Odisha Politics / ପଞ୍ଚାୟତ ଏବଂ ପୌର ନିର୍ବାଚନ ପାଇଁ ନେତାଙ୍କୁ ନୂଆ ପ୍ରଭାରୀଙ୍କ ନୂଆ ଟାସ୍କ

ଭୁବନେଶ୍ଵର: ଦାୟିତ୍ଵ ମିଳିଲା, ରାଜ୍ୟରେ ପହଞ୍ଚୁ ପହଞ୍ଚୁ ଆରମ୍ଭ କରିଦେଲେ ସଂଗଠନ ମଜଭୁତ ପାଇଁ ଅଙ୍କକଷା । ଭୁବନେଶ୍ଵରରେ ପହଞ୍ଚି କାମ ଆରମ୍ଭ କଲେ ନୂଆ ପ୍ରଭାରୀ ଡି ପୁରନ୍ଦେଶ୍ଵରୀ ଏବଂ ସହ ପ୍ରଭାରୀ ସ୍ଵଦେଶ ସିଂ । ବିମାନବନ୍ଦରରେ ଦଳ ପକ୍ଷରୁ ଭବ୍ୟ ସ୍ଵାଗତ ସମ୍ଭର୍ଦ୍ଧନା ପରେ ବିଜେପି କାର୍ଯ୍ୟାଳୟରେ ନେଇଥିଲେ ପଦାଧିକାରୀ ବୈଠକ ।

ବୈଠକରେ ଦଳର ସାଙ୍ଗଠନିକ ସ୍ଥିତି ନେଇ ଆଲୋଚନା କରିବା ସହ ଆଗକୁ ଦଳ ହାତକୁ ନେବାକୁ ଥିବା କାର୍ଯ୍ୟକ୍ରମ ପାଇଁ ଟିପ୍ସ ଦେଇଥିଲେ ପୁରନ୍ଦେଶ୍ଵରୀ । ଆଜି ମନ୍ତ୍ରୀ ମାନଙ୍କ ସହ ମଧ୍ୟ ଆଲୋଚନା କରିଛନ୍ତି । ଆସନ୍ତାକାଲି ମଧ୍ୟ ରାଜ୍ୟ ବିଜେପି କାର୍ଯ୍ୟାଳୟରେ ବୈଠକ କରିବେ । ତେବେ ପଞ୍ଚାୟତ ଏବଂ ପୌର ନିର୍ବାଚନ ପାଇଁ ନେତାଙ୍କୁ ନୂଆ ଟାସ୍କ ଦେଇଛନ୍ତି ନୂଆ ପ୍ରଭାରୀ ।

ଏଥିସହ ପଢ଼ନ୍ତୁ: ଗାନ୍ଧୀ ଜୟନ୍ତୀରୁ ଓଡ଼ିଶା ରାଜନୀତି ସରଗରମ…ମଇଦାନରେ ବିଜେପି-ବିଜେଡି-କଂଗ୍ରେସର କାର୍ଯ୍ୟକ୍ରମ 

ଓଡ଼ିଶା ପ୍ରଭାରୀ ଭାବେ ପୁଣି ଦାୟିତ୍ଵ ମିଳିବା ପରେ ନବ ନିଯୁକ୍ତ ପ୍ରଭାରୀ ଡି. ପୁରନ୍ଦେଶ୍ଵରୀଙ୍କ ଅଙ୍କକଷା । ଭୁବନେଶ୍ଵରରେ ସହ ପ୍ରଭାରୀ ସ୍ଵଦେଶ ସିଂଙ୍କ ସହ ପହଞ୍ଚିବା ପରେ କରିଥିଲେ ମାନସ ମନ୍ଥନ । ରାଜ୍ୟ କାର୍ଯ୍ୟାଳୟରେ ପ୍ରଭାରୀ ନେଇଛନ୍ତି ପ୍ରଥମ ବୈଠକ । ରାଜ୍ୟ ବିଜେପି ପଦାଧିକାରୀ, ଜିଲ୍ଲା ସଭାପତି ଏବଂ ପ୍ରଭାରୀଙ୍କ ସହ ସାଙ୍ଗଠନିକ ସ୍ଥିତି ବାବଦରେ ପ୍ରାୟ ୩ ଘଣ୍ଟା ଧରି ଆଲୋଚନା କରିଛନ୍ତି ।

