Odisha Politics / "ବୁଥ ସ୍ତରକୁ ଯାଅନ୍ତୁ, ସଂଗଠନ ଅଧିକ ଆହୁରି ସୁଦୃଢ କରନ୍ତୁ"

ଭୁବନେଶ୍ଵର: ପଞ୍ଚାୟତ ଓ ପୌର ନିର୍ବାଚନ ପାଇଁ ସରଗରମ ରାଜ୍ୟ ରାଜନୀତି । ଗୋଟିଏ ପଟେ ରୁଦ୍ଧଦ୍ୱାର ବୈଠକରେ ବାଜିମାତ୍ ପାଇଁ ମାଷ୍ଟରପ୍ଲାନ୍ ପ୍ରସ୍ତୁତ କରୁଛି ଶାସକ ବିଜେପି ତ ଆଉ ଗୋଟିଏ ପଟେ ମୈଦାନକୁ ଓହ୍ଲାଇବାକୁ ସଜବାଜ ହେଲେଣି ବିଜେଡି ଓ କଂଗ୍ରେସ।

ଅପରପକ୍ଷରେ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଲାଣି ରାଜ୍ୟ ନିର୍ବାଚନ କମିଶନଙ୍କ ପ୍ରସ୍ତୁତି । କାହା ପାଇଁ ବାଜି ହେବ କଠିନ ? କିଏ ମାରିବ ସରପଞ୍ଚରୁ ମେୟର ଆସନ ?

ଏଥିସହ ପଢ଼ନ୍ତୁ: ପଞ୍ଚାୟତ ଏବଂ ପୌର ନିର୍ବାଚନ ପାଇଁ ନେତାଙ୍କୁ ନୂଆ ପ୍ରଭାରୀଙ୍କ ନୂଆ ଟାସ୍କ 

"ପଞ୍ଚାୟତ ଓ ପୌର ନିର୍ବାଚନକୁ ହାଲୁକା ଭାବେ ନିଅନ୍ତୁ ନାହିଁ । ବୁଥ ସ୍ତରକୁ ଯାଅନ୍ତୁ, ସଂଗଠନ ଅଧିକ ଆହୁରି ସୁଦୃଢ କରନ୍ତୁ ।" ଗତକାଲି ବସିଥିବା ବିଜେପିର ଶୀର୍ଷ ନେତୃତ୍ୱଙ୍କ ଗୁରୁତ୍ୱପୂର୍ଣ୍ଣ ବୈଠକରେ ମନ୍ତ୍ରୀ, ବିଧାୟକଙ୍କ ସହ ଜିଲ୍ଲା ସଭାପତିଙ୍କୁ ଏଭଳି କଡ଼ା ପରାମର୍ଶ ଦେଇଛନ୍ତି ନୂଆ ପ୍ରଭାରୀ ଡି. ପୁରନ୍ଦେଶ୍ୱରୀ । ଦିନତମାମ ଚାଲିଥିବା ଏହି ରୁଦ୍ଧଦ୍ୱାର ବୈଠକରେ ଆଗାମୀ ପଞ୍ଚାୟତ ଓ ପୌର ନିର୍ବାଚନ ନେଇ ହୋଇଥିଲା ସବୁଠୁ ଅଧିକ ଆଲୋଚନା ।

ରାଜ୍ୟରେ ଶାସନ ଭାର ସମ୍ଭାଳିଥିଲେ ବି ଦଳ ଆଗକୁ କିଭଳି ନିଜର ଦୁର୍ଗ ଆହୁରି ମଜଭୂତ କରିବ ଏବଂ ଭୋଟ୍ ବାକ୍ସରେ ବିଜୟର ଧ୍ୱଜା ଉଡ଼ାଇବ, ସେଥିପାଇଁ ପ୍ରସ୍ତୁତ ହୋଇଛି ବ୍ଲୁ-ପ୍ରିଣ୍ଟ ।

