Odisha Civil Services / ଓଡ଼ିଶା ପ୍ରଶାସନିକ ସେବା ପରୀକ୍ଷାକୁ ନେଇ କ୍ୟାବିନେଟ୍‌ର ବଡ଼ ନିଷ୍ପତ୍ତି; ପ୍ରୟାସ ସଂଖ୍ୟା ସୀମା ଉଚ୍ଛେଦ

ଭୁବନେଶ୍ଵର: ପ୍ରତିଯୋଗୀ ପରୀକ୍ଷାର୍ଥୀ ଓ ଆଶାୟୀ ଯୁବକଯୁବତୀଙ୍କ ପାଇଁ ବଡ଼ ଖବର । ଓଡ଼ିଶା ସିଭିଲ ସର୍ଭିସେସ୍ ନିୟମାବଳୀ, ୧୯୯୧ରେ ସଂଶୋଧନ ପାଇଁ ପ୍ରସ୍ତାବକୁ ମଞ୍ଜୁରୀ ଦେଇଛି ରାଜ୍ୟ କ୍ୟାବିନେଟ୍ । ଏ ସମ୍ପର୍କିତ ପ୍ରୟାସ ସଂଖ୍ୟା ସୀମାକୁ ଉଚ୍ଛେଦ କରାଯାଇଛି । OCS ପରୀକ୍ଷାରେ ଅଂଶଗ୍ରହଣ କରିବା ପାଇଁ ସୀମାକୁ ସମ୍ପୂର୍ଣ୍ଣ ଉଚ୍ଛେଦ କରାଯାଇଛି ।

ପୂର୍ବରୁ ଥିବା ପ୍ରୟାସ ସଂଖ୍ୟାର ସମସ୍ତ ସୀମାକୁ ଉଚ୍ଛେଦ ନେଇ କ୍ୟାବିନେଟ୍ ଅନୁମୋଦନ କରିଛି । ନିର୍ଦ୍ଧାରିତ ବୟସ ଓ ଅନ୍ୟାନ୍ୟ ଯୋଗ୍ୟତା ସର୍ତ୍ତ ପୂରଣ କରୁଥିଲେ ପ୍ରୟାସ ସଂଖ୍ୟାର ସୀମା ରହିବନି । ପୂର୍ବରୁ ଥିବା ପ୍ରୟାସ ସଂଖ୍ୟାର ସମସ୍ତ ସୀମାକୁ ହଟାଇ ଦିଆଯାଇଛି । ସରକାରଙ୍କ ଏହି ପଦକ୍ଷେପ ଦ୍ୱାରା ଯୋଗ୍ୟତା ଓ ମେଧା ଭିତ୍ତିକ ଚୟନ ପାଇଁ ପ୍ରାର୍ଥୀଙ୍କୁ ଅଧିକ ସୁଯୋଗ ମିଳିବ ।

ରାଜ୍ୟ କ୍ୟାବିନେଟ୍‌ରେ ‘ଇନ୍-ଷ୍ଟ୍ରିମ୍ ଷ୍ଟୋରେଜ୍ ଷ୍ଟ୍ରକଚର୍’ ଅଧୀନରେ କୁରସୁଦ ପ୍ରକଳ୍ପକୁ ମଞ୍ଜୁରୀ ମିଳିଛି । ରାଜ୍ୟରେ ଜଳ ସୁରକ୍ଷା, ଭୂତଳ ଜଳ ପୁନଃଭରଣ ଏବଂ ଜଳର ସ୍ଥାୟୀ ବ୍ୟବହାର ବୃଦ୍ଧି ଲକ୍ଷ୍ୟ ରଖା ଯାଇଛି । ଏହି ପ୍ରକଳ୍ପର ଅନୁମୋଦିତ ମୂଲ୍ୟ ୮୧.୩୭ କୋଟି ଟଙ୍କା । କାର୍ଯ୍ୟକାରିତା ଅବଧି ୩୦ ମାସ ସ୍ଥିର କରାଯାଇଛି । ମତ୍ସ୍ୟଚାଷର ପ୍ରୋତ୍ସାହନ, କୃଷିର ବିକାଶ ଏବଂ ଗ୍ରାମାଞ୍ଚଳରେ ସାମାଜିକ-ଆର୍ଥିକ ଅଭିବୃଦ୍ଧି ଭଳି ଲାଭ ମିଳିବ । ପାର୍ବତୀଗିରି ମେଗା ଜଳସେଚନ ପ୍ରକଳ୍ପ ଅଧିନରେ ଅନେକ ସ୍ଥାନ ଚିହ୍ନଟ ହୋଇଛି ।

