SEBC Reservation / ୱାର୍ଡ ପୁନର୍ଗଠନ ଓ ଆସନ ସଂରକ୍ଷଣ ସମୟ ସୀମାରେ ସଂଶୋଧନ କଲେ ସରକାର

ଭୁବନେଶ୍ଵର: ରାଜ୍ୟ ପୌର ରାଜନୀତିରେ ଆସିବାକୁ ଯାଉଛି କି ବଡ଼ ପରିବର୍ତ୍ତନ ? ଏଥର ପୌର ନିର୍ବାଚନରେ ପଛୁଆ ବର୍ଗ ବା SEBCଙ୍କୁ ମିଳିବ କି ସଂରକ୍ଷଣ ? ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ରଙ୍କ ବୟାନ ପରେ ଏବେ ସାରା ରାଜ୍ୟରେ ଚର୍ଚ୍ଚା ଜୋର୍ ଧରିଛି । ସେପଟେ ପୌର ନିର୍ବାଚନ ପାଇଁ ୱାର୍ଡ ପୁନର୍ଗଠନ ଓ ଆସନ ସଂରକ୍ଷଣ ସମୟସୀମାରେ ସଂଶୋଧନ କରିଛନ୍ତି ରାଜ୍ୟ ସରକାର ।

ଡିସେମ୍ବର ୧୦ ସୁଦ୍ଧା ଡ୍ରାଫ୍ଟ ବିଜ୍ଞପ୍ତି ପ୍ରକାଶ କରିବାକୁ ସମସ୍ତ ଜିଲ୍ଲାପାଳଙ୍କୁ ନଗର ଉନ୍ନୟନ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି । ଜଷ୍ଟିସ ପ୍ରମଥ ପଟ୍ଟନାୟକଙ୍କ ଅଧ୍ୟକ୍ଷତାରେ ଗଠିତ SEBC କମିଶନଙ୍କ ଅଧ୍ୟୟନ ଜାରି ରହିଥିବା ବେଳେ ରାଜନୀତିରେ ପଛୁଆ ବର୍ଗଙ୍କୁ ମିଳିବ କି ନୂଆ ସୁଯୋଗ ?

ରାଜନୀତିରେ ପଛୁଆ ବର୍ଗଙ୍କୁ ମିଳିବ ନୂଆ ସୁଯୋଗ । ଏଣିକି ପୌର ନିର୍ବାଚନରେ SEBC ବର୍ଗ ପାଇଁ ସଂରକ୍ଷଣ ଲାଗୁ କରି ପାରନ୍ତି ରାଜ୍ୟ ସରକାର । ନଗର ଉନ୍ନୟନ ବିଭାଗ ପକ୍ଷରୁ ସମସ୍ତ ଜିଲ୍ଲାପାଳଙ୍କୁ ଚିଠି ଲେଖି ମ୍ୟୁନିସିପାଲିଟି ଓ ଏନଏସିଗୁଡ଼ିକରେ ୱାର୍ଡ ସୀମା ନିର୍ଦ୍ଧାରଣ ଏବଂ ଆସନ ସଂରକ୍ଷଣ ପ୍ରକ୍ରିୟା ନିର୍ଦ୍ଧାରିତ ସମୟ ମଧ୍ୟରେ ଶେଷ କରିବାକୁ ନିର୍ଦେଶ ଦିଆଯାଇଛି ।

ଏଥିସହ ପଢ଼ନ୍ତୁ: ସରକାରୀ ନିୟମ ନ ମାନି ଫୁଟାଉଥିଲେ ବାଣ; ନୟାସଡ଼କ ଅଞ୍ଚଳରୁ ୪ଜଣ ଗିରଫ 

ଜିଲ୍ଲାପାଳମାନଙ୍କୁ ନଗର ଉନ୍ନୟନ ବିଭାଗର ଚିଠି

• ଡିସେମ୍ବର ୧୦ ସୁଦ୍ଧା ଜିଲ୍ଲାପାଳମାନେ ୱାର୍ଡ ପୁନର୍ଗଠନ ଓ ଆସନ ସଂରକ୍ଷଣ ଡ୍ରାଫ୍ଟ ବିଜ୍ଞପ୍ତି ପ୍ରକାଶ କରିବେ
  
• ଡିସେମ୍ବର ୧୯ ସୁଦ୍ଧା ଆପତ୍ତି ଗ୍ରହଣ କରାଯିବ ଓ ୨୪ ସୁଦ୍ଧା ଅସ୍ଥାୟୀ ବିଜ୍ଞପ୍ତି ପ୍ରକାଶ ପାଇବ
  
• ଡିସେମ୍ବର ୨୪ ରୁ ୨୦୨୭ ଜାନୁଆରୀ ୭ ମଧ୍ୟରେ ଏହା ବିରୋଧରେ ଆବେଦନ କରି ପାରିବେ

ରାଜ୍ୟରେ ଅବହେଳିତ ଅବସ୍ଥାରେ ଥିଲେ ପଛୁଆ ବର୍ଗ । ଏଥିପାଇଁ ରାଜ୍ୟ ସରକାର ୨୦୨୬ ଅକ୍ଟୋବର ୭ରେ ଅବସରପ୍ରାପ୍ତ ହାଇକୋର୍ଟ ବିଚାରପତି ଜଷ୍ଟିସ୍ ପ୍ରମଥ ପଟ୍ଟନାୟକଙ୍କ ଅଧ୍ୟକ୍ଷତାରେ ନୂଆ କମିଶନ ଗଠନ କରିଥିଲେ ।

ଏହି କମିଶନ ଗ୍ରାମାଞ୍ଚଳ ଓ ସହରାଞ୍ଚଳରେ SEBCଙ୍କ ସଂଖ୍ୟା, ରାଜନୈତିକ ପ୍ରତିନିଧିତ୍ୱ ଓ ପଛୁଆପଣ ଅଧ୍ୟୟନ କରିବ । ପୂର୍ବରୁ ମେଡିକାଲ ଓ ଇଞ୍ଜିନିୟରିଂ ଶିକ୍ଷାରେ ୧୧.୨୫ % ସଂରକ୍ଷଣ ଲାଗୁ ହୋଇଥିବା ବେଳେ ପୌର ନିର୍ବାଚନରେ ଲାଗୁ ହେଲେ ରାଜନୀତିରେ ପଛୁଆ ବର୍ଗଙ୍କୁ ନୂଆ ସୁଯୋଗ ମିଳିବ ।

ଗୋଟିଏ ପଟେ ପଞ୍ଚାୟତ ଓ ପୌର ନିର୍ବାଚନ ସଠିକ୍ ସମୟରେ ସାରିବାକୁ ରାଜ୍ୟ ନିର୍ବାଚନ କମିଶନ ଅଣ୍ଟା ଭିଡ଼ିଥିବା ବେଳେ କମ ସମୟ ଅବଧି ଭିତରେ ସଂରକ୍ଷଣ ଲାଗୁ କରି ନିର୍ବାଚନ କରିବା ସରକାର ପାଇଁ ବଡ଼ ଆହ୍ଵାନ ହେବ ବୋଲି ଆଶଙ୍କା କରାଯାଉଛି ।