କଟକରୁ ନକଲି LPG ଗ୍ୟାସ୍‌ କାରବାର ମାମଲାର ପର୍ଦ୍ଦାଫାସ କରିଛି କମିସନରେଟ ପୋଲିସ । LPG ଗ୍ୟାସ୍‌ ସିଲିଣ୍ଡରରେ ପାଣି ଭର୍ତ୍ତି କରି ତାକୁ ସିଲ୍‌ କରି ବେଆଇନ ଭାବେ ଲୋକଙ୍କୁ ବିକ୍ରି କରିବା ମାମଲାରେ ଜଣେ ଗ୍ୟାସ୍‌ ଡେଲିଭରୀ କର୍ମଚାରୀକୁ ଗିରଫ କରିଛି କଟକ ବିଡାନାସୀ ଥାନା ପୋଲିସ । ଗିରଫ ଗ୍ୟାସ୍‌ ଡେଲିଭରୀ କର୍ମଚାରୀ ଜଣକ ହେଲେ ଧ୍ରୁବ ଚରଣ ବେହେରା ।

ସେ ନିଜ ଘରେ ଅସୁରକ୍ଷିତ ଢଙ୍ଗରେ ବେଆଇନ ଭାବେ LPG ଖାଲି ଗ୍ୟାସ୍‌ ସିଲିଣ୍ଡରରେ ପାଣି ଭର୍ତ୍ତି କରି ତାକୁ ଲୋକଙ୍କୁ ବିକ୍ରୀ କରୁଥିଲା ଗିରଫ ଅଭିଯୁକ୍ତ । ଏହା ସହିତ କଳିଙ୍ଗ ଗ୍ୟାସ ଏଜେନ୍ସୀ ନାଁରେ ଲୋକଙ୍କୁ ରସିଦ ମଧ୍ୟ ଦେଉଥିଲା ଅଭିଯୁକ୍ତ । ବିଶ୍ୱସ୍ତ ସୂତ୍ରରୁ ଖବର ପାଇ ବିଡାନାସୀ ଥାନା ପୋଲିସ ଚଢାଉ କରି ଏହି ନକଲି LPG ଗ୍ୟାସ କାରବାରର ପର୍ଦ୍ଦାଫାସ କରିଛି ।

ଅଭିଯୁକ୍ତ ନିକଟରୁ ଗୋଟିଏ ଲୁନା, ୧୦ଟି ସିଲିଣ୍ଡର, ନଗଦ ୨୩ ହଜାର ଟଙ୍କା, ୩୫ଟି କ୍ୟାସ ମେମୋ ସହ ଅନେକ ଉପକରଣ ଜବତ କରିଛି ପୋଲିସ । ଗିରଫ ଅଭିଯୁକ୍ତ ଜଣକ ଗୋଟିଏ ଗ୍ୟାସ୍‌ ଏଜେନ୍ସିରେ ଗ୍ୟାସ୍‌ ଡେଲିଭରୀ କର୍ମଚାରୀ ଭାବେ କାର୍ଯ୍ୟ କରୁଥିଲା । ଏହି ବେଆଇନ କାରବାରରେ ଯେଉଁମାନଙ୍କ ସଂପୃକ୍ତି ଥିବ ସେମାନଙ୍କୁ ମଧ୍ୟ ତଦନ୍ତ ପରିସଭୁକ୍ତ କରାଯିବ। ଆବଶ୍ୟକ ପଡ଼ିଲେ ଅଭିଯୁକ୍ତକୁ ରିମାଣ୍ଡରେ ଅଣାଯିବ ବୋଲି କହିଛନ୍ତି ଜୋନ୍‌ ୩ ଏସିପି ।
ପଢନ୍ତୁ ଏହି ଖବର: ଗ୍ୟାସ୍ ସିଲିଣ୍ଡର ପାଇଁ ଘର ଛାଡିଲେ ସ୍ତ୍ରୀ ! ୫ ମାସର ଶିଶୁ ସହ ନିଖୋଜ