ପଞ୍ଚାୟତ ଏବଂ ପୌର ନିର୍ବାଚନ ପାଇଁ ଦେଇଥିଲେ ଗୁରୁ ମନ୍ତ୍ର । ସାଧାରଣ ନିର୍ବାଚନରେ ବିଜେଡି ବିଫଳତା ଥିଲା ବିଜେପିର ମୁଖ୍ୟ ଅସ୍ତ୍ର । ହେଲେ ପଞ୍ଚାୟତ ନିର୍ବାଚନରେ ରଣନୀତି ବଦଳାଇବାକୁ ପଡ଼ିବ । ଆଗାମୀ ନିର୍ବାଚନରେ ପ୍ରଦର୍ଶନ ଦେଖାଇବାକୁ ପଡ଼ିବ । ସରକାର ଯେଉଁ କାର୍ଯ୍ୟକ୍ରମ ହାତକୁ ନେଇଛନ୍ତି ତାର ଅଧିକ ପ୍ରଚାର ପ୍ରସାର କରିବାକୁ ହେବ ବୋଲି ମନ୍ତ୍ର ଦେଇଛନ୍ତି ନୂଆ ପ୍ରଭାରୀ ।

କେବଳ ସେତିକି ନୁହେଁ ରାଜ୍ୟରେ କେଉଁ ନେତାଙ୍କୁ କେଉଁ ଦାୟିତ୍ଵ ଦିଆଯାଇଛି ସେନେଇ ମଧ୍ୟ ଅବଗତ ହୋଇଛନ୍ତି ପ୍ରଭାରୀ । ସେବା ସଙ୍କଳ୍ପ ଅଭିଯାନ କେମିତି ଚାଲିଛି, ୭ ତାରିଖରେ ମୋଦିଙ୍କ ସୁଶାସନର ୨୫ ବର୍ଷ ପୂର୍ତ୍ତି ଅବସରରେ ସେବା ଜ୍ୟୋତି କାର୍ଯ୍ୟକ୍ରମ କେମିତି ସଫଳତାର ସହ ଆୟୋଜନ ହେବ ସେ ନେଇ ମଧ୍ୟ ଆଲୋଚନା ହୋଇଥିଲା ।

ଏଥିସହ ପଢ଼ନ୍ତୁ: ଭିତ୍ତିଭୂମି ପାଇଁ ପାଣି ଭଳି ଖର୍ଚ୍ଚ ହେଲା ଟଙ୍କା…କିନ୍ତୁ ଭିତରେ ଚାଲିଥିଲା ଖୋଳ କରିବାର ଖେଳ 

ନିଜ ରାଜ୍ୟ ଆନ୍ଧ୍ର ମଡେଲରେ ନେତାଙ୍କୁ କାମ ବାଣ୍ଟିବାକୁ ମଧ୍ୟ ପରାମର୍ଶ ଦେଇଥିଲେ ପୁରନ୍ଦେଶ୍ଵରୀ । ସଙ୍ଗଠନ କମ୍ ଥାଇ କିଭଳି ସମସ୍ତ ଲୋକଙ୍କ ପାଖରେ ପହଞ୍ଚି ହେବ, ସବୁଦିନ କାର୍ଯ୍ୟକ୍ରମ ହୋଇପାରିବ ସେ ନେଇ ଦେଇଥିଲେ ଟିପ୍ସ । ଏହା ସହ ନିଜେ ରାଜ୍ୟର ଗ୍ରାଉଣ୍ଡ ଜିରୋକୁ ଯାଇ ସଙ୍ଗଠନକୁ ମଜଭୁତ କରିବାକୁ ନେତାଙ୍କୁ ପ୍ରତିଶ୍ରୁତି ଦେଇଥିଲେ ସହ-ପ୍ରଭାରୀ ସ୍ଵଦେଶ ସିଂ ।

ବୈଠକ ବାଦ୍ ଆଙ୍ଗନ କା ମିଲନ କାର୍ଯ୍ୟକ୍ରମରେ ୟୁନିଟ ୧ ସ୍ଥିତ ଅଙ୍ଗନବାଡି କେନ୍ଦ୍ରରେ ପହଞ୍ଚି ଛୋଟ ପିଲା, ଅଙ୍ଗନବାଡି କର୍ମୀ ଏବଂ ଆଶା କର୍ମୀଙ୍କ ସହ ଆଲୋଚନା କରିଛନ୍ତି ଡି. ପୁରନ୍ଦେଶ୍ଵରୀ ।