IPS Officer Attacked / ସରକାରୀ ନିୟମ ନ ମାନି ଫୁଟାଉଥିଲେ ବାଣ; ନୟାସଡ଼କ ଅଞ୍ଚଳରୁ ୪ଜଣ ଗିରଫ

କଟକ: ଦୀପାବଳି ରାତିରେ ବାଣ ଫୁଟାଇବାକୁ ନେଇ ହଙ୍ଗାମା । କଟକ ନୟାସଡ଼କ ଅଞ୍ଚଳରେ ପୋଲିସ ସହ ସ୍ଥାନୀୟ ଯୁବକଙ୍କ ଧସ୍ତାଧସ୍ତି । ସ୍ଥିତି ଏମିତି ହେଲା କି ମହିଳା IPS ଅଧିକାରୀଙ୍କୁ ବି ଛାଡ଼ିଲେନି ଅଭିଯୁକ୍ତ । କଟକ ACP ଅନନ୍ୟା ଅୱସ୍ତି ବାଣ ଫୁଟାଇବାକୁ ବାରଣ କରିବାରୁ ତାଙ୍କୁ ବି ଗାଳିଗୁଲଜ କରିବା ସହ ତାଙ୍କ ସହ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା । ଏହି ଘଟଣାରେ ଲାଲବାଗ ଥାନା ପୋଲିସ ମାମଲାରେ ୪ ଜଣଙ୍କୁ ଗିରଫ କରିଛି ।

• ସରକାରୀ କଟକଣାକୁ ମାନିଲେ ନାହିଁ

ରାତି ୯ଟା ପରେ ବି ଫୁଟାଇଲେ ବାଣ । ପୋଲିସ ବାରଣ କରିବାରୁ ହେଲା ଉତ୍ତେଜନା । ବାଣଫୁଟାକୁ ନେଇ କଟକ ନୟାସଡ଼କ ଅଞ୍ଚଳରେ ACP ଅନନ୍ୟା ଅୱସ୍ତି ବାରଣ କରିଥିଲେ । ମାତ୍ର ବାରଣ ସତ୍ତ୍ବେ ଯୁବକମାନେ ମାନିନଥିଲେ ଏବଂ ଜୋରଜବଦସ୍ତି ରାସ୍ତା ଉପରେ ବାଣ ଫୁଟାଇଥିଲେ । ଏହାପରେ ଅମାନିଆମାନଙ୍କୁ ଅଟକାଇଥିଲା ପୋଲିସ । ହେଲେ ପୋଲିସକୁ ଖାତିର କରି ନଥିଲେ ଯୁବକମାନେ । ଏହାପରେ ସେଠାରେ ଉପସ୍ଥିତ ଥିବା ପୋଲିସ ଟିମ ଓ ACPଙ୍କ ସହ ସ୍ଥାନୀୟ ଲୋକଙ୍କ ଯୁକ୍ତିତର୍କ ଓ ଧସ୍ତାଧସ୍ତି ପରିସ୍ଥିତି ଉପୁଜିଥିଲା ।

• ୪ଜଣଙ୍କୁ ଗିରଫ କଲା ପୋଲିସ

ଘଟଣାସ୍ଥଳରେ ଉତ୍ତେଜନା ମଧ୍ୟ ଦେଖାଯାଇଥିଲା । ପରେ ୧୦ ଜଣ ଯୁବକଙ୍କୁ ପୋଲିସ ଅଟକ ରଖିଥିଲା ସେମାନଙ୍କ ମଧ୍ୟରୁ ଚାରି ଜଣଙ୍କୁ ଗିରଫ କରାଯାଇଛି । ଘଟଣାରେ ଅନ୍ୟମାନଙ୍କର ସମ୍ପୃକ୍ତି ଅଛି କି ନାହିଁ ସେନେଇ ସିସିଟିଭି ଓ ଭିଡିଓକୁ ତର୍ଜମା କରାଯାଉଛି । ଦୀପାବଳିରେ ଘଟିଥିବା ଏ ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି ମାରୱାଡି ସମାଜ ସଭାପତି । ସେ କହିଛନ୍ତି, "କଟକ ସହର ଭାଇଚାରା ସହର । କିଛି ଅସାମାଜିକ ଯୁବକ ବାଣ ଫୁଟାଇବା ନିୟମକୁ ନମାନି ଏପରି କରିଛନ୍ତି । ଏପରି ହେବା ଦୁଃଖଦ ଘଟଣା ।"

ପଢନ୍ତୁ ଏହି ଖବର: ଦୀପାବଳିରେ ହାଇ ଆଲର୍ଟରେ ପୋଲିସ, ବାଣ ବିକ୍ରି ଓ ଫୁଟାଇବା ଉପରେ କଟକଣା

ଏଠାରେ କହିରଖୁଛୁ କି, ସୁରକ୍ଷିତ ଦୀପାବଳି ଓ ପରିବେଶ ସୁରକ୍ଷାକୁ ଦୃଷ୍ଟିରେ ରଖି ଏଥର ଦୀପାବଳିରେ ବାଣ ଫୁଟାଇବା ପରେ ସଂଧ୍ୟା ୭ଟାରୁ ରାତି ୯ଟା ଯାଏ କଟକଣା ଥିଲା । ଏପରିକି ଅଧିକ ଶବ୍ଦ କରୁଥିବା ବାଣ ମଧ୍ୟ ନ ଫୁଟାଇବା ଲାଗି ଲୋକଙ୍କୁ ସତର୍କ କରାଯାଇଥିଲା । ନିୟମ ନ ମାନିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ମଧ୍ୟ ସରକାର ଆଗୁଆ ଚେତାବନୀ ଦେଇଥିଲେ । ତଥାପି ସରକାରୀ କଟକଣାକୁ ଫୁ କରି ଅଭିଯୁକ୍ତମାନେ ବାଣ ଫୁଟାଇଥିଲେ ।