ଭୁବନେଶ୍ବର,୨୩/୦୫: ସାରା ରାଜ୍ୟରେ ନିଆଁ ବର୍ଷା, ଗ୍ରୀଷ୍ମର ଜ୍ବାଳାରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ଆସନ୍ତା ୨୪ ଘଣ୍ଟା ପାଇଁ 12ଟି ଜିଲ୍ଲାରେ ହିଟୱେଭ୍ ଓ୍ବାର୍ଣ୍ଣି ଜାରି ହୋଇଥିବା ବେଳେ ସମ୍ବଲପୁର, ଝାରସୁଗୁଡା, ନୟାଗଡ ଓ ବଲାଙ୍ଗୀରରେ ଅରେଞ୍ଜ ଓ ଭଦ୍ରକ ଯାଜପୁର, କେନ୍ଦ୍ରାପଡା, ଅନୁଗୋଳ,ବୌଦ୍ଧ, ସୋନପୁର, ବରଗଡ଼ ଓ ସୁନ୍ଦରଗଡକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । 24ଟି ଜିଲ୍ଲାରେ ଉଷ୍ମ ଆର୍ଦ୍ର ସ୍ଥିତି ପାଇଁ ୟେଲୋ ୱାର୍ଣ୍ଣିଂ ସହ ଉପକୂଳ ଓ ଆଭ୍ୟନ୍ତରୀଣ ୧୬ଟି ଜିଲ୍ଲାକୁ ବିଜୁଳି, ଘଡଘଡି, ସହ ବର୍ଷା ଓ 30ରୁ 50 କି.ମି ଝଟକା ପବନର ସମ୍ଭାବନାକୁ ନେଇ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ସମ୍ବଲପୁର ଓ ବଲାଙ୍ଗୀରକୁ ଉଷ୍ମ ରାତ୍ରି ପାଇଁ ଚେତାବନୀ ରହିଛି ।


ରାଜ୍ୟରେ ଆସନ୍ତା 5 ଦିନ ଅର୍ଥାତ 25 ତାରିଖ ଯାଏଁ ଏଭଳି ଗ୍ରୀଷ୍ମ ପ୍ରବାହ ସ୍ଥିତି ସହ 7 ଦିନ ଯାଏଁ କାଳବୈଶାଖୀର ଚେତାବନୀ ଦେଇଛି ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର । ଗତ 24ଘଣ୍ଟାରେ ୧୨ଟି ସ୍ଥାନରେ ୪୦ ଡିଗ୍ରୀ ଉପରେ ତାପମାତ୍ରା ରେକର୍ଡ ହୋଇଥିବା ବେଳେ ସର୍ବାଧିକ ଝାରସୁଗୁଡ଼ାରେ ୪୫.୨ ଡିଗ୍ରୀ ରେକର୍ଡ କରାଯାଇଛି ।

ପଢନ୍ତୁ ଏହି ଖବର: ତାତିରୁ ତ୍ରାହି ନାହିଁ: ଆଜିଠୁ ଆହୁରି ବଢ଼ିବ ତାତି, ଆଗାମୀ ୫ ଦିନ ଯାଏଁ ହିଟ୍‌ୱେଭ ଆଲର୍ଟ ଜାରି

ଏପଟେ ଆଇଏମ୍‌ଡିର ବିସ୍ତାରିତ ପରିସର ଆକଳନ ଅନୁଯାୟୀ, ଆସନ୍ତା 28 ଓ 29 ତାରିଖ ବେଳକୁ ପୂର୍ବ କେନ୍ଦ୍ରୀୟ ବଙ୍ଗୋପସାଗର ଅଞ୍ଚଳରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି । ପରେ ଉତ୍ତର-ପଶ୍ଚିମ ଦିଗରେ ଗତି କରିବାର ସମ୍ଭାବନା ରହିଥିବା ସମ୍ଭାବନା ଦେଇଛି ପାଣିପାଗ ବିଭାଗ । ଓଡ଼ିଶା ଉପକୂଳକୁ ଏହା କେତେ ପ୍ରଭାବିତ କରିବ ? ସେନେଇ ବର୍ତ୍ତମାନ ଯାଏଁ ସ୍ପଷ୍ଟ ହୋଇନଥିବା ବେଳେ ଏହା ପ୍ରଭାବରେ କେରଳ ଓ ଓଡ଼ିଶା ମୌସୁମୀ ଛୁଇଁବା ପାଇଁ ସ୍ଥିତି ଅନୁକୂଳ ହେବ ବୋଲି ଆକଳନ କରାଯାଉଛି । ଏହି ଲଘୁଚାପଟି ଯଦି ସକ୍ରିୟ ହୁଏ, ତେବେ ଲଘୁଚାପ ଜନିତ ବର୍ଷା ପ୍ରଭାବରେ ମାସ ଶେଷ ଆଡ଼କୁ ଅସହ୍ୟ, ଗୁଳୁଗୁଳି ଓ ତାତିରୁ ଆଶ୍ବସ୍ତି ମିଳିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ।

ସାରାରାଜ୍ୟରେ ଆକାଶରୁ ନିଆଁ ବର୍ଷା ଭିତରେ ଯନ୍ତ୍ରଣା ବଢ଼ାଇ ଦେଇଛି ଅଘୋଷିତ ବିଦ୍ୟୁତ କାଟ । ପ୍ରଚଣ୍ଡ ତାତିରେ ଛଟପଟ ହେଉଥିବା ଲୋକେ ଧର୍ଯ୍ୟହରା ହେଲେଣି । ବଲାଙ୍ଗୀରରୁ ଭୁବନେଶ୍ୱର, କଟକରୁ ଗଞ୍ଜାମ, ସବୁଠି ସମାନ ସ୍ଥିତି । କେଉଁଠି ଘଣ୍ଟା ଘଣ୍ଟା ଲାଇନ୍ କଟୁଛି ତ କେଉଁଠି ଓଭରଲୋଡ୍ ଯୋଗୁଁ ହୁତୁହୁତୁ ହୋଇ ଜଳୁଛି ଟ୍ରାନ୍ସଫର୍ମର । ଏଭଳି ସ୍ଥିତିରେ ଉଗ୍ର ହେବାରେ ଲାଗିଛି ଅସନ୍ତୋଷ । ବିଜୁଳି ସମସ୍ୟାକୁ ନେଇ କ୍ଷୋଭ ପ୍ରକାଶ କରିଛନ୍ତି ଖୋଦ୍ ଉପମୁଖ୍ୟମନ୍ତ୍ରୀ । କହିଛନ୍ତି ପିକ୍ ଆୱାରରେ ଓଭରଲୋଡ୍ ଯୋଗୁଁ ହେଉଛି ପାୱାର କଟ୍ । ଆଶ୍ବାସନା ଦେଇଛନ୍ତି, ଯେତେ ଶୀଘ୍ର ସମ୍ଭବ ସମାଧାନ ପାଇଁ ଯୁଦ୍ଧକାଳୀନ ଭିତ୍ତିରେ ଚାଲିଛି କାର୍ଯ୍ୟ