ୍ରୋଲିଂ ବେଳେ ଗତକାଲି ସଂନ୍ଧ୍ୟାରେ ଧରା ପଡ଼ିଛନ୍ତି ଡକାୟତ I ୬ ଡକାୟତ ରେଳ ଷ୍ଟେସନରେ ପଶି ଟ୍ରେନ ଭିତରୁ ଡାକୟତି ପାଇଁ ଯୋଜନା କରୁଥିଲେ I ଟ୍ରେନରେ ପଶି ଯାତ୍ରୀଙ୍କୁ ଲୁଟିବା ପାଇଁ ଯୋଜନା କରୁଥିଲେ ଏହି ଅଭିଯୁକ୍ତ I ଅଭିଯୁକ୍ତଙ୍କୁ ଧରିବାକୁ ଯିବା ସମୟରେ, ଗୁଳି ଫୁଟାଇ ଖସି ଯିବାକୁ ଉଦ୍ୟମ କରିଥିଲେ ଏହି ଡକାୟତମାନେ । ଏ ସମସ୍ତ ଅଭିଯୁକ୍ତ ହେଉଛନ୍ତି ବାଲିପାଟଣା, ବଡ଼ଗଡ଼ ଓ ଖାରବେଳନଗର ଅଞ୍ଚଳର I ସେମାନଙ୍କ ନିକଟରୁ ବନ୍ଧୁକ, ଗୁଳି, ଛୁରୀ, ଚାପଡ଼ ଓ ଲଙ୍କାଗୁଣ୍ଡ ଜବତ ହୋଇଛି I ୩ଟି ଟିମ୍ ଗଠନ କରାଯାଇ ଭଦ୍ରକ ଓ ବାଲେଶ୍ଵର ରୁଟରେ ରେଡ୍‌ ଚାଲିଛି I

ବନ୍ଧୁକ ବେପାରୀ ମନୋଜ ମଲିକ କାହାକୁ କାହାକୁ ବନ୍ଧୁକ ବିକ୍ରି କରିଛି ? ମନୋଜ ଲିଙ୍କରେ ଆଉ କେଉଁ ବନ୍ଧୁକ ବେପାରୀମାନେ ଅଛନ୍ତି ? ଓଡ଼ିଶାରେ କେତୋଟି ବିହାରୀ ବନ୍ଧୁକ ବିକ୍ରି କରିଛି ମନୋଜ ସେ ବିଷୟରେ ଜାଣିବା ପାଇଁ ମନୋଜକୁ ରିମାଣ୍ଡରେ ଆଣି ଖୋଳତାଡ କରିପାରେ ସ୍ପେଶାଲ କ୍ରାଇମ୍‌ ୟୁନିଟ ।