ଶାସନ ଗାଦିରୁ ଓହ୍ଲାଇବା ପରେ ଚଳିତ ଥର ନୂଆ ସରକାର ବିରୋଧରେ ନିର୍ବାଚନୀ ଲଢ଼େଇ ଲଢ଼ିବା ବିଜେଡି ପାଇଁ ସବୁଠୁ ବଡ଼ ଚ୍ୟାଲେଞ୍ଜ । ବିଭିନ୍ନ ଜିଲ୍ଲାରେ କମିଟି ଗଠନ କରି ଦଳୀୟ ସଂଗଠନକୁ ପୁଣି ଥରେ କ୍ରିୟାଶୀଳ କରିବାକୁ ଆପ୍ରାଣ ଚେଷ୍ଟା ଚଳାଇଛି ବିଜେଡି ।

ବିଭିନ୍ନ ନିର୍ବାଚନ ମଣ୍ଡଳୀରୁ ଆସୁଥିବା କର୍ମୀଙ୍କୁ ଭେଟିବା ବେଳେ ପଞ୍ଚାୟତ ବାଜି ପାଇଁ ଅଧିକ ଗ୍ରାଉଣ୍ଡ୍ ୱାର୍କ କରିବାକୁ ଟିପ୍ସ ଦେଉଛନ୍ତି ବିଜେଡି ସୁପ୍ରିମୋ । ସେପଟେ କଂଗ୍ରେସ ବି ପଛରେ ପଡ଼ିନି। ଲୋକସଭା ନିର୍ବାଚନ ମଣ୍ଡଳୀ ଓ ଜିଲ୍ଲାୱାରୀ ବରିଷ୍ଠ ନେତାଙ୍କୁ ଗୁରୁଦାୟିତ୍ୱ ଦେବା ସହ ଗୋଟିଏ ମାସରେ ୧୫ରୁ ୨୦ ଦିନ ଗ୍ରାଉଣ୍ଡରେ ରହି କର୍ମୀଙ୍କ ସହ ଯୋଡ଼ିହେବାକୁ ଦେଇଛି ସ୍ୱେଶାଲ ଟାସ୍କ ।

ଏଥିସହ ପଢ଼ନ୍ତୁ: ବିଜେଡି ସରକାର ସମୟରେ ଏକ ଘରୋଇ କମ୍ପାନୀକୁ ଅନୁକମ୍ପା ଦେବା ପଛର ରହସ୍ୟ କ’ଣ ?: ଧର୍ମେନ୍ଦ୍ର ପ୍ରଧାନ 

ଏପ୍ରିଲରେ ପଞ୍ଚାୟତ ନିର୍ବାଚନ ସରିବା ପରେ ଜୁନ୍‌ରେ ହୋଇପାରେ ପୌର ନିର୍ବାଚନ। ଏଥିପାଇଁ ରାଜ୍ୟ ନିର୍ବାଚନ ଆୟୋଗଙ୍କ ପ୍ରସ୍ତୁତି ବି ବେଶ୍ ଜୋରଦାର ।  ପଞ୍ଚାୟତ ଭୋଟ୍ ନେଇ ଜିଲ୍ଲାପାଳମାନଙ୍କ ସହ ଗୋଟିଏ ପର୍ଯ୍ୟାୟ ଆଲୋଚନା ସରିଥିବା ବେଳେ BDO, ପୌର ପ୍ରଶାସନର ଅଧିକାରୀ ଏବଂ BLO ମାନଙ୍କୁ ଡୋର୍-ଟୁ-ଡୋର୍ ସର୍ଭେ ପାଇଁ ତାଲିମ ବି ଦିଆସରିଛି ।

ଏବେ ଦେଖିବାକୁ ବାକି ରହିଲା, ଏହି ନିର୍ବାଚନୀ ମହାଲଢ଼େଇରେ କାହା ରଣନୀତି କାମ ଦେଉଛି ଆଉ କାହାକୁ ମିଳୁଛି ଜନତାଙ୍କ ଜନାଦେଶ ।