ଓଡ଼ିଶା କ୍ୟାଡ଼ର ଦୁଇ ଆଇପିଏସଙ୍କୁ କେନ୍ଦ୍ରରେ ମିଳିପାରେ ବଡ଼ ଦାୟିତ୍ବ । ଆପଏଣ୍ଟମେଣ୍ଟସ୍ କମିଟି ଅଫ୍ ଦ କ୍ୟାବିନେଟ୍ ପକ୍ଷରୁ ୩୩ ଜଣିଆ ଏମ୍ପାନେଲ୍ ତାଲିକାରେ ରାଜ୍ୟର ଦୁଇ ବରିଷ୍ଠ ଆଇପିଏସ ସୁଧାଂଶୁ ଷଡ଼ଙ୍ଗୀ ଓ ପିଏସ ରଣପିସେ । ଏମାନେ କେନ୍ଦ୍ର ସରକାରଙ୍କ ଅଧୀନରେ ଡିଜି ସ୍ତରୀୟ ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତି ପାଇବାକୁ ଯୋଗ୍ୟ ବିବେଚିତ ହେବେ । ସେପଟେ ରାଜ୍ୟରେ ପରବର୍ତ୍ତୀ ପୋଲିସ ଡିଜି କିଏ ଚାଲିଛି କସରତ । ରେସରେ ଚାରି ବରିଷ୍ଠ ଆଇପିଏସ୍ । ତେବେ ଡକ୍ଟର ସୁଧାଂଶୁ ଷଡ଼ଙ୍ଗୀ ରେସରେ ଆଗୁଆ ଥିବା ବେଳେ ତାଙ୍କ ନାଁ କେନ୍ଦ୍ର ଏମ୍ପାନେଲ୍ ତାଲିକାରେ ବି ରହିଛି ।

କେନ୍ଦ୍ର ସରକାରଙ୍କ ଉଚ୍ଚସ୍ତରୀୟ ନିଯୁକ୍ତି କମିଟି ‘ଆପଏଣ୍ଟମେଣ୍ଟସ୍ କମିଟି ଅଫ୍ ଦ କ୍ୟାବିନେଟ୍’ ଦେଶର ୩୩ ଜଣ ବରିଷ୍ଠ ଭାରତୀୟ ପୋଲିସ ସେବା ଅଧିକାରୀଙ୍କୁ ଡାଇରେକ୍ଟର ଜେନେରାଲ୍ ଓ ଡିଜି ସମକକ୍ଷ ପଦବୀ ପାଇଁ ଏମ୍ପାନେଲ୍ କରିଛନ୍ତି । ଏହି ତାଲିକାରେ ଅଛନ୍ତି ଓଡ଼ିଶା କ୍ୟାଡରର ଦୁଇ ଜଣ ବରିଷ୍ଠ ଅଧିକାରୀ । ଏମ୍ପାନେଲ୍ ହୋଇଥିବା ଓଡ଼ିଶା କ୍ୟାଡର ଅଧିକାରୀ ହେଲେ ୧୯୯୦ ବ୍ୟାଚ୍‌ର ଡକ୍ଟର ସୁଧାଂଶୁ ଷଡ଼ଙ୍ଗୀ ଓ ୧୯୯୫ ବ୍ୟାଚ୍‌ର ପିଏସ୍. ରଣପିସେ । ଏହି ଏମ୍ପାନେଲମେଣ୍ଟ ପରେ ଉଭୟ ଅଧିକାରୀ କେନ୍ଦ୍ର ସରକାରଙ୍କ ଅଧୀନରେ ଡିଜି ସ୍ତରୀୟ ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତି ପାଇବାକୁ ଯୋଗ୍ୟ ବିବେଚିତ ହେବେ । ଏହି ଅଧିକାରୀମାନେ ସିଆରପିଏଫ୍, ବିଏସଏଫ୍, ସିଆଇଏସଏଫ୍, ଆଇଟିବିପି ସମେତ ବିଭିନ୍ନ କେନ୍ଦ୍ରୀୟ ସୁରକ୍ଷା ଓ ଗୁଇନ୍ଦା ସଂସ୍ଥାରେ ଉଚ୍ଚପଦବୀରେ କାର୍ଯ୍ୟ କରିବାର ସୁଯୋଗ ପାଇବେ ।

