Odisha Panchayat Election / ପଞ୍ଚାୟତ ପରେ ପରେ ବାଜିବ ପୌର ବିଗୁଲ୍; ସଜବାଜ ହେଲେଣି ୩ ପ୍ରମୁଖ ଦଳ

ଭୁବନେଶ୍ଵର: ଆଉ ୬ ମାସ ପରେ ରାଜ୍ୟରେ ହେବ ପଞ୍ଚାୟତ ନିର୍ବାଚନ । ମାର୍ଚ୍ଚ ଶେଷ କିମ୍ବା ଏପ୍ରିଲ ପହିଲାରେ ନିର୍ବାଚନ କରିବାକୁ ଯୋଜନା କରୁଛନ୍ତି ରାଜ୍ୟ ନିର୍ବାଚନ ଆୟୋଗ । ଏଥିପାଇଁ ସରକାରୀ ସ୍ତରରେ ଆରମ୍ଭ ହେଲାଣି ପ୍ରସ୍ତୁତି ।

ଏହାରି ଭିତରେ ନିର୍ବାଚନୀ ମୈଦାନକୁ ଓହ୍ଲାଇବାକୁ ସଜବାଜ ହେଲେଣି ରାଜ୍ୟ ରାଜନୀତିର ୩ ପ୍ରମୁଖ ଦଳ । ସବୁଠୁ ଆଗରେ ଶାସକ ଦଳ ବିଜେପି ରହିଥିବା ବେଳେ ଦୁଇ ଦିନିଆ ରାଜ୍ୟ କାର୍ଯ୍ୟକାରିଣୀରେ ଏଥିପାଇଁ ପ୍ରସ୍ତୁତ ହୋଇଛି ସ୍ୱତନ୍ତ୍ର ରୋଡ୍ ମ୍ୟାପ୍ ।

ଏଥିସହ ପଢ଼ନ୍ତୁ: ୧୮ ପ୍ରତିଶତ ଭୋଟ୍ ପାଇଁ ଏତେ ଭୟଭୀତ କାହିଁକି? ଅଖିଳେଶଙ୍କୁ ରାଜଭରଙ୍କ କଟାକ୍ଷ 

ଏନେଇ ରାଜସ୍ଵ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି, "ଛୋଟ ହେଉ କି ବଡ଼ ହେଉ ପ୍ରତିଟି ନିର୍ବାଚନ ଆମ ପାଇଁ ଗୋଟିଏ ଗୋଟିଏ ଆହ୍ଵାନ । ୨୦୨୪ରେ ନିର୍ବାଚନ ସରୁ ସରୁ ଉପନିର୍ବାଚନ ଥିଲା, ତାହା ମଧ୍ୟ ଆହ୍ଵାନ ଥିଲା । ଲୋକଙ୍କ ସମର୍ଥନରେ ୮୫ ହଜାରରୁ ଅଧିକ ଭୋଟ୍‌ରେ ଜିତିଲୁ । ଏବେ ପଞ୍ଚାୟତ ଓ ପୌର ନିର୍ବାଚନ ସାରା ରାଜ୍ୟରେ ହେବ । ଆହ୍ଵାନକୁ ସାମ୍ନା କରିବାକୁ ଆଗୁଆ ଯୋଜନା ହେଉଛି । ସେଇ ମନ୍ତ୍ର ଆମକୁ ଦିଆଯାଇଛି ।"

ସେପଟେ ତୃଣମୂଳ ସ୍ତରରୁ ନେତାଙ୍କୁ ସକ୍ରିୟ କରିବାକୁ କଂଗ୍ରେସ ବି ସବୁ କମିଟିର କରିଛି ନବକଳେବର । ନୂଆ ରାଜନୈତିକ ବ୍ୟାପାର କମିଟି ସହ ପରାମର୍ଶଦାତା, ସାଧାରଣ ସମ୍ପାଦକ ଓ ସମ୍ପାଦକଙ୍କୁ ନେଇ ଗଠିତ ଜୁମ୍ବୋ କମିଟିରେ ସମସ୍ତଙ୍କୁ ଥଇଥାନ କରି ଅସନ୍ତୋଷ ଦୂର ପାଇଁ ଚେଷ୍ଟା କରାଯାଇଛି ।

ଖୁବଶୀଘ୍ର ନୂଆ କମିଟିର ବୈଠକ ବସି ଦଳ ପଞ୍ଚାୟତ ଓ ପୌର ପାଇଁ ରୋଡ୍ ମ୍ୟାପ ପ୍ରସ୍ତୁତ କରିବ କହିଛନ୍ତି ଦଳର ସଂଗଠନ ପ୍ରଭାରୀ ସନ୍ତୋଷ ସିଂ ସାଲୁଜା । ତେବେ, ପଞ୍ଚାୟତ ନିର୍ବାଚନ ପୂର୍ବରୁ ନବୀନଙ୍କ ଜିଲ୍ଲା ବୁଲାକୁ ନେଇ ବିଜେଡିରେ ଏବେ ବି ସସପେନ୍ସ ଜାରି ରହିଥିବା ବେଳେ ଦଳ ସବୁ ବେଳେ ନିର୍ବାଚନ ପାଇଁ ପ୍ରସ୍ତୁତ ବୋଲି କହିଛନ୍ତି ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ।

ଏଥିସହ ପଢ଼ନ୍ତୁ: ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା: ଖୋଲିବ 1,000 ନୂତନ ସ୍କୁଲ, ବିଦ୍ୟା ଭାରତୀ ସ୍କୁଲଗୁଡ଼ିକର ବିଶେଷତ୍ୱ ​​କ’ଣ ? 

ପଞ୍ଚାୟତ ନିର୍ବାଚନ ପରେ ପରେ ପୌର ନିର୍ବାଚନ ହେବ । ଯେଉଁଥିରେ ସମ୍ବଲପୁର, ପୁରୀ ଓ ରାଉରକେଲା ମହାନଗର ବି ଏଥର ସାମିଲ ହେବ । ତିନି ଦଳ ଭିତରେ ନିର୍ବାଚନ ରେ କିଭଳି ଫାଇଟ ହେଉଛି ତାହା ଉପରେ ଏବେ ସମସ୍ତଙ୍କ ନଜର ରହିଛି ।