ପୌରାଞ୍ଚଳ ଅଧ୍ୟକ୍ଷ ପଦ ପାଇଁ ପ୍ରକାଶ ପାଇଲା ସଂରକ୍ଷଣ ତାଲିକା । ଏନେଇ ରାଜ୍ୟ ନିର୍ବାଚନ ଆୟୋଗ ମଧ୍ୟ ପ୍ରସ୍ତୁତି ଆରମ୍ଭ କରିଛନ୍ତି । ପୌରାଞ୍ଚଳ ପାଇଁ ୧୨ ହଜାର ଇଭିଏମ, ଆଉ ୬ ହଜାର ନୂଆ ଇଭିଏମ ଆବଶ୍ୟକ ରହିଛି । ସଂରକ୍ଷଣ ତାଲିକା ପ୍ରକାଶ ପାଇବା ପରେ ଡୋର୍ ଟୁ ଡୋର୍ ସର୍ଭେ କରାଯିବ । ଏନଏସିରେ ଗୋଟେ ୱାର୍ଡକୁ ଗୋଟେ ବୁଥ ହେବ। ପୌରାଞ୍ଚଳ ଓ ପଞ୍ଚାୟତ ନିର୍ବାଚନ ପାଇଁ ମାର୍ଚ୍ଚ ମାସରେ ନୋଟିଫିକେସନ୍ ହେବ। ଏପ୍ରିଲ କିମ୍ବା ମେ ରେ ପାଖାପାଖି ସମୟରେ ଉଭୟ ପଞ୍ଚାୟତ ଏବଂ ପୌର ନିର୍ବାଚନ କରାଯିବ ।

ସେହିପରି ଅକ୍ଟୋବର ମାସରୁ ଇଲେକ୍ଟ୍ରିକାଲ ରୋଲ୍ ଆରମ୍ଭ ହେବ । ସମୁଦାୟ ୧୪୩ ପୌର, ଏନଏସି ଏବଂ ମ୍ୟୁନିସିପାଲ କର୍ପୋରେସନ ପାଇଁ ନିର୍ବାଚନ ହେବ । ସମ୍ବଲପୁର ମହାନଗର ପାଇଁ ଯେଉଁ ସମସ୍ୟା ନେଇ ହାଇକୋର୍ଟରେ କେସ୍‌ ଚାଲିଥିଲା, ତା'ର ସମାଧାନ ହୋଇସାରିଛି । ତା ପରେ ଅର୍ଡର ବି ବାହାରି ସାରିଛି ବୋଲି ରାଜ୍ୟ ନିର୍ବାଚନ ଆୟୋଗଙ୍କ ସଚିବ ସନ୍ତୋଷ କୁମାର ଦାଶ କହିଛନ୍ତି ।

ସେପଟେ ଆସନ୍ତା ୨୦୨୭ ଏପ୍ରିଲ-ମେ’ ମାସରେ ରାଜ୍ୟରେ ଅନୁଷ୍ଠିତ ହେବ ପଞ୍ଚାୟତ ନିର୍ବାଚନ ଏବଂ ଜୁନ୍ ସୁଦ୍ଧା ଏହି ପ୍ରକ୍ରିୟା ଶେଷ କରିବାକୁ ଲକ୍ଷ୍ୟ ରଖାଯାଇଛି । ତେବେ ୱାର୍ଡ ଗଡ଼ବଡ଼ ଏଡ଼ାଇବାକୁ ପ୍ରଥମ ଥର ପାଇଁ ଘରକୁ ଘର ବୁଲି ସର୍ଭେ କରାଯିବ ବୋଲି ରାଜ୍ୟ ନିର୍ବାଚନ କମିଶନଙ୍କ ସଚିବ ସୂଚନା ଦେଇଥିଲେ । ଗୋଟିଏ ୱାର୍ଡର ସମସ୍ତ ଭୋଟର ଯେମିତି ନିଜ ୱାର୍ଡ ବା ବୁଥରେ ଭୋଟ୍ ଦେବେ ସେନେଇ ବ୍ୟବସ୍ଥା କରାଯିବ ବୋଲି ସେ ସୂଚନା ଦେଇଛନ୍ତି । ଏଥିପାଇଁ ସେପ୍ଟେମ୍ବରରେ SIR ପ୍ରକ୍ରିୟା ସରିବା ପରେ, ଅକ୍ଟୋବରରେ ସର୍ଭେ ଆରମ୍ଭ କରିବେ ରାଜ୍ୟ ନିର୍ବାଚନ କମିଶନ୍ ।

ଏହାରି ଭିତରେ RDC ଓ ଜିଲ୍ଲାପାଳମାନଙ୍କ ସହ ବୈଠକ କରିସାରିଛନ୍ତି ରାଜ୍ୟ ନିର୍ବାଚନ ଆୟୋଗ । ଆଗାମୀ ୨୧ ତାରିଖରେ ରୁଟିନ୍ ବୈଠକ ହେବ । ଏଥିସହ ପ୍ରସ୍ତୁତି ମଧ୍ୟ ଆରମ୍ଭ ହୋଇସାରଛି । ବିଭିନ୍ନ ପ୍ରକାରର ବାଲାଟ୍ ପେପର ମୁଦ୍ରଣ ପାଇଁ ସରକାରୀ ମୁଦ୍ରଣ ସଂସ୍ଥାକୁ ମଧ୍ୟ ଚିଠି ଲେଖା ସରିଛି । ୨୦୨୨ରେ ୭୬୬ ଜିଲ୍ଲା ପରିଷଦ ଆସନ ଜିତି ଏକପାଖିଆ ଭାବେ ସମସ୍ତ ଜିଲ୍ଲା ପରିଷଦ ଦଖଲ କରିଥିଲା ବିଜେଡି । ହେଲେ ୨୦୨୪ ସାଧାରଣ ନିର୍ବାଚନ ପରେ ବଦଳିଛି ପଞ୍ଚାୟତ ସମୀକରଣ । ୨୦ରୁ ଅଧିକ ବ୍ଲକ ଚେୟାରମ୍ୟାନ ଓ ଗୋଟିଏ ଜିଲ୍ଲା ପରିଷଦ ଅଧ୍ୟକ୍ଷ ସହ ଶହଶହ ପଞ୍ଚାୟତ ପ୍ରତିନିଧି ବିଜେପିରେ ଯୋଗ ଦେଇସାରିଲେଣି । ଆହୁରି କିଛି ଏବେ ବିଜେପି ମୁହାଁ ବୋଲି ଦାବି ହେଉଛି । ଏଭଳି ସ୍ଥିତିରେ ଗ୍ରାଉଣ୍ଡ ଲେବୁଲରେ ଶାସକ ଦଳ ସହ ମୁକାବିଲା କରିବା ବିରୋଧୀ ବିଜେଡି ଓ କଂଗ୍ରେସ ପାଇଁ ମୁସ୍କିଲ ହୋଇପାରେ ।