ସେପଟେ ରାଜ୍ୟ ପୋଲିସର ପରବର୍ତ୍ତୀ ମଙ୍ଗୁଆଳ ପାଇଁ ଆରମ୍ଭ ହୋଇଯାଇଛି ପ୍ରକ୍ରିୟା । ସୁପ୍ରିମକୋର୍ଟଙ୍କ ନିର୍ଦ୍ଦେଶାବଳୀ ଅନୁଯାୟୀ, ବର୍ତ୍ତମାନର ଡିଜିପିଙ୍କ କାର୍ଯ୍ୟକାଳ ସରିବା ପୂର୍ବରୁ ହିଁ ନୂଆ ଡିଜିପି ଚୟନ ପାଇଁ ରାଜ୍ୟ ସରକାରଙ୍କ ପକ୍ଷରୁ ୟୁପିଏସସିକୁ ସମ୍ଭାବ୍ୟ ଅଫିସରଙ୍କ ତାଲିକା ପଠାଇବାକୁ ପଡ଼ିଥାଏ । ଏହି ସର୍ବୋଚ୍ଚ ପଦବୀର ଦୌଡ଼ରେ ୪ ଜଣ ବରିଷ୍ଠ ଅଫିସରଙ୍କ ନାଁ ଆଗରେ ରହିଛି ।

୧୯୯୦ ବ୍ୟାଚର ଆଇପିଏସ ସୁଧାଂଶୁ ଷଡ଼ଙ୍ଗୀ, ୧୯୯୩ ବ୍ୟାଚର ସୁଶାନ୍ତ କୁମାର ନାଥ, ୧୯୯୩ ବ୍ୟାଚ ଆର. ପି. କୋଚେ, ୧୯୯୪ ବ୍ୟାଚ ସଂଜୀବ ପଣ୍ଡା । ବର୍ତ୍ତମାନ ସୁଧାଂଶୁ ଷଡ଼ଙ୍ଗୀ ଅଗ୍ନିଶମ ଓ ଗୃହରକ୍ଷୀ ଡିଜି ଭାବେ କାର୍ଯ୍ୟ କରୁଛନ୍ତି । ପୂର୍ବରୁ ସେ ଟ୍ୱିନ୍ ସିଟିର ପୋଲିସ କମିଶନର ଭାବେ କାର୍ଯ୍ୟ କରିଥିଲେ । ସେହିପରି ସୁଶାନ୍ତ କୁମାର ନାଥ ବର୍ତ୍ତମାନ ଜେଲ ଡିଜି ଭାବେ କାର୍ଯ୍ୟ କରୁଛନ୍ତି । ଏହାସହ OPRBର ଅତିରିକ୍ତ ଦାୟିତ୍ବରେ ଅଛନ୍ତି । ଆର. ପି. କୋଚେ ବର୍ତ୍ତମାନ ଗୁଇନ୍ଦା ନିର୍ଦ୍ଦେଶକ ଅଛନ୍ତି ।

ସେହିପରି ସଂଜୀବ ପଣ୍ଡା ଏବେ ଆଣ୍ଟିନକ୍ସଲ ଏଡିଜି ଭାବେ କାର୍ଯ୍ୟ କରୁଛନ୍ତି । ପୂର୍ବରୁ ୧୧ ବରିଷ୍ଠ ଆଇପିଏସଙ୍କ ନାଁ ରାଜ୍ୟ ସରକାର କେନ୍ଦ୍ରକୁ ପଠାଇଥିଲେ । ବର୍ତ୍ତମାନର ଡିଜିପିଙ୍କ କାର୍ଯ୍ୟକାଳ ଆସନ୍ତା ଅଗଷ୍ଟ ୩୧ରେ ସରିବା ପୂର୍ବରୁ ପୂର୍ବରୁ ୟୁପିଏସସି ବୈଠକ ବସିବ ଏବଂ ସେଠାରୁ ୩ ଜଣିଆ ପ୍ୟାନେଲ୍ ଆସିବା ପରେ ରାଜ୍ୟ ସରକାର ଫାଇନାଲ୍ ମୋହର ମାରିବେ। ତେବେ ଏହାପୂର୍ବରୁ ଡକ୍ଟର ସୁଧାଂଶୁ ଷଡ଼ଙ୍ଗୀ ଓ ପିଏସ ରଣପିସେ କନ୍ଦ୍ରୀୟ ତାଲିକାରେ ସ୍ଥାନ ପାଇବା ନିଶ୍ଚୟ ରାଜ୍ୟ ସରକାରଙ୍କ ନିଷ୍ପତ୍ତିକୁ ପ୍ରଭାବିତ କରିବ ।