ଏଥିସହ ପଢ଼ନ୍ତୁ: ରାଜ୍ୟ କ୍ୟାବିନେଟ୍‌ରେ ୧୦ ବିଭାଗର ୧୩ ପ୍ରସ୍ତାବକୁ ମଞ୍ଜୁରୀ; କଲେଜରେ ଦିନକୁ ୧GB ମାଗଣା ଡାଟା 

ଓଡ଼ିଶା ସାଧାରଣ ବଣ୍ଟନ ବ୍ୟବସ୍ଥା ଆଦେଶ ୨୦୧୬ରେ ସଂଶୋଧନ କରାଯାଇଛି । ବେସରକାରୀ ଡିଲରଙ୍କ ସ୍ଥନରେ ଆନୁଷ୍ଠାନିକ ସଂସ୍ଥାଙ୍କୁ ନିଯୁକ୍ତି ପ୍ରକ୍ରିୟାକୁ ଆସନ୍ତା ବର୍ଷ ସେପ୍ଟେମ୍ବର ୩୦ ଯାଏଁ ବୃଦ୍ଧି ହୋଇଛି । ଏ ସମ୍ପର୍କିତ ସଂଶୋଧନ ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛି ।

ନିର୍ମାଣ ହେବ ୬ ଶହ ମେଗାୱାଟର ଅପର ଇନ୍ଦ୍ରାବତୀ ପମ୍ପଡ୍ ଷ୍ଟୋରେଜ । ୪,୭୦୮ କୋଟି ଟଙ୍କାରେ ନିର୍ମାଣ କରିବ ଓଡ଼ିଶା ହାଇଡ୍ରୋପାୱାର କର୍ପୋରେସନ ଲିମିଟେଡ୍ ।

ମାଗଣା ଇଣ୍ଟରନେଟ୍

ରାଜ୍ୟ କ୍ୟାବିନେଟ୍ ବୈଠକରେ, ତିନି ବର୍ଷ ଅବଧି (ଆର୍ଥିକ ବର୍ଷ ୨୦୨୬-୨୭ ରୁ ଆର୍ଥିକ ବର୍ଷ ୨୦୨୮-୨୯) ମଧ୍ୟରେ ମୋଟ ୩୯୩.୬୨ କୋଟି ଟଙ୍କାର ବ୍ୟୟ ଅଟକଳ ସହ "ଓଡ଼ିଶା ଶିକ୍ଷାନେଟ୍ - ସମସ୍ତ ମହାବିଦ୍ୟାଳୟ ଏବଂ ବିଶ୍ବବିଦ୍ୟାଳୟକୁ ନିଶୁଳ୍କ ୱାଇ-ଫାଇ ଇଣ୍ଟରନେଟ୍ ସୁବିଧା ମାଧ୍ୟମରେ ଛାତ୍ରଛାତ୍ରୀଙ୍କ ସଶକ୍ତୀକରଣ" ଫ୍ଲାଗସିପ୍ ଯୋଜନାର କାର୍ଯ୍ୟକାରିତାକୁ ଅନୁମୋଦନ କରାଯାଇଛି ।

ଏହି ଯୋଜନା ପ୍ରଥମ ପର୍ଯ୍ୟାୟରେ ୧୩୦ଟି ମହାବିଦ୍ୟାଳୟରେ ସଫଳ କାର୍ଯ୍ୟକାରିତା ଆଧାରରେ ଓଡ଼ିଶାର ୬୦୧ଟି ସରକାରୀ ଏବଂ ଅନୁଦାନପ୍ରାପ୍ତ ମହାବିଦ୍ୟାଳୟକୁ ନିଶୁଳ୍କ, ସୁରକ୍ଷିତ ଏବଂ ଉଚ୍ଚ-ଗତି ସମ୍ପନ୍ନ ୱାଇ-ଫାଇ ସଂଯୋଗୀକରଣ ପ୍ରଦାନ କରିବ । ପ୍ରତ୍ୟେକ ପ୍ରମାଣୀକୃତ ଛାତ୍ରଛାତ୍ରୀ ଶୈକ୍ଷିକ, ଗବେଷଣା ଏବଂ ଦକ୍ଷତା ବିକାଶ ଉଦ୍ଦେଶ୍ୟରେ କ୍ୟାମ୍ପସ ମଧ୍ୟରେ ପ୍ରତିଦିନ ୧ GB ପର୍ଯ୍ୟନ୍ତ ନିଶୁଳ୍କ ଇଣ୍ଟରନେଟ୍ ଡାଟା ପାଇବେ ।